2 VEIGAUNA 5 - Ai Vola Tabu Ena Vakavakadewa Vou（FNV）

1 2Samu 8.11; 1Vei 18.11 A vakacavari vakavinaka na veicakacaka kece ka a cakava o Solomoni ena vale i Jiova. A kauta ki loma ni vale tabu o Solomoni na veika a vakatabuya o Tevita na tamana, ka maroroya tu me vaka na siliva, na koula, kei na veiyaya kecega a la'ki biu ena valeniyau ni vale ni Kalou.

Curu ki Loma na Kato ni Veiyalayalati

2 2Samu 6.12-15; 1Vei 15.25-28 A qai vakasoqoni ira vata na nodra qase na Isireli o Solomoni, ira kece na turaga ni veimataqali, ira sa liu vei ira na nodra qase na Isireli, ki Jerusalemi, me ra la'ki kauta cake mai na Kato ni Veiyalayalati i Jiova mai na koro i Tevita, o ya o Saioni.

3Era a soqoni vata vua na tui o ira kecega na Isireli ena solevu ka dau vakayacori ena i kavitu ni vula.

4Era a lako kece mai na nodra qase na Isireli; ka ra laveta cake na Kato ni Veiyalayalati o ira na Livai.

5Era a kauta cake na Kato, kei na Vale ni Veitavaki, kei na veiyaya tabu kecega ka ra tiko kina; era a kauta cake na bete kei na Livai.

6A tu ena mata ni Kato ni Veiyalayalati o Solomoni na tui kei ira na i soqosoqo taucoko na Isireli ka ra a soqoni vata yani vua, me ra vakacabora na sipi kei na bulumakau, ka sega ni tukuni rawa se wili rawa ena vuku ni kedra levu.

7Era a kauta cake na Kato ni Veiyalayalati i Jiova na bete, ka la'ki biuta ena kena i tutu ena loma ni Tikina Tabu Sara, o ya ena ruku ni tabadrau na jerupi.

8Ni rau vakatetaba tu na jerupi, ena vanua sa tu kina na Kato ni Veiyalayalati; rau a vakaruruga na Kato kei na kena i vua ruarua na jerupi.

9E rau a babalavu sara na i vua ruarua, ka raici rawa na muana ruarua mai na Tikina Tabu Sara; ia a sega ga ni raici rawa mai tautuba, ka rau sa tu kina me yacova na siga oqo.

10Vrua 10.5A sega na ka e koto e loma ni Kato ni Veiyalayalati, ia na vatu raraba ruarua ga ka vakatikora kina o Mosese mai na Ulunivanua o Saineai, ena vanua ka a veiyalayalati kina ko Jiova kei ira na Isireli ena nodra a lako tani mai na vanua o Ijipita.

Na Lagilagi i Jiova

11Era sa qai curu mai ki tuba na bete mai na Tikina Tabu. Era sa vakasavasavataki kece sara na beta era tiko e kea, ka sega ni okati kina na nodra dui wasewase.

12O ira kece na Livai era daunisere me vakataki Esava, o Imani, o Jitucuni, kei ira na luvedra kei na wekadra era sa vakaisulu ena i sulu lineni matailalai ka taura na sibali, na api, na soliteri, na lira, ka ra tucake tu ena yasana ki na tokalau ni cabocabonisoro. Era sa cokovata kei na 120 na bete era dauniuvu davui.

131Vei 16.34; 2Vei 7.3; Esera 3.11; Same 100.5; 106.1; 107.1; 118.1; 136.1; Jere 33.11 Lako 40.34,35 A sa duavata na rorogo e rau solia na dauniuvu davui kei ira na daunisere, me ra domo vata ga ena nona vakacerecerei ka vakavinavinaka ko Jiova. Ni sa cokovata na rorogo mai na davui, sibali kei na veivakatagi tale eso, era sa qai tabalaka cake vata na domodra vata ena vakavinavinaka vei Jiova ka lagata:

“Ni sa vinaka o koya,

Ni sa tudei ka tawa mudu na nona loloma,”

A sa qai vakasinaita na Valenisoro e dua na o,

14ka ra sa sega kina ni cakava rawa na nodra cakacaka na bete ena vuku ni o, ni sa vakasinaita na vale ni Kalou na i serau i Jiova.