VOSA VAKAIBALEBALE 24 - Ai Vola Tabu Ena Vakavakadewa Vou（FNV）

Na i Katinikaciwa ni Vosa ni Vuku

1Kakua ni vuvutaki ira na tamata ca, ka kakua ni via veitokani vata kei ira.

2Na ka ga era vakasamataka sai koya me ra vakatubu leqa; ena veigauna kece era vosa kina, ena rawa ni mavoa e dua na tamata.

Na Kena i Karuasagavulu

3Sa tara cake na veivale ena vuku kei na kila-ka.

4Na vanua e kune kina na vuku, ena vakaiyaya na kena veiloma ni vale ena veiyaya talei kei na veiyaya rairai vinaka.

Na Kena i Karuasagavulukadua

5Sa uasivi cake na vuku kei na kila-ka mai na kaukauwa.

6Sa dodonu mo vakasamataka vinaka sara na veika mo na cakava ni o se bera ni ia na i valu, kei na levu ga ni vakasala vinaka o na taura na kena rawa ni nomu na qaqa.

Na Kena i Karuasagavulukarua

7Na veivosavosa vuku sa dredre sara me kila na tamata lialia. Ena sega na ka e tukuna o koya ni veivosakitaki e dua na ka bibi.

Na Kena i Karuasagavulukatolu

8O koya sa dau nakita me cakava na ka ca ena vakatokai me dau vakatubu ca.

9Na ka ga e nakita na tamata ca sai koya me cakava na ka ca. Era cata na tamata na dauveivakalialiai.

Na Kena i Karuasagavulukava

10Kevaka o sa malumalumu mai ena dua na veivala o sa malumalumu dina sara ga.

Na i Karuasagavulukalima ni Vosa ni Vuku

11Kakua ni lokuyara ni la'ki vakabula e dua na tamata sa yarataki me la'ki vakamatei. E rawa mo na kaya ni sega na kena yaga vei iko, ia na Kalou sa kila, ka vakatovolea na yaloda.

12Sa dikevi iko; ka kila. Sa saumi ira na tamata o koya me vaka na nodra i valavala.

Na Kena i Karuasagavulukaono

13Na luvequ kania na oni; sa uasivi dina na kena kamikamica mai na qani oni;

14sa vinaka vakakina na vuku kei na kila-ka ki na yalo. Kevaka o rawata ena daumaka na nomu veigauna mai muri.

Na Kena i Karuasagavulukavitu

15Kakua sara ni nakita mo la'ki butako vua na tamata yalododonu se mo kauta tani na nona vale; sa ka ca sara o ya.

16Veitalia sara ga na levu ni nona bale na tamata yalododonu, ena tu cake tale mai. Ia na leqa ena vakarusa na tamata ca.

Na Kena i Karuasagavulukawalu

17Kakua ni marau ni ra sota kaya na leqa na kemu meca; ka kakua ni reki na yalomu ni ra sa tacaqe ka bale.

18Ena qai kila ko Jiova kevaka e vakakina, ka na sega ni vinakata. Ena qai sega ni totogitaki ira.

Na Kena i Karuasagavulukaciwa

19Me ra kakua ni vakanuiqawaqawataki iko na tamata ca; kakua talega ni vuvutaki ira.

20Na tamata ca sa sega na nona i nuinui, sa sega na ka me nuitaka ena gauna mai muri.

Na i Katolusagavulu ni Vosa ni Vuku

21Rerevaki Jiova na luvequ, ka doka na tui. Kakua ni vakailala vata kei ira era dau saqati rau; sa rawa me ra vakarusai na tamata oqori ena dua na gauna lekaleka.

22O sa bau kila li na leqa e rawa ni vakavuna na Kalou se na tui?

Na Veivosa ni Vuku Tale Eso

23Sa i koya talega oqo na veika era tukuna na tamata yalomatua:

Sa sega ni dodonu vua e dua na turaganilewa me vakataulewa vakatawadodonu.

24Kevaka ena kaya ni sa dodonu e dua na tamata cala, ena cudruvi ka cati mai vei ira na tamata kecega.

25Ia o ira na turaganilewa sa totogitaki ira era sa cala, era na kune ka vinaka ka rogo vinaka na yacadra.

26Sa vaka na i regu ni veiwekani o koya sa dautukuna yani vakadodonu na ka dina sa tarogi mai.

27Kakua mada ni tara na nomu vale se tauyavutaka e dua na nomu vale me yacova ni sa vakarau oti na vanua ka vakadeitaka ni o sa na rawa ni rawata na nomu bula.

28Kakua ni solia na i vakadinadina me saqata na wekamu, ka sega na vuna vinaka, se tukuna na ka e veivakacalai me baleti koya.

29Kakua ni kaya, Au na cakava vua na ka sa cakava vei au. Au na sauma lesu ga vua na ka sa cakava vei au.

30Au a lakova na nona loma ni vanua kei na nona veivaini e dua na tamata yalowai ka vucesa.

31Sa sinai kina na kau vakavotona ka sa sivia tu kina na co ca. A sa bale na bai vatu sa toka wavokita.

32Au raica na ka oqo ka vakasamataka, ka'u sa vulica mai kina na lesoni oqo:

33Vbale 6.10,11Mo bobo tale mada ka tabalaka na moce kevaka o vinakata. Mo roqo liga tale mada ka vakacegu vakalailai,

34ia ni o sa moce lutu no, ena qai ravuti iko o dravudravua me vaka e dua na daubutako vakaiyaragi.