1Ena i katini ni vula ni i kaciwa ni yabaki a tui kina o Setekaia e Juta a lako mai o Nepukanesa na tui Papiloni ka ravuti Jerusalemi.
2Ena i kaciwa ni siga ni ka va ni vula, ena i katini kadua ni yabaki a tui kina o Setekaia a kabasu kina na bai ni koro.
3Ena gauna a vakadrukai kina o Jerusalemi era a qai lako na nona vakailesilesi cecere kecega na tui Papiloni ka la'ki tiko ena matamata ni koro e loma: o Nekali Sarisa, Samaka Nipa, Sasikimi kei na dua tani tale na Nekali Sarisa.
4Ni a raica na tui o Setekaia kei ira kece na nona sotia na ka a yaco era a tovolea me ra dro mai na koro ena bogi. Era a muri ena matamata ena tadrua ni bai ka dro yani vaka ki na buca ni Joritani.
5Era a qai vakasavi ira na mataivalu ni Papiloni ka la'ki vesuki Setekaia ena buca mai Jeriko. Era a vesuki koya ka kauti koya vei Nepukanesa na tui Papiloni ka tiko mai Ripila ena vanua o Amaci, ka mai veilewaitaki koya e kea.
6A vakamatei iratou na luve i Setekaia na tui Papiloni ni rai tu o koya. A vakamatei ira kece talega na turaga e Juta.
7Ia a qai leuta na yaloka ni mata i Setekaia, ka qai vesu ena sinucodo me kau ki Papiloni.
8Era a qai vakama na kai Papiloni na valenitui, na nodra veivale na tamata ka ra basuraka sobu na bai ni koro kei Jerusalemi.
9A qai kauti ira yani vakabobula ki Papiloni na tamata era a vo tu ena koro, kei ira era a vuki me to vua, o Nepusaratani na turaganivalu liu.
10A biuti ira tu ga mai eso na tamata dravudravua sara ena vanua o Juta kei ira e sega na ka era taukena, ka solia vei ira eso na vanua kei na veiwere ni vaini.
Sereki o Jeremaia11Sa qai tukuna o Nepukanesa na tui Papiloni vei Nepusaratani na turaganivalu liu na veivakaro me baleti Jeremaia.
12La'ki kauti Jeremaia ka qaravi koya vinaka. Kakua ni cakava vua e dua na ka, ia mo vakayacora na veika kece sara e vinakata.”
13A qai talatala o Nepusaratani kei Nepusasipani e dua na vakailesilesi cecere kei ira kece na vakailesilesi i tui Papiloni,
14me la'ki kau mai o Jeremaia mai na lomanibai ni vale ni veivesu. Era a soli koya me vakatawai koya o Kitalaia na luve i Eikani na makubui Sefana, me raica me yaco bula ki na nona i tikotiko. A tiko mai kea o Jeremaia kei ira na tamata.”
Vakanuinui i Epetimeleki15A sa vosa vei Jeremaia na Turaga ko Jiova ni a rogo tikoga e lomanibai ni vale ni veivesu. A sa kaya vei Jeremaia,
16me tukuna vei Epetimeleki na kai Eciopea ni a kaya na Turaga Qaqa na nodra Kalou na Isireli, “Au na kauta mai na veivakarusai ki na koro oqo, ka sa sega na sautu. Me vaka au a kaya ni'u na cakava. Ia ni na yaco mai na ka oqo, o na tu voli e kea mo raica.
17Ia oi au, au na taqomaki iko, ka na sega ni rawa mo ni soli yani vei ira na tamata o rerevaki ira.
18Au na taqomaki iko mo bula ka o na sega ni vakamatei. O na drotaka rawa na nomu bula baleta ni o sa vakadinati au. Sa i Jiova ga sa kaya vakaoqo.
Who We AreWhat We EelieveWhat We Do
2025 by iamachristian.org,Inc All rights reserved.
