1Au sa vakacaucautaki kemuni na Kalou;
Ni kakua ni galu!
2Era sa vakacacani au na tamata ca kei ira na tamata lasulasu;
Era sa tukuna na veika lasu me baleti au.
3Era sa tukuna na veika rerevaki me baleti au,
Ka sega ni dua na vuna era vakacacani au kina.
4Era sa saqati au veitalia ga na noqu lomani ira ka masulaki ira.
5Era sa sauma lesu mai na noqu vinaka ena veika ca
Kei na noqu loloma ena veicati.
6Ni digitaka mada e dua na tamata ca me lewai koya na kequ meca
Ka me beitaki koya ga e dua na kena meca.
7Me lewai o koya, ka me kunei ni sa cala dina;
Na nona masu sara mada ga me okata me i tovo ca.
8Me tini dole mada ga na nona bula,
Me dua tale na tamata me taura na nona cakacaka.
9Me ra yaco na luvena me ra luveniyali,
Ka yaco na watina me yada.
10Me ra qai yaco na luvedra me ra veilakoyaki voli ka vakatakekere;
Ka me ra vakasavi tani mai na nodra i tikotiko rusa.
11Me ra kauta kece na ka e taukena o ira ka dinau tu kina o koya,
Ka me ra kauta tani kece na vua ni nona cakacaka na kai tani.
12Me kakua ni dua me yalovinaka vua,
Ka me kakua ni dua e raici ira na nona gone era sa luveniyali.
13Me ra mate kece na nona kawa,
Ka na guilecavi na yacana ena i tabatamata ka tarava.
14Me nanuma tiko ko Jiova na nodra ca na nona qase
Ka kakua ni bokoca na i valavala ca i tinana.
15Me nanuma tikoga ko Jiova na nodra i valavala ca,
Ia, o ira me ra guilecavi sara ga vakadua!
16E sega ni bau nanuma na tamata o ya me i tovo vinaka,
A sa ia ga na veivakararawataki kei na veivakamatei
Vei ira na dravudravua, na vakaloloma, kei na malumalumu.
17Sa dau taleitaka me dau veivakacudrui,
Ia, me qai tau vakalevu ga vua na cudru;
A sa sega ni vinakata na vosa ni veivakalougatataki,
Ia, me qai kakua ga ni vosa vakalougatataki.
18Na kena rawarawa na nona veivakacudrui
sa vaka na nona dau vakasulumi koya;
Me qai curuma na yagona na nona cudru
me vaka na wai sa vakasuasuataki koya,
Ka curuma talega na nona sui me vaka na waiwai!
19Me ra qai ubi koya me vaka na i sulu,
Ka me ra vauci tikoga e tolona me vaka na beleti.
20I Jiova, mo ni totogitaki ira na kequ meca me vakaoqo,
Vei ira era kaya na veika ca me baleti au!
21Ia oqo, kemuni Jiova na noqu Kalou,
Mo ni qai vukei au mada me vaka na nomuni vosa ni yalayala.
Ni sereki au ena nomuni yalovinaka kei na nomuni loloma tudei.
22Au sa dravudravua ka vakaloloma;
Ka sa mavoa sara na yaloqu mai loma.
23Au sa vakarau takali yani me vaka na rurugu ni yakavi;
Ka'u sa cagina tani yani me vaka na vodre.
24Sa malumalumu mai na duruqu ni sa sega na kakana;
Ka sa lila mai na yagoqu ka malumalumu.
25Ni ra raici au na tamata, era sa vakalialiai au,
Era kureitaka na uludra ena veibeci.
26Ni vukei au Jiova, na noqu Kalou,
Ni vakabulai au ena vuku ni nomuni loloma tudei!
27Ni vakatakila vei ira na kequ meca
Ni sai kemuni o ni vakabulai au.
28Era na vosa cati au, ia o ni na vosa vakalougatataki au.
Me ra vakadrukai na kequ meca,
Ka me'u marau oi au na nomuni dauveiqaravi.
29Me ra qai ubi ga ena vakaloloma o ira na noqu meca;
Ka me ra daramaka me vaka na kote balavu na nodra madua.
30Au na vakavinavinaka vakadomoilevu vei kemuni Jiova,
Au na vakacaucautaki koya ena nodra soqoni na tamata,
31baleta ni sa taqomaka na tamata dravudravua o koya,
Me vakabula mai vei ira era vakacacani koya me mate.
Who We AreWhat We EelieveWhat We Do
2025 by iamachristian.org,Inc All rights reserved.
