1Era sa vakauta mai eso na lami na kai Moapi,
Me i loloma vei koya sa veiliutaki e Jerusalemi.
Era sa kau mai na lami mai Sela,
Ena sala mai na vanua dravuisiga.
2Era sa vaka na manumanu vuka sa sese,
Se na luve ni manumanu vuka sa veiseyaki
Na kai Moapi era sa mai toka ena bati ni uciwai na Arimoni.
3Era sa kaya vei ira na kai Juta,
“Ni taqomaki keimami me vaka e dua na vunikau,
Sa vakarurugi keimami mai na katakata ena siga levu.
Ni laivi keimami me keimami vakarurugi kemuni.
Keimami sa dro mai,
Ni vunitaki keimami me kakua ni dua e raici keimami.
4Ni laivi keimami me keimami tiko kei kemuni,
Ka taqomaki keimami mai vei ira era via vakarusai keimami.”
Na veivakararawataki kei na veivakarusai ena oti.
O ira talega era vakacacana na vanua era na oti yani.
5Ia sa na qai yaco me tui e dua na kawa i Tevita,
Ka na liutaki ira na tamata ena yalodina kei na loloma.
Ena dautotolo me vakayacora na ka dina,
Ka na raica me caka na ka dodonu,
6Era sa kaya na kai Juta,
“Keimami sa rogoca na qaciqacia i Moapi;
Sa dokadoka dina o koya!
Sa kilai na nona viavialevu kei na veivakaisini;
Sa lasu ga na nona tukutukuni koya.
7Era na tagi na kai Moapi
Ena vuku ni leqa era sotava.
Era na tagi ni ra nanuma na keke ni Kiri-erese,
Ka ra na vakasavi ena domobula,
8Sa vakarusai na i teitei volekati Esiponi,
Ka vakarusai na veivaini mai Sipima,
Na veivaini sa caka mai kina na waini,
Sa dau vakamatenitaki ira na i liuliu.
Ena dua na gauna e a tete sara ki Jaseri kei na vanua dravuisiga,
Ka vakakina na ra vaka ki na Waitui Mate.
9Ia oqo au sa tagicaka na waini ni Sipima,
Me vaka na noqu tagicaki Jaseri.
Sa tiri na wai ni mataqu me baleti Esiponi kei Elale,
Baleta ni sa sega tale na vuata me ra marau kina na tamata.
10Sa kau tani na reki kei na marau mai na vanua bulabula ena i teitei.
Ka sa sega na sere e lagati se kaila me rorogo ena veiloganivaini.
Sa sega na daubutu qerepi me caka kina na waini,
Ka sa mudu na kaila ni marau.
11O koya oqo sa tagi kina na yaloqu
me vaka na api me baleti Moapi,
Ka sa luluvu na lomaqu me baleti Kiri Erese.
12Era sa vakaocai ira wale na kai Moapi ena nodra lako yani ki na nodra veicabocabo ni soro ena veidelana kei na nodra lako ki na nodra veivale tabu me ra masu; ia sa sega ni solia e dua na ka vinaka vei ira.
13Sa i koya oqo na i tukutuku e a tukuna e liu na Kalou me baleti Moapi.
14Ia oqo sa qai kaya ko Jiova, “Ena loma ga ni tolu vinaka na yabaki, sa na yali kina vakadua na lagilagi kei Moapi. Veitalia ga na kedra levu; era na lewe lailai sara era na bula, ka ra na malumalumu sara.”
Who We AreWhat We EelieveWhat We Do
2025 by iamachristian.org,Inc All rights reserved.
