1Sa tara na nona vale na Yalomatua ka sa cakava e vitu na kena duru.
2Sa mokuta e dua na manumanu me kena magiti, a sa ulia ki na waini na i saluwaki eso, a sa qai vakarautaka na teveli.
3Sa talai ira yani na nona goneyalewa dauveiqaravi me ra la'ki veisureti mai na veiyasa ni koro kece, ka me ra kacivaka yani:
4Ni lako mai, oi kemuni na tamata lecaika! A sa kaya vei ira na yalowai o koya,
5Ni lako mai, mo ni mai vakayagataka na magiti au sa vakarautaka kei na waini au sa ulia.
6Ni laivi ira tu yani na tamata lecaika, mo ni bula kina. Ni muria ga na sala ni kila-ka.
7Kevaka o vakadodonutaka e dua na dauveivakalialiai, o na vakamaduataki ga kina. Kevaka o vunauca e dua na tamata ca, o na rawa ni mavoa wale ga kina.
8Kakua ni vakadodonutaka e dua na dauveivakalialiai, ena cati iko wale ga kina o koya. Ia kevaka o na vakadodonutaka e dua na tamata vuku, ena dokai iko o koya.
9E dua na ka o na kaya vua na tamata vuku ena vakalevutaka cake na nona vuku. Na ka ga o kaya vua na tamata yalododonu ena vakuria na nona kila-ka.
10 Jope 28.28; Same 111.10; Vbale 1.7 Na i matai ni kalawa ki na yalomatua sai koya na rerevaki Jiova. Kevaka o sa kilai koya na Le Dua Yalosavasava, o sa yalomatua.
11O Yalomatua ena vakuria na yabaki ni nomu bula.
12Kevaka o sa yalomatua ena yaga sara ga vei iko; ia kevaka o na vakanadakuya, sai iko ga ena nomu na kena leqa.
13Ia o lecaika sa vaka e dua na yalewa domolevu, yalowai ka sega ni kila na madua.
14Sa dabe tiko o koya ena katuba ni nona vale se ena dua na i dabedabe ena yasa ni koro cere duadua,
15ka sa kacivi ira tiko na tamata era lako siviti koya, vei ira era sa cakava ga na nodra dui cakacaka, me vakaoqo:
16Ni lako mai ki ke na tamata lecaika! A sa kaya vei ira na tamata yalowai,
17Sa kamikamica na wai butakoci. Sa kana vinaka cake ga na madrai butakoci.
18Ia era sa sega tiko ni kila o ira sa temaki ni ra na mate na tamata kece sara era lako ki na nona vale, kei ira kece sara sa curuma oti era sa tiko ena vuravura ni mate.
Who We AreWhat We EelieveWhat We Do
2025 by iamachristian.org,Inc All rights reserved.
