1A sa vosa vei Jeremaia ko Jiova me baleta na dausiga,
2“Sa ra ia na tagi yaso na Juta,
Era sa mate na kena veikoro,
Era sa davo ena qele na lewena ena rarawa;
Ka sa tagica yani na veivuke o Jerusalemi.
3Era sa talai ira na nodra tamata na turaga
Me ra la'ki taki wai;
Era sa lako ki na veikeliwai,
Ia era sa sega ni kunea kina na wai;
Era sa lesu vata mai
Kei na nodra saqa lala.
Era sa yalo lailai ka veilecayaki,
Ka ra sa ubia na uludra.
4Era sa madua na dauteitei,
Era sa ubia na uludra
Baleta ni sa sega ni tau na uca,
Ka sa mamaca sara na vanua.
5Sa biuta na dia
Na luvena sa qai sucu ena i teitei,
Baleta ni sa sega na co.
6Era sa tucake na asa kila ena veidelana,
Me ra ceguva eso na cagi
Me vaka na koli;
Sa buwawa na matadra
Baleta ni sa sega na kedra kakana.
7Era sa tagi mai vei au
Na noqu tamata,
E dina sa beitaki keimami
Na neimami ca,
Ia ni vukei keimami Jiova
Me vaka na nomuni vosa ni yalayala.
Keimami sa gole tani vakavuqa
Mai vei kemuni;
Keimami sai valavala ca vei kemuni.
8Sa i kemuni ga na i nuinui nei Isireli,
Na nodra i vakabula
Ena gauna ni leqa.
A cava o ni sa vakakina na vulagi
Ena neimami vanua,
O ni sa vaka na vulagi e tiko bogi dua wale ga?
9A cava o ni sa vakakina e dua sa kau tani vakasauri,
E vaka e dua na sotia sa sega ni rawa ni veivuke?
Jiova, o ni sa tiko dina ga vata kei keimami
O ni sa vakatokai keimami me keimami nomuni;
Ni kakua sara ni biuti keimami.
10A tukuna ko Jiova me baleti ira na tamata oqo, “Era sa vinakata me ra lako tani mai vei au vakaoqo, ka sa sega ni lewai ira rawa. O koya oqo au sa sega kina ni vinakati ira. Au na nanuma tiko na veika ca era cakava ka'u na vakaitotogitaki ira ena vuku ni nodra i valavala ca.”
11A sa kaya vei au ko Jiova, “Kakua ni masuti au me'u vukei ira na tamata oqo.
12Veitalia ga kevaka era lolo, au na sega ni rogoca na nodra masu; au na sega ni yalo vinaka vei ira veitalia ke ra vakacabora vei au eso na i soro kama, se i soro vua ni sila. Ia au na vakarusai ira ena i valu, ena dausiga kei na mate ca.
13Ia au a qai kaya, “Kemuni na Turaga na Kalou, o ni sa kila ni ra sa tukuna na parofita vei ira na tamata ni na sega na i valu se na dausiga, baleta ni o ni sa yalataka, era kaya, ni sa yaco ga na sautu ena neimami vanua.”
14Ia sa qai kaya ko Jiova, “Era sa vosataka na veika lasu na parofita ena yacaqu. Au a sega ni talai ira, au sega ni vakaroti ira se vosa vei ira. Era sa tukuna vei kemuni na veiraivotu lasu, na veivosa yalayala tawa yaga kei na veika ga era nanuma.
15Sa i au ko Jiova, au sa tukuna na veika au na cakava vei ira na parofita au sega ni talai ira, ia era sa tukuna ena yacaqu ka ra kaya ni na sega ni vakacacani na vanua oqo ena i valu kei na viakana; era sa na mate na parofita oqori ena i valu kei na viakana.
16Era na mate talega na tamata e tukuni vei ira na veika oqo ena i valu kei na dausiga. Na yagodra ena viritaka ena veigaunisala mai Jerusalemi, ka na sega e dua me na buluti ira. Na ka oqo ena yacovi ira kece, ena yacovi ira na watidra, na luvedra tagane kei na luvedra yalewa. Au na sauma vei ira na nodra i valavala ca.”
17Jeremaia, tukuna vei ira na tamata oqo
Na nomu rarawa;
“Me drodro tu mada ga na wai ni mataqu
Ena siga kei na bogi,
Me kakua ni mudu na noqu tagi;
Baleta ni ra sa mavoa vakaca sara na kai noqu,
Era sa mokuti vakaca sara,
18Ni'u lako yani ki na veibuca,
Au sa raica na yago ni tamata era vakamatei ena i valu,
Ni'u lako yani ki na loma ni koro
Au sa raici ira na tamata era sa mate ena viakana.
Era ia tikoga na cakacaka na parofita kei na bete,
Ia era sega ni kila na ka era cakava tiko.”
Era sa Vakatakekere na Tamata vei Jiova19Kemuni Jiova,
O ni sa vakanadakui Juta sara beka ga vakadua?
O ni sa cati ira dina li na lewe i Saioni?
A cava o ni sa mokuti keimami sara kina vakaca
Me keimami kakua ni vakabulai rawa?
Keimami a nuitaka na sautu,
Ia sa sega ni yaco e dua na ka vinaka.
Keimami nuitaka ni keimami rawa ni vakabulai,
Ia sa qai kena i sosomi na rere vakaitamera.
20Keimami sa vakatusa na neimami ca na Turaga,
Kei na nodra ca na neimami qase;
Keimami sai valavala ca vei kemuni.
21Ni nanuma na nomuni yalayala
Ka kakua ni cati keimami,
Kakua ni kauta mai na veivakarusai ki Jerusalemi
Na vanua ka tiko kina na nomuni dabedabe lagilagi.
Ni maroroya na nomuni veiyalayalati o ni a cakava kei keimami;
Ni kakua ni voroka.
22E rawa li ki na veikalou ni veimatanitu
Me vakatauca na uca?
Se rawa li ki na lomalagi
Me vakatauca na uca?
Keimami sa vakanuinui ga vei kemuni,
Jiova na neimami Kalou,
Ni o ni sa cakava na veika kece oqo.
Who We AreWhat We EelieveWhat We Do
2025 by iamachristian.org,Inc All rights reserved.
