VAKARUA 34 - Ai Vola Tabu Ena Vakavakadewa Vou（FNV）

Na Mate nei Mosese

1A sa cabe cake o Mosese mai na veibuca kei Moapi ki na Ulunivanua o Nipo, ka yacova na tikina cecere e Ului Pisika, ena tokalau kei Jeriko. A vakaraitaka vua ko Jiova mai kea na vanua taucoko mai Kiliati me yaco sara ki Tani,

2na vanua taucoko o Navitalai na vanua i Ifereimi kei Manasa, na vanua i Juta me yaco sara ki na Wasa Meditereni;

3na ceva kei Juta kei na buca me yaco sara ki Jeriko, na koro ni veiloga niusawa.

4A qai kaya ko Jiova vei Mosese, “Sai koya oqo na vanua au a yalataka vei Epara-ama, kei Aisake, kei Jekope me'u solia vei ira na nodratou kawa. Au sa na solia wale ga mo raica, ia o na sega ga ni lako takoso mo yaco kina.”Vteki 12.7; 26.3; 28.13

5A mate mai kea o Mosese; ena vanua o Moapi me vaka na ka a kaya ko Jiova.

6A qai buluti koya mai kea ko Jiova ena buca mai Moapi veidonui kei na koro o Peci-piori. Ia me yacova mai edaidai, e sega ni dua e kila na vanua dina sa bulu kina.

7A sa 120 na yabaki i Mosese ena gauna sa mate kina; ia na i tuvaki ni yagona se kaukauwa vinaka tu ka rai vakavinaka tu na matana.

8Era a tagicaki Mosese na Isireli ena buca mai Moapi me tolusagavulu na siga. Sa qai mudu na nodra vakaloloku ni oti o ya.

9Ia o Josua na luve i Nuni sa sinai ena yalomatua ka ni a digitaki koya o Mosese me kena i sosomi. Era a talairawarawa na Isireli vei Josua ka muria na i vakaro i Jiova ka solia vei ira o Mosese.

10Me tekivu mai na gauna o ya, a sega ni bau dua tale na parofita e Isireli me vakataki Mosese ni a veivosaki kei Jiova ni rau sa veirai mata.Lako 33.11

11A sega talega ni dua na parofita me cakava na veika mana ka veivakurabuitaki me vaka sa cakava o Mosese, ni a talai koya ko Jiova vua na tui Ijipita, vei ira na nona vakailesilesi kei na nona vanua taucoko.

12A sega talega ni dua na parofita me cakava rawa na veika lelevu ka vakarerevaki me vaka sa cakava o Mosese ena matadra kecega na Isireli.