SAME 72 - Ai Vola Tabu Ena Vakavakadewa Vou（FNV）

A Masu me Baleta na TuiA nei Solomoni.

1Ni vakavulica na tui me lewa dodonu, oi kemuni na Kalou;

Ni qai vota vakakina na nomuni caka dodonu vua na luvena.

2Me na lewai ira kina na nomuni tamata ena lewa dodonu,

Ka liutaki ira na dravudravua ena yalododonu.

3Me marautaka na vanua na sautu,

Ka vakila na yalododonu.

4Me vakatulewa vakadodonu na tui vei ira na dravudravua,

Ka vukei ira era leqa tu,

Ka vakadrukai ira era dauveivakararawataki.

5Me ra cuva ga vei kemuni ni se cila tikoga na matanisiga,

Ena gauna kecega ni cila ni vula, ena veitabatamata kecega.

6Me na vaka na uca e tauca na veibuca o koya na tui,

Ka vaka na mata ni uca e tauca na dela ni vanua.

7Me tubu vakalevu na yalododonu ena nona gauna,

Ka tudei na tiko sautu me yacova na gauna

Ena qai takali kina vakadua na vula.

8 Saka 9.10 Na nona matanitu ena tekivu mai na dua na wasawasa

ka yaco yani ki na wasawasa ka dua;

Me na tekivu mai na uciwai na Uferetisi

ka yaco yani ki na i yalayala kei vuravura.

9Era na cuva sobu e matana

o ira era tiko ena vanua dravuisiga,

Ka ra na kolotaki ira vakai ira ga na nona meca ki na qele.

10Era na soli loloma vua na tui Sipeni

kei ira na tui mai na veiyanuyanu,

Ka rau sa kauta mai na nodra ka ni loloma

na tui Arapea kei na tui Eciopea.

11Era na cuva kece vua na tui,

Ka ra na qaravi koya kece na veimatanitu.

12Sa vakabulai ira kece na dravudravua era sa tagi vua,

Kei ira era leqa ka sega ni kauwaitaki.

13Sa lomani ira na malumalumu kei na dravudravua o koya,

Ka vakabulai ira era leqa tu.

14Sa vakabulai ira mai na veivakararawataki kei na i tovo kaukauwa;

Sa ka talei vua na nodra bula.

15Me bula balavu o koya na tui!

Me soli vua na koula mai Arapea;

Me vakacabori na masu ena vukuna ena gauna kecega.

16Me sautu sara na vanua ena sila,

Ka robota na veidelana na i teitei;

Me vuavuai vinaka me vaka na i teitei mai Lepanoni.

Me sinai na veikorokoro ena tamata,

Me vaka na co era sa tubu voli ena loma ni veibuca.

17Me kakua sara ni guilecavi na yacana,

Ka tudei na nona rogo me yacova na takali ni matanisiga.

Me ra vakacaucautaki koya na veimatanitu kecega,

Me ra masuta na Kalou na tamata kecega me vakalougatataki ira;

Me vaka na nona vakalougatataki koya na tui.

18Me vakacaucautaki ko Jiova, na Kalou ni Isireli,

O koya ga sa cakava na cakacaka veivakurabuitaki!

19Me vakacaucautaki na yacana dokai ka sega ni mudu,

Ka me vakasinaiti na vuravura taucoko na nona lagilagi.

Emeni! Emeni!

20Oqo na i tinitini ni masu i Tevita na luve i Jese.