1A sa ia na veivaluvaluti ena kedra maliwa na Isireli kei ira na kai Filisitia e Ului Qiliboa. Era a moku mate kina mai kea e lewe levu na Isireli, era sa qai dro me bula na kena vo, ka bau wili kina o Saula na tui kei iratou na luvena.
2Sa qai cici muri ira mai o ira na kai Filisitia ka vakamatea e tolu vei iratou na luve i Saula tagane, o Jonacani kei Apinatapi vata kei Malikisua.
3A sa kaukauwa sara na i valu ena vanua e voliti Saula ka mani lau gasau o koya mai na nodra dakaititi na meca, a sa mavoa sara kina vakaca.
4A sa qai kaya o Saula vua na cauravou ka daucolata na nona i yaragi, “Mo ucuna na nomu i seleiwau ka vakamatei au, me ra kakua kina ni vakasesei au na kai Filisitia tawacilivi oqo.” Ia sa rere vakalevu na cauravou me vakayacora na ka oqo. Sa qai taura ga o Saula na nona i seleiwau, a sa davoca yani na ucuna momoto ka mate sara kina.
5Ni sa raica na cauravou ni sa mate o Saula, a sa taura vakakina na nona i seleiwau, a sa davoca na ucuna momoto ka sa mate vakakina.
6A sa mate o Saula kei iratou na luvena tagane tolutolu, a sa sega tale ni qai dua na nona kawa me veiliutaki vakatui.
7Ni ra sa rogoca na Isireli era sa tiko ena Buca o Jesireli ni ra sa dro na mataivalu ni Isireli ka sa mate talega o Saula kei iratou na luvena tagane tolutolu, era a qai biuta na nodra veikoro ka ra dro talega. Era a qai lako mai na kai Filisitia ka vakatawani ira.
8Ena siga ka tarava ni oti na i valu, era a lako yani na kai Filisitia me ra la'ki tokia mai na nodra i yaya na mate, era sa raica na yago i Saula kei iratou na luvena ni ratou davo koto e Ului Qiliboa.
9Era a tamusuka na ulu i Saula ka taura na nona i yaragi, era sa qai talatala yani me tukuni wavoki e Filisitia na i tukutuku oqo vei ira na nodra veimatakau kei ira na nodra kawa tamata.
10Era a vakatikora na nona i yaragi ena dua na nodra burekalou, ka vakarubeca na uluna ena burekalou i Tekoni na nodra kalou.
11Ia ni ra rogoca na kai Jepesi mai Kiliati na ka era cakava vei Saula o ira na kai Filisitia,
12era a lako kece yani na tamata qaqa, ka la'ki kauta tani mai na yago i Saula kei na yagodratou na luvena, ka kauta i Jepesi. Era a buluti iratou mai kea ena ruku ni dua na vuni oki ka ra a lolo me vitu na siga.
13A sa mate o Saula baleta na nona sa sega ni yalodina vei Jiova. E a talaidredre ki na i vakaro i Jiova; a sa tovolea me vaqaqara i vakasala mai na nona a la'ki vakataroga na yalo ni mateVsoro 19.31; 20.6; 1Samu 13.8-14; 15.1-24; 28.7-8
14ka sega ni a vakatarogi Jiova ga. Ena vuku ni veika oqo sa vakamatei koya kina ko Jiova ka sa solia na lewa ni matanitu vei Tevita na luve i Jese.
Who We AreWhat We EelieveWhat We Do
2025 by iamachristian.org,Inc All rights reserved.
