JOPE 29 - Ai Vola Tabu Ena Vakavakadewa Vou（FNV）

Otioti ni Vosa i Jope

1A qai tekivu vosa tale o Jope ka kaya,

2Isa! Au diva mada ga na noqu bula me vaka tale

Na kena ena gauna a vakatawai au tiko kina na Kalou.

3Ena gauna o ya, a sa dau tiko voli ga kei au o koya,

Ka vakararamataki au ni'u a dau lakova na butobuto.

4Oqori na gauna au a vutuniyau tu kina,

Ka maroroya vinaka na noqu vale na nona veitokani na Kalou.

5A sa tiko kina kei au na Kalou Kaukauwa,

Ka ra sa viribaiti au o ira na luvequ.

6Era sa solia vakalevu na sucu na noqu qele ni bulumakau kei na me,

Ka tubu bulabula na noqu veiolive ena qele veivatu.

7Ena veigauna era dau bose kina na kena turaga ena koro,

Ka la'ki dabe maliwai ira,

8Ena gauna ga era a qai raici au kina na cauravou,

Era a vakatikitiki tani sara,

Ka ra tucake na kena turaga me i vakaraitaki ni nodra dokai au.

9Era a muduka na nodra veivosaki na turaga ni vanua.

10O ira sara mada ga na vakaitavi lelevu era a tiko lo.

11O ira kecega era a sa bau raici au se rogoca na kequ i rogorogo

Era a vosa vakavinakataka ga na veika au a sa dau cakava oti e liu.

12Ni ra tagi mai na dravudravua, au a dau vukei ira;

Ka'u vukei ira na luveniyali ka sega tu na vanua me ra vakanamata kina.

13Era vakacaucautaki au na tamata ka vakaleqai sara vakaca,

Ka'u a vukei ira na yada me ra tiko vakacegu ka marau.

14Au dau cakacaka vakadodonu sara ka sega ni veitotaki.

15Au dau vukei ira na mata boko kei na lokiloki.

16Au a vaka e dua na tama ni gone vei ira na dravudravua,

Ka'u dau vukea na vulagi kevaka sa dua na nona leqa.

17Au a vakarusa na nodra kaukauwa na tamata dauveivakararawataki

Ka vukei ira cake era vakararawataki.

18Au a namaka ena veigauna kece me'u tamata bula balavu,

Ka me'u qai mate ena vakacegu ena noqu vale sara ga.

19Au a vaka na vunikau sa dautiko ga na wai ena wakana,

Ka sa vakasuasuataki vinaka na tabana ena tegu.

20Era a vakalevulevui au tu ga na tamata,

Ka sega sara ga ni bau malumalumu na noqu kaukauwa.

21Ni'u dau veivakasalataki, era a dau vagagalu sara ga

Ka ra vakarorogo vakavinaka na tamata ki na ka au tukuna;

22Ka sega tale ni ra qai dau tukuna e dua na ka ni sa oti na noqu vosa.

A lutu vinaka sara ki lomadra na noqu vosa

Me vaka na lulutu ni mata ni uca ki na qele;

23Sa ka levu dina na nodra dau taleitaka na vakarorogo,

Ka vaka sara ga na nodra dau taleitaka na dauteitei

Na tau ni uca ena vula i tubutubu.

24E vaka ga era sega ni vakabauta rawa na noqu dau matadredredre vei ira;

Ia na nodra mata rarawa e sega sara ni dau vakayalolailaitaki au.

25Au a veiliutaki ka vakatau lewa;

Au liutaki ira me vaka na nona liutaki ira na nona mataivalu e dua na tui,

Ka vakacegui ira ni ra sa yalo lailai mai.