1O Sera sa bula tiko me 127 na yabaki, ka oqo na balavu ni nona bula.
2A sa qai mate o koya mai Kiriaci Aripa (o ya o Epironi) ena vanua o Kenani; a sa lolositaka na nona mate o Epara-ama.
3A sa biuta na vanua e vakotori kina na yago i watina o Epara-ama, ka lako yani vei ira na Itaiti, ka kaya,
4“Oi au na kai tani ka'u sa tiko vulagi ena kemuni maliwa; mo ni volitaka mada mai vei au e dua na tiki ni qele, ka me'u lai buluta kina na watiqu.”
5Era a sauma ka kaya,
6“Mo ni rogoci keimami mada. Oi kemuni e dua na luvenitui qaqa ena vanua oqo, mo ni la'ki buluta ga na watimuni ena i bulubulu vinaka duadua sa tu vei keimami. Ena sega sara ni dua vei keimami me bureitaka na nona i bulubulu mo ni buluti koya kina.”
7Sa qai tucake o Epara-ama ka cuva sobu e matadra na Itaiti,
8ka sa kaya, “Kevaka o ni sa vakadonuya me'u buluta na watiqu eke, au kerea mo ni qai kerei Efironi na luve i Soari
9me volitaka vei au na nona qara vatu mai Makipila, ka sa tiko ena i yalayala ni nona vanua. Mo ni kerei koya me volitaka vei au ena kena i sau taucoko sara, ena matamuni, ka me'u na taukena me noqu i bulubulu.”
10A sa dabe toka o Efironi kei ira na Itaiti ena vanua ni sota ena matamata ni koro; a sa vosa yani ena matadra na tamata kece era tiko kina,
11“Mo ni rogoca oqo na noqu turaga; au na solia vei kemuni na tiki ni qele taucoko kei na qara vatu e tiko kina. Au na solia vei kemuni, ena matadra na kai noqu, mo ni buluta kina na watimuni.”
12A sa cuva o Epara-ama e matadra na Itaiti
13ka kaya vei Efironi, me rawa ni ra rogoca na kena vo, “Mo yalovinaka sara ka rogoci au mada. Au na solia vei iko na i sau ni vanua taucoko. Mo ciqoma na kena i sau mai vei au, ka'u na qai buluta kina na watiqu.”
14A sa kaya o Efironi vei Epara-ama,
15“Noqu turaga, na vanua ka kena i sau wale ga e 400 na tiki ni siliva — ia na cava o ya vei kedaru? Mo ni la'ki buluta ga kina na watimuni.”
16A sa vakadonuya o Epara-ama ka vakarautaka na i sau ni vanua me vaka sa kaya o Efironi ena matadra kecega na Itaiti, o ya e 400 na tiki ni siliva, me vaka na kena i vakarau era dau vakayagataka na dauveivoli.
17A sa vaka o ya na kena yaco me nei Epara-ama na vanua nei Efironi mai Makipila, ena tokalau kei Mamire. A sa wili kina na vanua, na qara vatu e tiko kina, kei na veivunikau kece ena vanua o ya me yacova na kena i yalayala.
18Era sa vakadeitaka ni sa nei Epara-ama na tiki ni qele o ya o ira kece sara na Itaiti era a tiko ena veivosaki o ya.
19Sa qai buluti Sera o Epara-ama ena qara vatu mai Makipila ka veidonui kei Mamire, ena vanua o Kenani.
20A sa yaco na nodra tiki ni qele o ya na Itaiti kei na qara vatu e tiko kina me i bulubulu i Epara-ama.
Who We AreWhat We EelieveWhat We Do
2025 by iamachristian.org,Inc All rights reserved.
