1 SAMUELA 19 - Ai Vola Tabu Ena Vakavakadewa Vou（FNV）

Vakacacani Tevita o Saula

1A vosa vei Jonacani na luvena o Saula, kei ira kece talega na nona tamata, me ra vakamatei Tevita. Ia a vinakati Tevita vakalevu o Jonacani, na luve i Saula.

2A vosa vei Tevita o Jonacani ka vaka, “Sa vakasaqara tiko o Saula na tamaqu e dua na sala me vakamatei iko kina; ia mo qarauni iko ni mataka, mo tiko ena dua na tikina vuni, ka mo vunitaki iko;

3keirau na la'ki tu vata kei tamaqu ena tikinivanua o na vuni tiko kina, au na tukuna vua na veika e baleti iko. Ia au na qai tukuna tale vei iko na ka au sa raica rawa.

4A vakacaucautaki Tevita o Jonacani vei Saula na tamana, ka kaya, “Me kakua ni kitaka na ka ca o koya na tui vei Tevita, na nona tamata; ni sa sega ni kitaka na ka ca vei iko o koya, ka ni sa vinaka sara na nona i vakarau vei iko;

5E a bolea na mate o koya ka la'ki vakamatei koya kina na kai Filisitia, ka sa rawata kina ko Jiova e dua na qaqa levu vei ira kecega na Isireli. O a raica ka marau kina; a cava li na vuna o sa via cakava kina na ka ca vua na tamata sa sega ni cala, e dua li na i naki ni nomu via vakamatei Tevita?”

6A tarai Saula vakabibi na vosa i Jonacani ka mani bubului kina o koya, “Me vaka sa bula tiko ko Jiova, ena sega ni vakamatei o koya.”

7A kacivi Tevita o Jonacani, ka tukuna vua na ka kecega. A qai kauti Tevita vei Saula o Jonacani, me dau la'ki veiqaravi tiko vua na tui me vaka e liu.

8A ia tale na i valu; a lako yani o Tevita ka vala kei ira na kai Filisitia, ka ravuti ira ena dua na veiraravui levu; a ra a dro tani sara mai vua.

9A curumi Saula na yalo ca mai vei Jiova. E a tiko o koya ena nona loma ni vale ka taura toka e ligana na nona moto ena gauna a qiria tiko kina o Tevita na nona api.

10A saga o Saula me cokai Tevita me vakabiri koya ki lalaga ena moto; sa levea o Tevita na moto ka coba sara kina ki lalaga. A dro bula o Tevita ena bogi o ya.

11A tala yani eso na tamata o Saula ki na vale i Tevita, me ra la'ki raici koya, ka vakamatei koya ena mataka. A qai vakasalataki Tevita o Mikali na watina, ka kaya, “Kevaka o na sega ni dro ena bogi edaidai, o na vakamatei ni mataka.”