1Ena gauna vata o ya a tauvi mate kina na tui o Esekaia ka voleka sara ni mate. E a qai mani la'ki sikovi koya o Aisea na parofita na luve i Emosi ka kaya, vua, “Sa tukuna ko Jiova mo tuva vinaka kece sara tu na veika kece e tu ena nomu vale baleta ni o sa na sega ni bula tale mai na nomu tauvi mate oqori.”
2A qai vuki ki lalaga o Esekaia na tui ka masu vei Jiova:
3Kemuni Jiova, ni qai nanuma na noqu a qaravi kemuni ena yaloqu taucoko ena yalodina, ka'u sa dau tovolea me'u cakava na veika kece sara o ni vinakata me'u cakava.” A mai tabalaka yani na tagi ena rarawa levu.
4A sa qai vakaroti Aisea ko Jiova
5me lako vei Esekaia ka kaya vua, “Oi au, ko Jiova, na Kalou i Tevita na nomu qase, au sa rogoca na nomu masu ka raica na wai ni matamu. Raica, au sa na solia tale e tinikalima na yabaki me vakuri kina na nomu bula.
6Au na vakabulai iko kei na koro oqo o Jerusalemi mai vua na tui Asiria, ka'u na tomana tikoga na noqu taqomaka na koro oqo.”
7A qai sauma o Aisea ka kaya, “Ena vakaraitaka vei iko na Kalou e dua na i vakatakilakila mo vakadinadinataka ni na vakayacora na ka sa yalataka.
8Ena i kabakaba e a tara o Easi na tui, ena cakava ko Jiova me vakasuka lesu na i yaloyalo ni matanisiga sa kala sobu me rauta ni tini na i kalawa ki muri.” A sa suka lesu vakakina me tini na i kalawa ki muri na i yaloyalo ni matanisiga.
9Ni sa bula tale o Esekaia mai na nona tauvi mate, a sa qai vola na sere ni veivakacaucautaki oqo:
10Au nanuma ga ni'u sa na toki yani
ni se tu donu tu na noqu bula,
Me'u sa na la'ki tu voli ki Etesi
ena vo ni noqu veiyabaki.
11Au kaya ni'u na sega tale ni raici Jiova,
se dua tale na tamata ena vuravura oqo.
12Sa muduki koso na noqu bula ka sa mai cava,
me vaka na uru sobu ni valelaca.
Sa vaka na i sulu sa kotivi tani mai na kena i vivivi sulu,
Ka'u a nanuma ni sa muduka na noqu bula na Kalou.
13Au tagi yani ena vutugu ena loma ni bogi taucoko,
Me vaka sa qurulaka na suiqu e dua na laione,
Ka'u a nanuma ga ni sa tinia na noqu bula na Kalou.
14Sa rogo lailai ka malumalumu na domoqu,
Ka'u sa tagi me vaka na ruve.
Sa oca mai na mataqu ena rai cake ki lomalagi.
I Jiova, ni sereki au mai na leqa kece oqo.
15Na cava me'u kaya rawa? Sa cakava ko Jiova na ka oqo.
Sa rarawa na yaloqu, ka'u sega ni moce rawa.
16Isa Turaga, au na bula ga ena vukumuni,
Ena vukumuni duadua ga.
Ni vakabulai au, ka vakatara me'u bula tiko.
17Ena vuki na noqu rarawa ki na yalo vakacegu.
O ni sa vakabulai au mai na leqa kecega;
O ni sa bokoca na noqu i valavala ca taucoko sara.
18E sega ni dua mai na nodra vanua na mate
me rawa ni vakacaucautaki kemuni.
Ni ra sa sega ni rawa ni vakadinata na mate na nomuni yalodina.
19Ni sai ira ga na bula era vakacaucautaki kemuni,
Me vaka na noqu vakacaucautaki kemuni yani oqo.
Era sa tukuna na i tubutubu vei ira na luvedra na nomuni yalodina.
20I Jiova, o ni sa vakabulai au.
Keimami na qiria na api
ka seretaka na nomuni lagilagi.
Keimami na seretaka ena nomuni vale tabu
ena gauna kece ni neimami bula.
21A sa tukuna o Aisea vua na tui me walia na nona bo ena drega ni lolo ka me na qai bula tale kina.
22Ia sa qai kaya o Esekaia, “Na i vakatakilakila cava ena vakadinadinataka ni'u na rawa ni lako tale ki na Valenisoro?”
Who We AreWhat We EelieveWhat We Do
2025 by iamachristian.org,Inc All rights reserved.
