1Ia ni sa rogoca na ranadi ni Sipa na i rogorogo me baleti Solomoni kei na nona veiwekani kei na yaca i Jiova, a sa lako mai me vakatarogi koya ena veitaro dredre eso. Era sa kalougata vakakina o ira na nomuni dauveiqaravi, o ira era sa tu tikivi kemuni ka ra rogoca tiko na nomuni vuku.
9Me vakavinavinakataki ko Jiova na nomuni Kalou! Sa vakatakila o koya na levu ni nona vinakati kemuni, ka sa vakatikori kemuni ena nodra i tikotiko vakaturaga na Isireli! Ni sa lomani Isireli tikoga ka tawa mudu ko Jiova, sa lesi kemuni kina o koya mo ni tui, mo ni vakatauca na lewa kei na ka dodonu.”
10A sa qai solia na ranadi ni Sipa vua na tui na i loloma eso sa kauta voli mai: e sivia na 4,000 na kilokaramu na koula, e levu sara na i saluwaki boi vinaka, kei na vatu talei eso. Na levu ni saluwaki sa soli oqo ki vua na tui sai solisoli levu duadua me bau ciqoma na tui ena nona dela ni gauna.
11Ia na waqa kece nei Irami ka dau usa koula mai Oferi, a dau kauta talega mai e levu na kau, kei na vatu talei.
12A cakava na tui na kau talei me i tautauri ena i cabecabe ki na vale i Jiova kei na nona vale na tui, na api talega kei na soliteri vei ira na daunisere; a sega tale ni qai kunei se raici na mataqali kau vakaoqo, me yacova na siga oqo.
13A solia vua na ranadi ni Sipa o Solomoni na tui na ka kecega sa gadreva o koya, se na ka kecega sa kerea, kei na ka talega sa solia vua ena yalo vakaturaga o Solomoni. A sa lesu na ranadi ni Sipa, ka lako ki na nona vanua kei ira na nona dauveiqaravi.
Na i Yau i Solomoni(2Vei 9.13-28)14Ena veiyabaki, a sa dau kumuna o Solomoni e rauta ni 23,000 na kilokaramu na koula
15ka vakuri oqo mai na i sau ni vakacavacava era sa solia mai na tamata dauveivoli, na tubu e rawati mai na veivoli, kei na nodra i solisoli na tui Arapea eso kei ira na kovana ni veiyasana e Isireli.
16A sa cakava o Solomoni e 200 na i sasabai buli ena koula lautuki; na levu ni koula e vakayagataki ena dua na i sasabai e rauta ni 7 na kilokaramu.
17A sa cakava talega e 300 na i sasabai lalai sobu, a caka ena koula tuki, ka tau ya rua na kilokaramu na koula ena dua na i sasabai. A sa la'ki vakatikora na tui na i sasabai kece oqo ena Olo ni Veikau mai Lepanoni.
18A sa cakava na tui e dua na i dabedabe vakatui sa caka mai na ivori, ka boroya ena koula dina.
19A ono na i tagede ena i cabecabe ki na i dabedabe vakatui, a loveci na ulu ni dabedabe vakatui ki dakuna ka toka kina na i vakatakarakara ni dua na ulu ni luve ni bulumakau, ka yadua na laione ena yasa ni taqataqa ni liga ruarua ni dabedabe.
20E tinikarua na laione a tu ena yasa ni tagede: a ono ena yasa ni tagede e dua, ka ono ki na yasa ni tagede kadua. A sega ni dua na i dabedabe vakatui vakaoqo me a bau caka ena dua na matanitu tani.
21Sa koula na bilo ni gunu kece nei Solomoni na tui, ka koula talei na bilo ni sedre kece mai na vale e veikau mai Lepanoni; a sega ni dua me siliva ni a sega ni okati me ka taleitaki na siliva ena gauna i Solomoni.
22Era a kele tu ena toba mai Tasisi na i binibini waqa ni tui kei na i binibini waqa i Irami na tui Taia. Era dau soko lesu mai na i binibini waqa oqo ni oti e yatolu na yabaki, ka ra usana mai na koula, na siliva, na ivori, na maqe, kei na pikoki.
23A sa vutuniyau ka vuku vakalevu cake o Solomoni na tui mai vei ira kecega na vo ni tui,
24ka ra vinakata o ira kecega na kai vuravura me ra lako mai ka rogoca na vuku sa solia oqo vua na Kalou.
25O ira vakayadua era mai sikova na tui era sa kauta vata mai na nodra i loloma, ka okati kina na i yaya siliva kei na i yaya koula, na i sulu vakatui, na i yaragi ni valu, na ka boi vinaka, na ose digitaki eso kei na meule. E a levu cake tikoga na veika oqo ena veiyabaki.
26A sa tara cake o Solomoni na nona mataivalu ka okati kina e 1,400 na qiqinivalu kei na 12,000 na ose ni valu. E a lesia me tiko ga e Jerusalemi e dua na kena i wase, ka ra veibiuyaki ena veikoro lelevu tale eso na kena vo.
27Ena nona veiliutaki vakatui, sa cakava me raici na siliva me vaka ga na vatu, ka sa levu na veiloga ni sitari me vaka ga na veilolo ena ruku ni veidelana e Juta.
28Era a voli mai na ose i Solomoni mai Ijipita kei Kue, ka ra vakaitavi kina na nona dauniveivoli na tui.Vrua 17.16
29Me vaka ni rawa ni voli mai Ijipita na qiqinivalu ena 600 na tiki ni siliva ka i sau ni dua na ose e 150 na tiki ni siliva, era a volivolitaki kina na dauveivoli ni tui vei ira na nodra tui na kai Itaiti kei na nodra tui na kai Siria.
Who We AreWhat We EelieveWhat We Do
2025 by iamachristian.org,Inc All rights reserved.
