ISIKELI 19 - Ai Vola Tabu Ena Vakavakadewa Vou（FNV）

E Dua na Sere ni Lolosi

1Ia o iko,

Mo taurivaka e dua na sere ni lolosi

ena vukudra na turaga ni Isireli,

2Ka kaya:

Sa laione yalewa vakacava o tinamu

ena kedra maliwa na laione!

Sa davo ena kedra maliwa na luve ni laione,

Ka susugi ira na luvena lalai.

3A sa susuga cake mai

e dua vei ira na luvena lalai;

Ka tubu cake me dua na laione cauravou,

A sa vakavulici koya me toboka na kena;

Ka sa dau kana tamata.

4Era sa veitukutukunitaka

na nona ca na veimatanitu;

Ka toboki koya ena nodra i keli;

Era sa vesuki koya ena i cori,

Ka kauti koya ki Ijipita.

5Ia ni sa raica ni sa veilecayaki o koya,

Ka sa yali na nona i nuinui.

A sa taura tale e dua vei ira na luvena lalai,

Ka susuga cake me dua vei ira na laione cauravou,

6A sa veilakoyaki ena kedra maliwa na laione,

Ka sa tubu cake me levu.

A sa vulica me toboka na kena

Ka sa dau kana tamata.

7A sa vakarusa o koya na nodra bainivalu,

Sa vakalala na nodra veikoro lelevu;

A sa domobula na vanua

Kei ira kece sa tiko kina

Ena vuku ni domo ni nona tagi.

8Ia era qai vala kaya na veimatanitu

Ka tu na i cori ena veiyasana kecega;

Era sa tevuka vua na nodra lawa;

Ka sa tobo o koya ena nodra dai.

9Era sa sogolati koya ena dua na bai,

Ka kauti koya yani vei tui Papiloni;

Era sa kauti koya yani vakavesu,

Me kakua tale kina ni rogo na domona

ena dela ni veiulunivanua e Isireli.

10O tinamu sa vaka e dua na vaini

Ena loganivaini sa tei ena bati ni wai,

Sa vuavuai vinaka ka levu na tabana

Ena vuku ni levu ni wai.

11Na tabana kaukauwa sara

Sa yaco me nona matanakilagi na daulewa

Sa cere vakaidina ki lagi

Ena kedra maliwa na tabana lelevu;

A sa raici ena kena cecere sara

Ni sa vuqa na kena veitabana.

12Ia sa cavuraki na vaini

ena dela ni cudru katakata,

Ka sa biu sobu ki na qele;

A sa vakaraqosataka na cagi tokalau;

Ka sa betilaki laivi na vuana,

A sa malai sobu na tuvukana kaukauwa;

Ka sa kania na bukawaqa.

13A la'ki tei tale oqo ena vanua talasiga,

Ena vanua mamaca ka sigasiga.

14A sa tete yani na bukawaqa mai na vuna,

Ka sa kama kina na tabana kei na vuana,

Ena sega tale na tabana kaukauwa me vo kina,

Me nodra matanakilagi na daulewa.

Sa vakaoqo na sere ni lolosi, ka sa lagata wasoma me vaka na sere ni vakaloloku.