LAKO YANI 24 - Ai Vola Tabu Ena Vakavakadewa Vou（FNV）

Na Vakadeitaki ni Veiyalayalati

1A sa kaya na Kalou ko Jiova vei Mosese, “Lako cake mai vei au ena ulunivanua, o iko kei Eroni, kei Netapi, kei Epaiu, kei ratou na qase ni Isireli lewe 70; ka dou cuva sobu ena vakarokoroko ni se dou yawa mai.

2O iko duadua ga, ka me kakua ni dua tale vei iratou na nomu i lawalawa me lako volekati au mai. Me ra kakua ni lako cake mai ki na ulunivanua na tamata.”

3E a lako o Mosese ka la'ki tukuna vei ira na tamata na i vakaro kei na lawa taucoko i Jiova na Kalou, ka ra a sauma vata kece mai ka kaya, “Keimami na cakava na veika taucoko sa tukuna mai na Kalou ko Jiova.”

4A sa vola taucoko na i vakaro i Jiova na Kalou o Mosese. Ena mataka caca ni siga ka tarava, a sa tara kina ena ruku ni ulunivanua e dua na i cabocabonisoro vata kei na tinikarua na vatu me matataki ira na veiyavusa yadudua e Isireli.

5Sa qai vakatalai ira na cauravou ka ra sa vakacabora na i soro kama, ka ra cabora talega eso na bulumakau me i soro ni veivinakati vei Jiova.

6A sa wasea veimama o Mosese na dra ni manumanu ka biuta ki na beseni e dua na kena i wase; a sa kureitaka na i karua ni kena i wase ki na i cabocabonisoro.

7Sa qai taura na i vola ni veiyalayalati ka wilika ena domoilevu vei ira na tamata. Era sa qai kaya, “Keimami na talairawarawa vei Jiova na Kalou ka cakava na veika taucoko e vakarota.”

8Sa qai taura o Mosese na dra ka tiko ena beseni ka ceburaka ena yagodra na tamata. A sa kaya, “Oqo na dra ka sa vakadeitaka na veiyalayalati ka sa vakayacora vata kei kemuni na Kalou ko Jiova ena gauna a solia kina vei kemuni na nona i vakaro.”

9Era a qai lako cake ki na ulunivanua o Mosese, Eroni, Netapi, Epaiu vata kei ira na lewe 70 na i liuliu mai Isireli,

10ka ra sa raica na Kalou i Isireli. Ia sa tu ena ruku ni yavana e dua na ka sa vaka na salatu sa buli ena vatu talei na safaia, ni sa makaresese me vaka na rarama ni lomalagi.

11A sa sega ni vakaleqai ira na i liuliu oqo ni vanua o Isireli na Kalou; ni ra sa raica na Kalou, ka ra sa kana ka gunu vata.

Mosese ena Ulunivanua o Saineai

12E a kaya vei Mosese ko Jiova, “Lako cake mai ki na ulunivanua kivei au, ka mai wawa kina; ka'u na solia vei iko e rua na vatu raraba sa volai koto kina na lawa kei na i vakaro taucoko au sa vola oti me ra vakavulici kina na tamata.”

13E rau sa qai vakarau o Mosese kei Josua na nona i vukevuke, a sa vakatekivu me gole cake o Mosese ki na ulunivanua me sota kei na Kalou.

14A sa kaya o Mosese vei ira na i liuliu, “Mo ni waraki keirau tiko eke me yacova ni keirau lesu tale mai. O rau o Eroni kei Uri erau sa tiko oqo vata kei kemuni; ka kevaka e tiko vei kemuni e dua na kudru me wali, ia mo ni lako ga vei rau oqo.”

15A cabe cake ki na ulunivanua o Mosese, ka sa solega tu na ulunivanua na o.

16Sa qai siro sobu mai ka mai tiko ena ulunivanua na i serau i Jiova, ka solega tu na ulunivanua na o me ono na siga. Sa qai kacivi Mosese ko Jiova mai na dela ni o ena i kavitu ni siga.

17Kivei ira na Isireli, na i rairai oqo ni nona i ukuuku na Kalou ko Jiova sa tautauvata kei na dua na bukawaqa katakata sa kama tiko ena dela ni ulunivanua.

18Sa qai cabe cake ki na Ulunivanua o Saineai o Mosese, ka sa vakarugui koya na o. A sa tiko voli kina me 40 na siga ka 40 na bogi.