VOSA VAKAIBALEBALE 30 - Ai Vola Tabu Ena Vakavakadewa Vou（FNV）

1Sa i koya oqo na veivosa i Akuri na luve i Jake.

Sa sega ni tiko kei au na Kalou, sa sega ni tiko kei au,

Ka'u sa malumalumu sara.

2Au sa vaka na manumanu ka sega ni vaka na tamata;

Sa sega ni tu vei au na vakasama vakatamata.

3Au sega ni vulica e dua na vuku,

Ka'u sa sega ni kila e dua na ka me baleta na Kalou.

4O cei sa bau lako cake ki lomalagi se lesu sobu tale mai?

O cei sa vesuka rawa na cagi e ligana?

Se sa ologa rawa na wai ena i sulu?

Se sa bulia na i yalayala kei vuravura?

O cei o koya, kevaka o sa kila? O cei na luvena tagane?

5Sa dau vakayacora na Kalou na ka kecega sa yalataka. Sa vaka e dua na i seleiwau o koya vei ira era vakasaqara na nona veitaqomaki.

6Kevaka o tukuna ni a tukuna o koya e dua na ka sa sega ni cavuta, ena vunauci iko, ka na laurai talega ni o tamata lasulasu.

Ai Kuri ni Vosa Vakaibalebale

7Au sa kerea vei kemuni na Kalou e rua na ka ni bera ni'u mate:

8ni vukei au me kau tani vei au na i tovo tawa dodonu kei na vosa lasu; ni lesi au me'u kakua ni vutuniyau se dravudravua; ia ni vakani au ga ena kequ i votavota madrai ni veisiga.

9De'u na qai mamau ka kaya, O cei oi kemuni Jiova. Ia ke'u na dravudravua, au na qai mani butako ka vakavuna me beci na noqu Kalou.

10Kakua ni vakalewa e dua na tamata dauveiqaravi vua na nona turaga, O na qai cudruvi ka sota kaya kina na ka rarawa.

11Sa tu eso na tamata era vosacataka na tamadra ka ra sega ni vakavinavinaka vei ira na tinadra.

12Sa tu eso na tamata era sa nanuma era sa savasava, ia era sa sega ni savasava mai na nodra dukadukali.

13Sa tu eso na tamata era nanuma ni ra sa vinaka, era nanuma ni ra sa vinaka sara.

14Eso na tamata era sa rawata ena sala kaukauwa na veika era rawata mai vei ira na dravudravua kei ira na vakaloloma, ka sai koya o ya na sala era bula tu kina.

15Sa lewe rua na luvena yalewa na kutu ni ose, ka yacadrau ruarua o Solia mai vei au!

E va na ka sa sega ni ra vakacegui rawa:

16na nodra vuravura na mate,

na yalewa sa sega ni vakaluveni,

na qele mamaca sa gadreva na uca,

kei na bukawaqa sa sega ni bokoci rawa.

17Na tamata sa vakalialiai tamana se beci tinana ni rau sa qase sara e dodonu me na kanilaki na yagona mai na manulevu se me tokia tani na yaloka ni matana ruarua na reveni kila.

18E va na ka sa veivakurabuitaki dina vei au me'u kila rawa:

19na vuka ni ikeli ena maliwa lala,

na i dolodolo ni gata ena dela ni vatu,

na soko ni waqa ena dela ni wasawasa,

kei na dodomo nei tagane vua na goneyalewa.

20Sa vakaoqo na nona i valavala na yalewa vakawati sega ni yalodina: a sa ia na veibutakoci, a sa sisili, ka sa qai kaya, “Ia au sa sega sara ni cakava e dua na cala!”

21E va na ka sa sega ni lako curuma rawa o vuravura:

22na bobula ka sa yaco me tui,

na tamata yalowai sa tu vua na ka kece e via kania,

23na yalewa daucati ka sa qai vakawati,

kei yalewa meimei sa taura na i tutu ni nona marama.

24E va na manumanu e vuravura eratou sa lalai, ia eratou sa vuku sara:

25Na kadi: era manumanu malumalumu, ia era sa kumuna vata na kedra kakana ena vula i katakata.

26Na ravete ni veivatu: era sega soti ni kaukauwa talega, ia era sa tara na nodra i tikotiko ena vanua veivatu.

27Na vodre: sa sega na nodra tui, ia era sa tuva ga vaka e dua na mataivalu ni ra sa veitosoyaki.

28Na moko: sa rawa mo qumia e dua e ligamu, ia o na rawa ni la'ki kunei ira sara ena valenitui.

29E va na ka sa totoka ni saravi na nodratou i lakolako:

30na laione, sa kaukauwa taudua vei ira na manumanu ka sega ni rerevaka e dua;

31na me tagane,

na toa tagane

kei ira na tui ni ra duri tu e matadra na nona tamata.

32Kevaka o sa yalowai dina sara ka yaco mo viavialevu ka nakita na ka ca, wawa mada ka vakasama tale mada!

33Kevaka o qaqia na sucu, o na rawata mai kina na bata. Kevaka o mokuta na ucuna e dua, ena dra mai. Kevaka o vakayavalata na cudru, o na leqa ga kina.