ESITERI 6 - Ai Vola Tabu Ena Vakavakadewa Vou（FNV）

Laveti ka Vakacerecerei o Motekai

1Ena bogi o ya a sega ni moce rawa tiko na tui. A qai kaya me ra la'ki kau mada mai na i vola tukutuku ni veigauna ni matanitu, me ra bau wiliki vua.

2A mani kune talega kina na kedrau i tukutuku o Pikitane kei Teresi, o rau na enuki ni valenitui ka dau yadrava na katuba ki na rumu ni tui, ena nodrau a bukiveretaka me rau vakamatea na tui vata kei na nona a vakaraitaka na nodrau i naki ca o Motekai.

3A qai taro na tui, ka vaka: “Na i covi se i vakaraitaki ni veidokai cava beka a soli oti vei Motekai me baleta na ka oqo?”

E ratou a qai kaya vua na nona dauveiqaravi, “E se sega saka ni caka vua e dua na ka.”

4Ena gauna vata oqori, a tu kina ena buturara e loma ena valenitui o Amani ena nona lako tiko yani me la'ki kerea vua na tui me vakaliligi Motekai ena kau a vakarautaka oti tu mai o koya.

A qai tarogi iratou na nona dauveiqaravi na tui, ka kaya, “E tiko beka e ke e dua na vakailesilesi.”

5E ratou a sauma vua, ka kaya, “O Amani saka ga sa qai yaco mai oqo.” A qai kaya na tui,

“Dou tukuna vua me curu mai.”

6Ni curu yani o Amani, a tarogi koya sara na tui, ka vaka: ‘E dua na tamata au via solia tiko vua e dua na ka ni veidokai; na cava beka o nanuma me soli vua?’

Ia a vakabauta o Amani ni o koya duadua ga e via soli ka ni veidokai vua na tui.

7A mani sauma na taro ni tui o koya, ka kaya: ‘Oqo na ka me caka vua na tamata e via vakalagilagia na tui.

8Me kau mai na i sulu balavu vakatui ka dau tokara na ose ni tui kei na kena i yaya taucoko.

9Na veika oqo me qai soli vua e dua na vakailesilesi cecere ena nomuni matanitu na tui; ia na turaga oqo me qai vakasulumi ka vakavodoki ki na ose na tamata sa lomamuni mo ni soli ka ni veidokai vua. Ia me qai kauti koya yani ki na loma ni koro ka la'ki kacivaki koya yarayara voli kina, vakaoqo: “Ni raica na ka sa caka vua na tamata sa lomana na tui me soli ka ni veidokai vua.” ’

10A qai kaya vei Amani na tui, “Mo vakatotolo sara ga o iko ka kauta na kote balavu vakatui kei na ose, ka la'ki cakava vei Motekai na Jiu na veika o sa tukuna mai oqori; ia mo kakua sara ni vakalutuya e dua na ka. O na kunei koya ni dabe tiko mai katuba levu.”

11A qai kauta na kote balavu vakatui kei na ose o Amani ka la'ki ukutaki Motekai ka vakavodoki koya ki na ose sa ukucavu tu. A qai kauti koya yani ki loma ni koro levu o Susa, ka kacivaki koya voli yani, ka vaka: “Ni raica na ka sa caka vua na tamata sa lomana na tui me soli ka ni veidokai vua.”

12Ni oti na ka oqori, a qai lesu tale o Motekai ki na matamata ni valenitui; ia o Amani a lesu vakatotolo yani ki na nona vale ena cudru katakata ka tabonaka na matana ena nona madua.

13A qai la'ki talanoataka o Amani na veika a yaco oti vua me rogoca na watina o Seresi kei ira na nodrau veikilai. E ratou a qai vosa vua na nona tamata vuku kei Seresi na watina, ka ratou kaya, ‘Kevaka e Jiu dina o Motekai, na tamata o a sudra sobu mai vua oqori, ia o na sega tale ni qai siviti koya rawa, ena vakarusai iko o koya.’

14Ia ni a bera ni oti na nodratou veitalanoa, era sa yaco yani na enuki ni tui me ratou la'ki vakatotolotaki Amani mai me lako yani ki na veisureti ni kana i Esiteri na Ranadi.