1Ena i ka va ni yabaki a tui Juta kina o Jioiakimi na luve i Josaia, a taura kina o Jeremaia e dua na i tukutuku mai vei Jiova me baleti ira kece na lewe i Juta. Sa i koya talega o ya na i matai ni yabaki a tui kina mai Papiloni o Nepukanesa.
2A tukuna o Jeremaia vei ira kece sara na kai Juta kei ira kece na lewe i Jerusalemi:
3Ena loma ni ruasagavulu katolu na yabaki, mai na i katini katolu ni yabaki sa tui kina e Juta o Josaia na luve i Amoni me yacova na siga edaidai e a vosa kina vei au ko Jiova, ka'u sa ia tikoga na tukuna vei kemuni na nona vosa. Ia o ni a sega sara ni bau kauwaitaka.
4O ni sega ni via vakarorogo se kauwaitaka, veitalia ga na nona talai ira mai vei kemuni na nona parofita na Turaga.
5Era tukuna vei kemuni mo ni gole tani mai na nomuni gaunisala ca kei na nomuni veitovo ca, me na rawa ni o ni na tiko kina ena vanua a solia ko Jiova vei kemuni kei ira na nomuni qase.
6Era tukuna vei kemuni mo ni kakua ni sokalou se qarava na veikalou tani ka kakua ni vakacudruya na Turaga ena nomuni sokalou ki na veimatakau o ni cakava. Kevaka o ni talairawarawa vei Jiova, ena sega ni totogitaki kemuni.
7Na Turaga sara ga vakataki koya e kaya ni o ni bese ni vakarorogo vua. Ia o ni sa vakacudruya na Turaga ena nomuni matakau, ka sa vakavuna me yaco kina vei kemuni na ka ca.”
8Ia a kaya na Turaga ko Jiova ni lewevuqa, “Ni o ni sa bese ni vakarorogo ki na noqu vosa,
9Au sa na talai ira mai na veimatatamata kece mai cake, vaka ki na vualiku kei na noqu dauveiqaravi o Nepukanesa na tui Papiloni. Au na kauti ira mai na veimatanitu o ya me ra vala kei na matanitu oqo kei ira na lewena, kei na veimatanitu voleka.
10Au na vagaluya na domo ni nodra reki kei na marau vata kei na rorogo ni vude ena soqo ni vakamau. Ena sega na waiwai ni nodra cina, ka oti vakadua na sila.
11Na vanua taucoko oqo ena rusa ka lala tu. Era na la'ki qaravi tui Papiloni na veimatanitu oqo me vitusagavulu na yabaki.
12Ni oti na vitusagavulu na yabaki o ya, au na qai totogitaka na tui Papiloni kei na nona vanua ena vuku ni nodra i valavala ca. Au na vakarusa na nodra matanitu ka laiva me rusa tu me tawa mudu.” Sa kaya ko Jiova.
13A na vakayacora ena vanua o ya na ka kece au a kaya, na ka kece e volai tu ena i vola oqo, na ka kece e a vosataka o Jeremaia me baleti ira na veimatanitu oqo.
14E vuqa na matanitu kei na so na tui qaqa era na vakabobulataki ira, ia au na sauma lesu vei ira na veika era cakava.”
Vakatauca na Totogi na Kalou15A tukuna vei au na Turaga ko Jiova na nodra Kalou na Isireli, “Oqo e dua na bilo ni waini sa sinai ena noqu cudru. Kauta ka la'ki vagunuvi ira kece kina na veimatanitu au sa talai iko kina.
16Ena gauna era sa na gunuva kina, era sa na qai yamekemeke, ka na yali na yalodra ena vuku ni valu au sa tala yani vei ira.
17Ia, au sa qai taura na bilo mai na ligana na Turaga ka vagunuvi ira kina na veimatanitu kece sa talai au kina na Turaga me ra gunuva.
18O Jerusalemi kei na veikoro kei Juta, vata kei ira na kena tui kei na kena i liuliu, me yaco kina me na dua na vanua lala, e dua na vanua rairai vakaloloma ka vakarerevaki, me dua na ka ni veimaduataki; sa vaka tu o ya ena siga oqo.
19Oqo na yacadra o ira kece me ra gunu mai na bilo kei ira era veiliutaki e Ijipita.
20O ira kece na tui ena vanua o Usu
Kei ira na tui ena nodra vanua na kai Filisitia
mai Esikiloni, kei Qasa, kei Ekironi
kei ira na vo-ni-bula ni Esitoti;
21O ira kece na tamata mai Itomi, Moapi kei Amoni,
22O ira kece na tui mai Taia kei Saitoni,
O ira kece na tui ni vanua Wasa Meditereni.
23Na veikoro mai Titani, Tima, Pusa,
O ira kece na tamata koti vakalekaleka na drau ni uludra,
24O ira kece na tui mai Arapea,
O ira kece na tui ena vanua dravuisiga,
25O ira kece na tui Simirai,
Ilama kei Mitia,
26O ira kece na tui
Mai na vualiku ra voleka ka yawa vakaveitaravi.
Na vanua kece e dela i vuravura era a gunu mai kina. Na tui Papiloni me kena i otioti me gunu mai kina.
27A qai kaya vei au ko Jiova, “Tukuna vei ira na tamata ni oi au na Kalou Qaqa na Kalou ni Isireli, ni'u sa vakarota me ra gunu, mateni ka lua, me yacova sara ni ra sa lutu ki ra, ka sega ni rawa ni tucake tale me baleta na i valu au sa tala yani vei ira.
28Ia kevaka era cata ni taura na bilo mai ligamu ka gunu mai kina, ia mo tukuna vei ira na Kalou Qaqa sa kaya me ra gunu ga mai kina.
29Au na tekivuna na cakacaka ni veivakarusai ena noqu koro turaga. Era nanuma ni ra na lako sega ni na totogitaki? Sega, era na totogitaki ni'u na kauta tiko yani na i valu vei ira kece sara na tamata e vuravura. Au, sa vosa, oi au na Kalou Qaqa.
30O iko Jeremaia
Mo kacivaka na veika kece au sa kaya.
Mo kaya vei ira kece na tamata oqo,
‘Ena kaci vakadomoilevu mai lomalagi na Kalou
Me vaka na kurukuru ena veivanua cecere kei lomalagi.
Ena qolou vakadomoilevu vei ira na nona tamata,
Ena vakatudomo me vaka e dua na tamata daubutu qerepi.
Era na rogoci koya kece e vuravura.
31Ena rorogo na kena voqa
Mai na i yalayala kei vuravura,
Sa beitaki ira na veimatanitu ko Jiova
Ka na veilewaitaki ira o koya;
Ia o ira na totogi era na vakamatei.
Sa i Jiova ga sa kaya oqo.
32Na Turaga na Kalou Qaqa
Sa kaya ni na yaco na leqa
Ki na veimatanitu yadudua,
Ni dua na cagilaba levu
Ena tubu mai na i yalayala kei vuravura.
33Ena siga o ya,
Na yagodra na tamata mate ka vakamatei ira ko Jiova,
Ena ceburaki tu ena veiyasai vuravura kecega.
Ena sega ni dua e tagicaki ira,
Ena sega ni ka'u na yagodra me la'ki bulu.
Era na biu tu me vaka na i benubenu.
34Dou tagi na i liuliu,
Dou tagi ena domo levu
Oi kemudou na i vakatawa ni noqu tamata.
Dou tiko vakaloloku ka vakatoqiqi ena qele.
Sa yaco mai na gauna mo ni vakamatei kina,
O ni na vakamatei me vaka na me.
35Ena sega ni dua na vanua o ni na dro bula kina.
36O ni na rarawa
Ka tagi ni sa vakarusa ko Jiova na nomuni vanua.
37Na nomuni tiko sobu ena galu,
Ena vuku ni cudru i Jiova.
38Sa laivi ira na nona tamata ko Jiova
Me vaka na laione sa biuta na nona qara.
Na vakadomobula ni valu kei na cudru i Jiova
Sa vakarusa na vanua me dravuisiga.
Who We AreWhat We EelieveWhat We Do
2025 by iamachristian.org,Inc All rights reserved.
