SAME 3 - Ai Vola Tabu Ena Vakavakadewa Vou（FNV）

Dinata na Kalou ena Gauna DredreA Same i Tevita, ni sa drotaki Apisalome na luvena.

1Oi kemuni Jiova, era sa lewe levu sara na kequ meca,

Ka lewe vuqa era saqati au.

2Era sa veivosakitaki au ka kaya,

“Ena sega ni vukei koya na Kalou.”

3Ia oi kemuni Jiova, o ni sa noqu i sasabai;

O ni solia vei au na qaqa,

Ka dau vakayaloqaqataki au.

4Ni'u sa tagi ga vei Jiova ena domolevu,

Ka sa rogoci au mai na nona ulunivanua tabu.

5Au sa davo sobu ka moce,

Ka sa maroroi au voli ko Jiova ena bogi taucoko.

6Au sa sega ni rerevaki ira na udolu vakaudolu na meca

Era sa vakavolivoliti au.

7Mo ni mata cake, i Jiova!

Ni vakabulai au mada, oi kemuni na noqu Kalou!

Ni vakaramusutaka na galegaledra na kequ meca

Ka vorolaka na batidra na tamata ca.

8Sa lako ga mai vei Jiova na qaqa.

Me qai sobuti ira na nomuni tamata

na nomuni veivakalougatataki.