1Sa kaya ko Jiova, “Mo ni kakua ni cakava vei kemuni na kalou lasu, se matakau ceuceu, se vakaduria e dua na i vakatakarakara e buli ena vatu, mo ni cuva kina. Ni sai au ko Jiova na nomuni Kalou.Lako 20.4; Vsoro 19.4; Vrua 5.8; 16.21-22; 27.1
2Ni vakatabuya na noqu Siga ni Vakacecegu kece, ka doka na noqu i tikotiko tabu: Ni sai au ko Jiova.
3Kevaka o ni sa talairawarawa ki na veika au sa vakarota vei kemuni, ka muria na noqu lawa,Vrua 11.13-15; 28.1-14
4au na qai vakatauca vei kemuni na uca ena kena gauna taudonu, ka na sautu sara na vua ni qele, ka na vuataka na vuana na kau ni veiwere.
5Ena ka levu sara na veika ena basika mai na qele ena veiwere, ka o ni na tamusuki sila tikoga ni sa yaco mai na gauna me veti kina na qerepi, ka o ni na beti qerepi tikoga ni sa yaco mai na gauna ni kakaburaki itei ni sila. Ena sautu sara na vanua ena kakana mo ni kania, ka tiko vakacegu ena nomuni vanua.
6Au na solia na bula vakacegu ki na nomuni vanua, ka o ni na moce koto ka sega ni rerevaka e dua na ka. Au na kauti ira laivi na manumanu ca ni vanua, ka ena sega talega ni yaco kina e dua na i valu.
7O ni na vakasavi ira na nomuni meca, ia era na bale ena i seleiwau ena matamuni.
8Era na vakasavi ira na lewe drau e lewe lima wale vei kemuni, ka lewe dua na drau vei kemuni era na vakasavi ira era lewe tini na udolu; ia era na bale e matamuni na nomuni meca ena i seleiwau.
9Au na vakalougatataki kemuni ka vakatubura na nomuni kawa; ka'u na maroroya na noqu veiyalayalati kei kemuni.
10Na veika o ni tamusuka mai na i teitei ena levu cake sara ka veirauti me dua na yabaki, ia o ni na sova laivi tale na kena sa makawa me rawa ni tawa vou yani na ka vou.
11Au na tiko kei kemuni ena noqu vale tabu ka'u na sega ni vakanadakui kemuni.
12Au na lako vata voli kei kemuni; ka'u na nomuni Kalou, ka o ni na noqu tamata.2Kori 6.16
13Ni sai au ko Jiova na nomuni Kalou, ka'u a kauti kemuni tani mai na vanua o Ijipita. Au a sereka na i vesu ni nomuni i vua, ka qisi kemuni mo ni lako ena dodonu kei na galala.
Na i Totogi ni Talaidredre(Vrua 28.15-68)14Sa tukuna ko Jiova, “Kevaka o ni sa bese ni muria na noqu vosa, o ni na cudruvi.
15Kevaka o ni sa sega ni via cakava na noqu i vakaro ka vakacacana na noqu veiyalayalati kei kemuni,
16au na totogitaki kemuni. Au na vakavuna me yacovi kemuni na leqa me vaka na mate lelevu sa sega na kena i wali, kei na katakata ni yago me vakavuna na boko ni matamuni kei na kena lutu tikoga na yagomuni. O ni na kaburaka na sore ni kau me nomuni itei, ia ena sega ni yaga vei kemuni na vua ni nomuni i teitei baleta ni ra na kania na kemuni meca era na vakadrukai kemuni.
17Au na saqati kemuni ka me ra samuti kemuni kina o ira na kemuni meca. Era na lewai kemuni o ira sa cati kemuni, ia o ni na rere vakalevu ka cici ni sa sega mada ga ni dua e vakasevi kemuni.
18Ni sa yacovi kemuni na ka kecega oqo, ka o ni sa bese ga ni vakarorogo vei au, au na qai vakavitutaka na i totogi ni nomuni i valavala ca.
19Au na vorolaka na nomuni dokadoka, ka'u na cakava me kakua ni tau na uca, kei na qele me mamaca ka kaukauwa me vaka na kaukamea.
20Ena maumau wale na nomuni i gu, ni sa na sega ni vakalewe na nomuni vanua, ka sega ni vuataka na vuana na kau ni vanua.
21Ia kevaka o ni na vakadrecike tikoga vei au ka bese ni vakarorogo, au na qai vakalevutaka me vakavitutaki vei kemuni na mate ca, me veirauti kei na nomuni valavala ca.
22Au na tala na manumanu kila vei kemuni, era na vakamatea na luvemuni, ka vakaleqai ira na nomuni manumanu, ka vakavuna mo ni lewe lailai ga, ena lala didi kina na nomuni gaunisala.
23Ia kevaka o ni sega ga ni kauwai ki na veivunauci oqo, ka o ni sa sega ga ni golevi au mai, ka sa via vorati au ga,
24au na qai vorati kemuni talega, ka samuti kemuni vakavitu tale me i totogi ni nomuni valavala ca.
25Au na vakavuna mo ni valuti, ka me totogitaki kina na nomuni voroka na veiyalayalati; kevaka o ni dro lesu ki na nomuni veikoro ena vaqara bula, au na tala yani na mate dewa vei kemuni, ka soli kemuni ki na ligadra na kemuni meca.
26Au na muduka na i vurevure ni kemuni kakana, me rawa kina vei ira e lewe tini na yalewa me vavia na madrai taucoko sara ena dua ga na lovo. Era na veivotayaka, ia o ni na sega ga ni mamau kina ni sa vakayagataki oti.
27Kevaka e sa oti kece na veika oqo, ka o ni se vorata tikoga na noqu vosa ka sega ga ni vakarorogo,
28au na qai vorati kemuni talega ena noqu cudru katakata, ka totogitaki kemuni me vakavitutaki, ena vuku ni nomuni valavala ca.
29Ena ka levu na nomuni viakana ka o ni na kania na lewedra na luvemuni.
30Au na vakarusa talega na nomuni vanua ni sokalou ena veidelana, ka vakarusa na nomuni i cabocabo ni ka boi vinaka, ka binia na yagomuni mate ena dela ni yagodra na nomuni matakau ceuceu kecega; ia ena cati kemuni na yaloqu.
31Au na vakarusa na nomuni veikoro, ka vaqeyavutaka talega na nomuni veivanua ni sokalou, ka sega ni ciqoma na nomudou vakacaboisoro.
32Au na vaqeyavutaka na vanua, ka ra na kurabui kina na kemuni meca ka na la'ki tiko kina.
33Au na vakavuna mo ni valuti ka vakasavi kemuni tani yani ki na kedra maliwa na veimatanitu; ia na nomuni vanua ena dravuisiga mai, ka na lala na nomuni veikoro.
34Ena qai marautaka na qele na nona vakacegu ena gauna sa vagalalataki kina, ni o ni sa tiko ena nodra vanua na nomuni meca; sa na qai vakacegu na qele ka marautaka na veisiga vakatabui eso me dau vakacegu kina.
35Ena gauna kece sara e lala tu kina, ena vakacegu tiko na qele me vaka ni o ni a sega ni solia me bau cegu mada ena gauna o ni bula voli kina.
36Ia au na tala na rere me kania na lomadra era sa vo vei kemuni ena nodra vanua na kemuni meca, ka ra na dro wale ena rorogo ni draunikau sa cagina ena cagi. Era na dro me vaka e dua sa vakacemuri ira voli ena i valu, ka ra na bale ena gauna e sega kina ni dua na meca e tu volekati ira.
37Era na tarabe ka ra na veiqiqici yani, me vaka ni ra dro mai na i valu, e dina ga ni na sega sara ni dua e vakasavi ira. Ena sega vei kemuni na i gu kei na kaukauwa mo ni vorati ira rawa kina na kemuni meca.
38O ni na vakarusai mai vei ira na veimatanitu, ia ena nodra vanua na meca, o ni na vakawabokotaki kina.
39Na lewe vica wale vei kemuni ka bula tiko ena vakaleqai ena nodra vanua na kemuni meca baleta na nomuni valavala ca kei na nodra i valavala ca na nomuni qase.
40Ia era na vakatusa na nodra i valavala ca kei na nodra caka cala na nodra qase, o ira oqo sa saqati au ka vakanadakui au,
41ka vakavuna me'u vuki tani talega vei ira ka kauti ira ki na nodra vanua na nodra meca. Ia ni ra sa vakamalumalumutaka na yalodra o ira na nomuni kawa, ka ra sotava na i sau ni nodra valavala ca kei na viavialevu,
42au na qai nanuma na noqu veiyalayalati kei Jekope, vata kei Aisake, vata kei Epara-ama, ka'u na nanuma talega na vanua.Vteki 17.7-8; 26.3-4; 28.13-14
43Ena vakalalai na vanua mai vei ira na tamata era tiko kina, me rawa ni marautaka kina na qele na kena gauna dodonu ni vakacegu, ka dodonu me ra colata na i sau ni nodra i valavala ca ni ra sa beca na noqu lewa ka cata e lomadra na noqu i lesilesi.
44E dina ga ni sa yaco na ka kece oqo, ka ra se tiko voli ga ena nodra vanua na kedra meca, ia au na sega ga ni biuti ira se vakarusai ira vakadua me la'ki vakavuna kina me'u voroka na noqu veiyalayalati kei ira. Ni sai au ko Jiova, na nodra Kalou.
45Ia ena vukudra ga au na nanuma kina na noqu veiyalayalati kei ira na nodra qase, ni ka'u a kauti ira tani mai na vanua o Ijipita ena matadra na veimatanitu me'u nodra Kalou: Ni sai au ko Jiova.
46Oqo kece na i lesilesi kei na i vunau kei na i vakaro sa vakarautaka ko Jiova vei Mosese me baleti koya kei ira na Isireli mai na Ulunivanua o Saineai.
Who We AreWhat We EelieveWhat We Do
2025 by iamachristian.org,Inc All rights reserved.
