1A sa kaya ko Jiova,
“Ia oqo ni rogoca mada na noqu tamata na Isireli,
Sa i kemuni na kawa i Jekope na noqu tamata digitaki.
2Oi au ko Jiova au a buli kemuni,
Ka'u a dau vukei kemuni mai na gauna o ni tekivu bula kina.
Ni kakua ni rere; sai kemuni na noqu dauveiqaravi,
Ka noqu matatamata digitaki kau dau lomana.
3Au na solia na wai ki na vanua sa viagunu,
Ka vakadrodroya na veiuciwai ena vanua dravuisiga.
Au na sovaraka na yaloqu vei ira na luvemuni
Kei na noqu veivakalougatataki vei ira na nomuni kawa.
4Era na tubu cake me vaka na veico sa vakasuasuataki
Vinaka kei na kuta ena bati ni veiuciwai.
5Era na dui kaya yadua na tamata, ‘Au sa nei Jiova!’
Era na lako mai me mai duavata kei ira na Isireli.
Na tamata yadua ena vakatakilakilataka na ligana,
Ena yaca ni Turaga, ka okata me dua na tamata ni Kalou.
6 Aisea 48.12; Vtaki 1.17; 2.8; 22.13 A sa kaya ko Jiova na tui kei Isireli
Na Turaga kaukauwa, na kena i Vakabula.
Oi au na kena i vakatekivu kei na i vakataotioti,
Na Kalou taudua ga;
Sa sega tale ni dua na Kalou,
Oi au taudua ga.
7O cei sa tautauvata kei au? Ia me ra tucake mai,
Me ra vakaraitaka ka biuta e mataqu.
O cei e a vakaraitaka mai na i vakatekivu
Na veika ena yaco mai e muri?
Me tukuna mai vei keda na veika e vakarau yaco mai.
8Ni kakua ni rere na noqu tamata.
Au a sega li ni tukuna vei kemuni mai na i vakatekivu
Na veika ena yaco?
Sa i kemuni na noqu i vakadinadina.
E dua tale tiko li na Kalou?
E sega tale ni dua na i karua ni dauveibuli au kila?
9Era tawa yaga o ira kece era dau caka matakau,
Ka tawa yaga na matakau era cakava.
O ira era qarava na veikalou oqo
Era mataboko, lecaika ka ra na vakamaduataki.
10Sa sega sara ni vinaka
Me ceuti e dua na matakau
Me qaravi me vaka e dua na kalou.
11O ira kece era qarava na matakau
Era na vakamaduataki
Ka ni ra sa tamata ga o ira era cakava na matakau.
Me ra lako vata mada mai me ra mai lewai,
Era na vakarerei ka vakamaduataki.
12Sa taura e dua na tiki ni kaukamea na dautuki kaukamea ka biuta ki na dela ni buka ka tukilaka yani ena nona i tuki levu, me buli kina na kena i bulibuli. Ni sa cakacaka voli, a sa qai viakana, ka viagunu ka sa oca.
13Sa vakarautaka e dua na kau na matai. Sa mai droinitaka yani na kena i yaloyalo ena peni, a sa qai siviraka yani ena nona i yaya vakamatai, ka bulicaka me vaka na tamata totoka, ka qai la'ki biuta ena nona vale.
14Ena taya sobu beka e dua na sitari se digia e dua na oki se damanu mai na veikau. Se ena tea e dua na sitari ka na qai waraka na uca me vakabula.
15E dua na tamata e vakayagataka ena tiki ni dua na kau me buka ka qai vakayagataka e dua tale na tikina me cakava kina e dua na matakau. Eso na tiki ni kau e vakayagataka me buka me tatalai kina ka vavi madrai talega kina. Ia sa qai vakayagataka e dua tale na tikina me cakava kina e dua na matakau me vakalou kina.
16Sa vakayagataka eso na tiki ni kau me waqaca kina e dua na buka. A sa tavuna kina eso na lewe ni manumanu ka kania, ka mamau. Sa tatalai talega kina ka kaya, ‘Au sa katakata vinaka sara! Sa dua na buka vinaka.’
17Ia sa qai cakava e dua na matakau ena vo ni kau vata ga o ya, ka cuva sobu ka qarava. A sa masuta ka kaya, ‘Sa i kemuni na noqu kalou ni vakabulai au.’
18Era sa rui lialia sara na tamata vaka o ya; era sa sega ni kila na ka era cakava tiko. Era sa tabonaka na matadra ka sogota nodra vakasama ki na dina.
19O koya sa cakava na matakau sa sega ni kila se vakasamataka rawa ka kaya, ‘Eso na tiki ni kau au a vakama. Au a vavi madrai ena kena qilaiso, ka tavu lewe ni manumanu kina ka kania. Ia mai na vo ga ni kau o ya, au a qai cakava kina e dua na matakau. Au sa cuva tiko oqo ka vakalou ki na dua na tiki ni kau!’
20Sa kana dravusa o koya. Na nona i tovo ni vakasama sesewa sa vakacalai koya ka sega ni rawa ni sereki mai kina. Sa sega ni raica rawa o koya ni sa ka lasu na matakau sa qumia tiko e ligana.”
Ko Jiova, na Dauveibuli kei na i Vakabula21A sa kaya ko Jiova,
“Ni nanuma mada na veika oqo Isireli.
Ni nanuma ni o ni sa noqu dauveiqaravi.
Au a buli kemuni mo ni noqu dauveiqaravi
Ka'u na sega sara ni guilecavi kemuni.
22Au a sa taviraka tani na nomuni valavala ca me vaka na o.
Ni lesu tale mai vei au, oi au ga au na vakabulai kemuni.
23Ni kaila ena marau na lomalagi!
Ni kaila na veivanua titobu e vuravura!
Ni kaila ena marau na veiulunivanua
Kei na kau yadua ni veikau!
Sa vakabulai ira na nona tamata na Isireli ko Jiova,
Ka sa vakaraitaka na nona qaqa.
24Oi au ko Jiova, o koya ka buli kemuni,
Ka nomuni i Vakabula.
Oi au ko Jiova o koya sa bulia na ka kecega.
Oi au taudua ga au a tevuka na lomalagi,
Ena gauna au a bulia kina na vuravura
Ka sega ni dua e vukei au kina.
25 1Kori 1.20 Au sa vakalialiai ira era dautukuna
na veika ena yaco mai
Ka vakacacana na nodra yalayala na daurairai.
Au sa vakalasuya na nodra vosa na vuku.
26Ia ni sa yalataka e dua na ka na noqu dauveiqaravi
Ka'u tala na noqu i talai me tukuna na noqu i naki
Au na vakayacora sara me ra yaco dina.
Au a tukuna ki Jerusalemi
Ni ra na bula tale kina na tamata,
Ka tara cake tale na koro oqo mai na kena rusa.
27Oi au, au a kaya ki na wasawasa me mamaca;
Au na vakamacara talega na veiuciwai.”
28 2Vei 36.23; Esera 1.2 Au na kaya ena vuku i Sairusi,
Sa i koya na noqu i vakatawa,
Ka na vakayacora kece na noqu i naki.
O na vakarota me tara tale o Jerusalemi,
Ka caka tale na yavu ni Valenisoro.
Who We AreWhat We EelieveWhat We Do
2025 by iamachristian.org,Inc All rights reserved.
