JOSUA 4 - Ai Vola Tabu Ena Vakavakadewa Vou（FNV）

Tuva na Vatu ni Vakananumi

1Ni ra lako kosova na uciwai na Joritani o ira na lewe ni matanitu taucoko o Isireli, a qai vosa vei Josua ko Jiova ka tukuna,

2“Mo digitaka e lewe tinikarua na tamata, me ra yadua mai na veimataqali,

3ka vakaroti ira me ra la'ki kauta mai e tinikarua na vatu mai na lomadonu ni Joritani donuya na vanua era sa duri tu kina na bete. Me ra colata voli na vatu oqo ka la'ki biuta ena vanua o ni na la'ki keba kina ena bogi nikua.”

4A sa kacivi ira na lewe tinikarua na tamata ka sa digitaka oti tu o Josua,

5ka tukuna vei ira, “Mo dou lako ki na Joritani, ka liutaka na Kato ni Veiyalayalati i Jiova na nomuni Kalou ki na loma ni Joritani. Mo dou dui taura e yadua na vatu ka colata mai ena vuku ni mataqali yadua e Isireli.

6Na veivatu kece oqori era na vakananuma kina na Isireli na ka sa vakayacora ko Jiova ena veisiga mai muri; era na taroga vei kemuni o ira na luvemuni na i balebale ni veivatu oqo,

7o ni na qai tukuna vei ira ni a mudu na drodro ni wai ena Joritani ni a takosova na uciwai na kato ni veiyalayalati i Jiova. Na veivatu oqo ena vakananumi ira tiko na Isireli kecega me ra kakua sara ni guilecava na ka a yaco e kea ena siga o ya.

8E ratou sa qai vakayacora na lewe tinikarua me vaka a vakarota o Josua. E ratou a kauta mai na loma ni Joritani e tinikarua na vatu me vaka na i wiliwili ni mataqali e Isireli, me vaka a tukuna vei Josua ko Jiova, ka colata yani ki nodra keba ka biuta kina.

9A sa qai tuvana cake talega o Josua e tinikarua na vatu ena lomadonu ni Joritani, ena vanua era a tucake tu kina o ira na bete era colata tiko na Kato ni Veiyalayalati. (Sa tu ga e kea na veivatu o ya me yacova edaidai.)

10Era sa tu ga vakadua na bete era colata tiko na Kato ni Veiyalayalati ena lomadonu ni Joritani, me yacova sara ni ra a vakayacora na Isireli na veika a vakarota vei Josua ko Jiova, me vaka a tukuna vei Josua o Mosese. Era sa kusa rawa na Isireli me ra takoso.

11Ia ni ra takoso kece, era sa qai colata na kato ni veiyalayalati na bete ka liutaki ira yani na Isireli.

12O ira na tagane ena mataqali i Rupeni, Kata kei na veimama ni mataqali i Manasa, era sa vakaiyaragi ni valu ka liutaki ira na Isireli ena takoso, me vaka a vakaroti ira kina o Mosese.

13Sa rauta ni ra lewe 40,000 na tamata sa vakarautaki ki na i valu era sa takoso ki tai kadua ena mata i Jiova, ki na veibuca kei Jeriko me ra la'ki valu kina.

14Ena veika sa vakayacora ko Jiova ena siga o ya, a sa vakalevulevui ka dokai sara kina o Josua ena matadra kecega na Isireli. Era sa dokai koya ena gauna kece ni nona bula, me vaka ga a dau vakayacora vei Mosese.

15A sa qai vosa vua ko Jiova ka kaya,

16Mo vakaroti ira na bete era colata tiko na Kato ni Veiyalayalati me ra cabe mai na Joritani.”

17A sa qai vakaroti ira na bete o Josua me ra cabe mai na Joritani.

18Ni ra cabe ki tai ka dua na bete, sa qai vakatekivu me drodro tale na wai ni uciwai na Joritani, ka la'ki vuabale kina na batina ruarua me vaka ga e liu.

19Era sa lako kosova ka cabe ki na tai kadua ni Joritani na Isireli ena i katini ni siga ena i matai ni vula, ka ra la'ki vakaitikotiko e Kilikali ena tokalau kei Jeriko.

20Sa qai tuvana e kea o Josua e tinikarua na vatu a kau mai na Joritani.

21A sa vosa vei ira na Isireli o Josua ka tukuna, “Ena gauna mai muri ni ra sa tarogi kemuni o ira na nomuni kawa me baleta na i balebale ni vatu oqo,

22mo ni tukuna vei ira na veika a yaco ena gauna era kosova kina o ira na Isireli na Joritani ena qele mamaca.

23Mo ni tukuna vei ira ni a vakamamacataka na wai ni Joritani ko Jiova na nomuni Kalou ena vukumuni me yacova na nomuni sa yaco kece ki tai kadua, ka oqo me vaka na nona a vakamamacataka na Wasa Damudamu ena vukuda.

24Ena vuku ni ka oqo, era na kila kina na lewe i vuravura kecega na kaukauwa ni liga i Jiova, ka o ni na qai vakarokorokotaka na nomuni Kalou ko Jiova ka tawa mudu.”