1A sa talai Pasari na luve i Malikaia kei na bete o Sefanaia na luve i Maseia o Setekaia na tui me rau lako vei Jeremaia ka cakava na kerekere oqo:
2“Mo yalo vinaka, mo vosa mada vei Jiova me baleti keda, baleta ni ra sa tuva i valu wavolita tu na koro na mataivalu nei Nepukanesa na tui Papiloni. De rairai ena vakayacora ko Jiova e dua na nona cakacaka mana me baleti keda ka me vakasaurarataki Nepukanesa me vakasuka.”
3A qai vosa vei au na Kalou, ka'u sa qai tukuna vei rau sa talai mai
4me rau laki tukuna vei Setekaia ni ko Jiova, na nodra Kalou na Isireli, sa kaya vakaoqo, “I Setakaia, au na ravuta na nomu mataivalu ka vala tiko kei na mataivalu nei tui Papiloni. Au na binia na nodra i yaragi kece ni vala na nomu mataivalu ena lomadonu ni koro.
5Au na valuti iko ena ligaqu qaqa, kei na noqu cudru, na noqu voravora, kei na noqu yalokatakata.
6Au na vakamatei ira kece sara era tiko ena koro oqo. Na tamata kei na manumanu kecega era na mate vakatautauvata ena dua na mate ca levu sara.
7Ia me baleti iko, o ira na nomu vakailesilesi, kei na tamata kece ena koro oqo era bula mai na i valu, kei na mate ca, kei na dausiga — au na soli kemuni ki na liga i Nepukanesa na tui Papiloni kei na ligadra na kemuni meca, o ira era via vakamatei kemuni. Ena vakamatei kemuni o Nepukanesa. Ena sega ni vakabula e dua vei kemuni, se yalololoma, se me yaloveivosoti vei kemuni.”
8A sa qai kaya ko Jiova vei Jeremaia me tukuna vei ira na tamata, “Raica au sa biuta e matamuni na sala ni bula kei na sala ni mate.
9O ira era na tiko ena loma ni koro era na mate ena i valu, se ena viakana, se ena mate ca. Ia o ira era curu yani ki tuba ka soro vei ira na kai Papiloni, o ira ka sa valuta tiko oqo na koro levu, era na sega ni vakamatei; era na vakabulai me i tokinivalu.
10Au sa nakita e lomaqu me'u kakua tale ni vakabula na koro levu oqo, ia me'u vakarusa sara ga. Ena soli ki na ligana na tui Papiloni ka me na vakama yavu.
Vakatau Lewa ena Vuvale i Tui Juta11Mo tukuna ki na vuvale vakatui e Juta: “Mo ni rogoca na vosa i Jiova,
12Kemuni na kawa i Tevita! Sa kaya vakaoqo ko Jiova: Me ia na lewa dodonu ena veisiga. Me taqomaki na tamata sa vakaisini mai vei koya sa veivakaisini. Kevaka e sega ni vakayacori vakakina, na cala o ni sa kitaka oqo ena vakavuna me waqa na noqu cudru me vaka na buka sa sega ni boko rawa.
13O iko, Jerusalemi, o sa dabe toka e cake ena dela ni veitokaitua me vaka na vatu cere ena loma ni buca. Ia ena vala kei iko ko Jiova. O sa kaya ni sega ni rawa ni dua me ravuti iko se basuka rawa na kemu bai.
14Ia ka'u na totogitaki iko me baleta na veika o sa vakayacora. Au na vakama na nomu valenitui ka na kama yavu na veika kece sara e tu wavokita.”
Who We AreWhat We EelieveWhat We Do
2025 by iamachristian.org,Inc All rights reserved.
