SAME 88 - Ai Vola Tabu Ena Vakavakadewa Vou（FNV）

A Tagi ni Kere VeivukeA Sere. A nodra Same na luve i Kora. Vua na i liuliu ni sere: me vaka na Maalaca Leanoca. A Masikili i Amani na Eseraaiti.

1I Jiova, na Kalou dauveivakabulai, au sa tagi voli ga ena siga taucoko,

Ka'u sa lako yani e matamuni ena bogi.

2Ni vakarorogo ki na noqu masu;

Ka rogoca na noqu tagi ni kere veivuke.

3Sa levu sara na leqa sa yacovi au,

ka'u sa voleka sara kina ni mate.

4Au sa vakataki ira kecega na tani era sa vakarau mate;

Sa oti na noqu kaukauwa taucoko.

5Au sa biu tu yani ena kedra maliwa na mate;

Au sa vakataki ira era sa moku ka davo koto ena i bulubulu,

O ni sa guilecava sara ga vakadua,

Ka sa sega ni rawa me ra vukei.

6O ni sa kolotaki au ki na boto ni bulubulu,

Ki na qara butobuto sara ka titobu duadua.

7Sa bibi sara vei au na nomuni cudru,

Ka sa luvuci au na nomuni biau kecega.

8O ni sa vakavuna me ra biuti au na kemuni meca;

Ka vakavuna me ra sevaki au.

Au sa sogolati ka sega ni dro rawa.

9Sa malumalumu mai na mataqu ena noqu rarawa,

Kemuni Jiova, au sa masu yani vei kemuni ena veisiga kecega,

Ka'u laveta cake yani na ligaqu vei kemuni ena masu.

10O ni sa cakava li na cakacaka mana me baleti ira na mate?

Era dau tucake li na mate me ra vakacaucautaki kemuni?

11Sa dau tukuni li na nomuni loloma tudei ena i bulubulu,

Se na nomuni yalodina ena vanua ni veivakarusai?

12Ena laurai li na nomuni cakacaka mana ena vanua butobuto,

Se na nomuni vinaka ena vanua ka dau guilecavi kina na ka?

13Ia, oi au, i Jiova, ka'u sa tagi yani oqo vei kemuni;

Sa voqa yani na domo ni noqu masu vei kemuni ena veimataka.

14I Jiova, na cava beka o ni sa cati au kina?

A cava beka o ni sa vuki tani kina vei au?

15Au a sota kaya na veika rarawa me tekivu sara ni'u a sa gone

ka vovoleka sara ni'u mate;

Ka'u sa malumalumu mai na bibi ni totogi o ni dau solia vei au.

16Sa ubi au na nomuni cudru waqawaqa

Ka sa vakarusai au na nomuni ravuravu vakarerevaki.

17Era sa wavoliti au ena veisiga kecega me vaka na waluvu;

Era sa sogolati au mai na veiyasana kecega.

18O ni sa vakavuna me ra biuti au na noqu i tokani dredre sara,

Sa qai vo taudua ga na noqu i tokani o butobuto.