1Ena gauna o ya, era a lako yani na Isireli me ra vala vata kei ira na kai Filisitia; era a la'ki tiko mai Epenisa na Isireli, ka ra tiko mai Efeki na kai Filisitia.
2Era a tuvai ira vakaivalu na kai Filisitia me ra vala kei ira na Isireli: ia ni sa oti na veivaluvaluti levu oqo, era a qaqa na kai Filisitia vei ira na Isireli, ka ra vakamatea kina e rauta ni 4,000 na tamata.
3Ni ra sa suka tale yani ki na i tikotiko vakaivalu o ira era bula mai na i valu, era a kaya na nodra qase na Isireli, “A cava na vuna sa ravuti keda kina edaidai ko Jiova e matadra na kai Filisitia? Me da la'ki kauta mai na Kato ni Veiyalayalati i Jiova mai Sailo me rawa kina ni lako vata tiko kei keda o koya, ka vakabulai keda mai na ligadra na keda meca.”
4Era sa talai ki Sailo na tamata me ra la'ki kauta mai na Kato ni Veiyalayalati i Jiova ni lewevuqa, o koya sa tiko ena tadrua ni Jerupimi. Erau tiko talega kei na Kato ni Veiyalayalati i Jiova o rau na luve i Ilai, o Ofinai kei Finiasi.
5Ni sa yaco yani ki na i tikotiko na Kato ni Veiyalayalati i Jiova, era a tabalaka na kaila ni marau ena domoilevu o ira na Isireli kecega, a sa yavavala kina na vanua.
6Ia ni ra rogoca na kai Filisitia na rorogo ni kaila, era a kaya, “A cava beka na i balebale ni kaila levu oqo, ena nodra i tikotiko na Iperiu? Era a qai kila ni sa kau mai na Kato ni Veiyalayalati ki na nodra i tikotiko”
7Era a rere na kai Filisitia, ni ra kaya, “Sa lako mai e dua na kalou ki na nodra i tikotiko.” Era a kaya tale,
8“Isa o keda! O cei beka ena vakabulai keda mai na ligadra na veikalou qaqa oqo? Sa o ira oqo na veikalou ka vakarusai ira na kai Ijipita ni tauvi ira na veimate lelevu mai na vanua lala.
9Ni yaloqaqa na kai Filisitia! Dou vala me vaka na tagane, de qai yaco me da nodra bobula na Iperiu, me vaka na nodra a noda bobula tu e liu. Ni vala me vaka na tagane!”
10A sa vakacibi i valu o ira na kai Filisitia, ka ra vakadrukai o ira na Isireli, ka ra dui se na tamata yadua ki nodra vale; a yaco e dua na ravuravu levu; a mate e 30,000 na mata i valu yava ni Isireli.
11E a kovei na kato ni veiyalayalati; e rau a vakamatei na luve i Ilai o Ofinai kei Finiasi.
12A cici e dua na tamata mai vei ira na Penijamini mai na vanua ni veiraravui, a lako mai ki Sailo ena siga o ya ka kakadresudresu tu na nona i sulu, ka ubia talega na uluna ena qele.
13Ia ni yaco yani, a dabe tiko o Ilai ena dua na i dabedabe e tutu ni sala, ka lava na utona ena nona ririkotaka na Kato ni Veiyalayalati. Ia ni lako mai na tamata o ya ka tukuna ena koro na ka a yaco, era a tagi na lewe ni koro taucoko.
14Ni rogoca o Ilai na domo ni qoqolou, a kaya, “A cava era qolouvaka o ira oqo?
15A 98 na yabaki i Ilai, a sa buwawa na matana, ka vovoleka sara me sega ni rai rawa.
16A qai vosa vei Ilai na tamata o ya ka kaya, “Oi au sara ga oqo na tamata ka lako mai na i valu, ka'u a dro mai kina edaidai.” A kaya vua o Ilai, “I na luvequ, a cava sa yaco?”
17A sauma vua o koya e mai tukutuku, “Era sa dro o ira na Isireli e matadra na kai Filisitia, a sa dua talega na ravuravu levu vei ira na tamata, e rau sa mate talega o rau na luvemu, o Ofinai kei Finiasi; a sa kovei na Kato ni Veiyalayalati.”
18Ia ena gauna a cavuta tiko kina o koya na Kato ni Veiyalayalati, sa bale sobu vakatadraicake o Ilai mai na nona i dabedabe e tutu ni matamata ni koro. Sa qase sara o koya ka bibi, ia na nona bale oqo sa ramusu kina na domona ka mate sara talega kina. A lewai Isireli tu me yabaki vasagavulu.
19Sa bukete tiko na vugoi Ilai, na wati Finiasi, ka sa voleka talega na gauna me vakasucu kina. Ia ni rogoca o koya na i rogorogo ni sa kovei na Kato ni Veiyalayalati, ka sa mate na vugona kei na watina, a vakasauri na nona taratara ka vakasucu sara.
20Ia ni sa voleka ni mate, era a kaya vua na yalewa ka ra qaravi koya tiko, “Mo yaloqaqa tiko! Sa sucu na luvemu gonetagane!” Ia sa sega ga ni vosa mai o koya se kauwai kina.
21A sa vakayacana na gonetagane o ya me o Ikapote, ni sa vakamacalataka vakaoqo, “Sa biuti Isireli na lagilagi ni Kalou:” ni sa dusia na kena sa kovei na Kato ni Kalou kei na nodrau mate o watina kei na vugona.
22A sa kaya, “Sa takali vei Isireli na i serau ni Kalou baleta ni sa kovei tani na Kato ni Kalou.”
Who We AreWhat We EelieveWhat We Do
2025 by iamachristian.org,Inc All rights reserved.
