1A sa vola o Jeremaia e dua na i vola vei ira na vo ni liuliu era tiko maliwai ira na bobula, ka vakakina vei ira na bete, na parofita kei ira kece sara na tamata e a kauti ira vakabobula o Nepukanesa mai Jerusalemi ki Papiloni.
2E a vola ni a biuti Jerusalemi o Jioiakini na tui kei na tinana na tui, kei ira na vakailesilesi ena valenitui, o ira na turaga e Juta kei Jerusalemi, vata kei ira na dautuki kaukamea.
3A talai rau o Elasa na luve i Safano kei Kemaria na luve i Ilikaia o Setekaia na tui Juta me rau lako vua na tui Papiloni o Nepukanesa ka kauta na i vola. Sa vakaoqo:
4Sa kaya vakaoqo ko Jiova na Qaqa, na nodra Kalou na Isireli vei ira kece na tamata e a lewa me kauti ira vakabobula o Nepukanesa mai Jerusalemi ki Papiloni.
5Ni tara na nomuni veivale ka tiko kina. Ni tea na nomuni teitei ka kania na veika o ni tea kina.
6Ni vakawati ka vakaluveni, me ra veimusumusuki ka vakawati na luvemuni ka me ra vakaluveni talega. Mo ni tubu mo ni lewe vuqa ka kakua ni lailai sobu.
7Ni cakacaka me baleta na toro cake ni vanua au sa lewa mo ni lako kina vakabobula. Ni masu vei Jiova ena vukuna, baleta na kena toro cake, ka ni o ni na toro cake talega kina.
8A sa kaya na Turaga Qaqa na nodra Kalou na Isireli, ni qarauna mo ni kakua ni vakacalai mai vei ira na parofita era tiko kei kemuni se mai vei ira tale eso na daurairai era kaya ni rawa ni ra parofisaitaka na veika ena yaco mai muri. Ni kakua sara ni kauwaitaka na nodra tadra.
9Era sa tukuna vei kemuni na veika lasu ena yacaqu. Au a sega ni talai ira yani. Sa i au ga ko Jiova sa tukuna oqo.”
10A sa kaya ko Jiova, “Ni sa oti na vitusagavulu na yabaki mai Papiloni, au na qai sikovi kemuni ka vakayacora na ka au sa yalataka, o ya, me'u kauti kemuni lesu tale ki na nomuni vanua.
11Sa i au taudua ga au sa kila na noqu i naki ena vukumuni, na noqu i naki mo ni tiko vinaka me vaka o ni sa nuitaka me na yaco mai muri.
12Ia ni o ni kacivi au o ni na lako mai ka masu vei au, au na rogoci kemuni.
13O ni na vakasaqarai au, ia o ni na kunei au kevaka o ni vakasaqarai au ena yalomuni taucoko,
14Au na laivi kemuni mo ni kunei au, sa kaya ko Jiova, ka'u na qai vakalesuya vei kemuni na nomuni kalougata ka kumuni kemuni vata mai na veivanua ka'u a vakasavi kemuni kina. Ka'u na kauti kemuni lesu ki na veivanua au a kauti kemuni vakavesu mai kina.”
15O ni a kaya, sa solia vei kemuni ko Jiova eso na parofita mai Papiloni.
16Sa i koya oqo na ka a kaya ko Jiova me baleta na tui sa tiko ena i dabedabe vakatui nei Tevita kei ira na tamata ena koro oqo, sai ira na wekamuni era sega ni kau vakabobula ki Papiloni vata kei kemuni.
17A sa kaya na Turaga Qaqa, ‘Au na kauta mai vei ira na i valu, na viakana kei na mate ca. Au na cakava me ra vaka na lolo sa luca ka sa sega ni rawa ni laukana.
18Au na vakasavi ira ena i valu, na viakana kei na mate ca ka ra na rere na veimatanitu kecega e vuravura ena ka era raica. Era na kidroa ka rere na tamata ena ka e yaco vei ira ena veivanua kece au sa veibiuyaki ira kina. Era na vakalialiai ira ka vakayagataka na yacadra me veivakamaduataki.
19Oqo na ka ena yaco vei ira, baleta ni ra sega ni muria na noqu vosa au sa talai ira tikoga yani kina na noqu parofita me ra tukuna,’ sa kaya ko Jiova.
20Vei kemuni kece na tamata au a soli kemuni me kauti kemuni tani vakabobula na tui Papiloni mai Jerusalemi, ni rogoca mada na ka a kaya ko Jiova.’
21Sa tukuna na Turaga Qaqa me baleti rau o Eapi na luve i Kolaia kei Setekaia na luve i Mesia, oi rau a tukuna na veika lasu vei kemuni ena yacaqu. Sa tukuna ni sa soli rau vei Nepukanesa na tui Papiloni o koya ena vakamatei rau ena matamuni.
22Ena gauna era dau vinakata kina na tamata era a kau vakabobula mai Jerusalemi ki Papiloni me yaco e dua na ka ca vua e dua na tamata, era dau kaya, ‘Me vakayacora mada ga vei iko ko Jiova me vakataki rau o Setekaia kei Eapi oi rau a tavuni rau bulabula na tui Papiloni ena buka!
23Ni sa ka ca sara e Isireli na ka e rau cakava. E rau sa ia na veibutakoci kei na watidra na wekadra na wekadrau ka vosataka na veika lasu au sega ni talai rau kina ena yacaqu. Au sa kila; ka'u rawa ni vakadinadina kina,’ sa kaya ko Jiova.
Vola i Semaia24“Jeremaia, mo tukuna vei Semaia mai Neilami,
25‘Sa kaya vakaoqo ko Jiova na Qaqa na nodra Kalou na Isireli: O a vola mai eso na i vola ena yacamu ga vei ira kece na tamata e Jerusalemi kei Sefanaia na luve i Mesia na bete kei ira kece na bete. E vakaoqo na veika o a vola mai.
26Sa lesi iko ko Jiova mo bete mo sosomitaki Jioiata, o sa bete i liuliu ena Valenisoro, sa nomu i tavi mo raica na tamata lialia kece era nanuma ni ra parofita me ra vesu ena sinucodo vata kei na dua na i vua kaukamea e domona.
27A cava o sega ni vunauci Jeremaia kina na kai Anacoci sa parofisai tiko vei ira na tamata?
28A talatala mai o koya vei keimami ki Papiloni ka kaya, ‘Ena dede na nomuni tiko mai Papiloni: ni tara na nomuni veivale ka tiko kina, ni tea na nomuni teitei ka kania na ka e bula kina.’ ”
29A sa wilika na i vola o Sefanaia na bete vei Jeremaia.
30A qai kaya ko Jiova vei Jeremaia:
31Mo talatala vei ira kece sara na tiko vakabobula ka tukuna na ka e tukuna ko Jiova me baleti Semaia vei kemuni; ia au sa sega ni talai koya yani, ka sa vakavuna mo ni vakadinata na veika lasu.
32O koya oqo sa kaya kina ko Jiova: ‘Au na totogitaki Semaia na kai Neilama kei ira na nona kawa. Sa na sega na nona kawa me na bula kei kemuni ka sa na sega ni bula tiko me na raica na veika vinaka au na vakayacora vei ira na noqu tamata baleta ni sa tukuna vei ira me ra saqati au.’
Who We AreWhat We EelieveWhat We Do
2025 by iamachristian.org,Inc All rights reserved.
