1Kemuni na Kalou, ni vakabulai au mai vei ira na kequ meca;
Ni taqomaki au mai vei ira era valuti au.
2Ni vakabulai au mai vei ira na tamata ca o ya;
Ni vagalalataki au mai vei ira na daulaba o ya!
3Ni raica! Era sa wawa toka me ra mokuti au;
Era sa soqoni vata mai na tamata ca me ra veivala kei au.
4E sega ni vakavuna e dua na ka ca, se cala au cakava,
E sega talega ni baleti au se baleta na noqu ca,
Ka ra sa dui cici yani ki na nodra i tutu.
5Ni tucake, i Jiova ni lewevuqa, ka mai vukei au;
Ni raica mada oqo, oi kemuni na nodra Kalou na Isireli!
Ni yadra cake ka totogitaki ira na veimatanitu;
Ni kakua ni vosoti ira na tamata dauveidabui!
6Era lesu tale mai ena yakavi,
Ka tagi voli me vaka na koli ni ra lako voli e lomanikoro.
7Rogoca mada na ka era kaya!
Na yamedra sa vaka na i seleiwau ena gusudra,
Ia era sa kaya, “O cei ena rogoci keda?”
8Ia o ni sa dredrevaki ira Turaga,
O ni sa vakalialiai ira na veimatanitu!
9O ni sa dautaqomaki au,
Au sa maroroi mai vei kemuni;
Kemuni na Kalou, sai kemuni na noqu i drodro.
10Sa daulomani au na noqu Kalou ka na lako mai vei au;
Ena vakayacora me'u raica na nodra vakadrukai na noqu meca.
11Ni kakua ni vakamatei ira na Kalou
me ra kakua ni guilecavi ira kina na kai noqu.
Ni veibiuyaki ira ena nomuni kaukauwa ka vakarusai ira,
Kemuni na Turaga, na neimami i sasabai.
12Sa tu na ca ena tebe ni gusudra; sa ca kecega na nodra vosa;
Me ra vesu mada ga ena nodra viavialevu!
Ena vuku ni nodra ruru kei na vosa lasu,
13Mo ni vakarusai ira kina ena nomuni cudru;
Me ra sa vakarusai vakadua sara ga.
Era sa qai kila na tamata kecega ni sa veiliutaki na Kalou e Isireli,
Ka sa tete yani na nona lewa ki na vuravura taucoko!
14Era sa lesu tale mai na kequ meca ena yakavi
Ka tagi voli me vaka na koli era lako voli ena lomanikoro.
15Era lako voli ena vaqara kakana
Ka vosa kudrukudru ni sega ni levu na ka era kania.
16Ia, au na seretaka ga na nomuni kaukauwa;
Ka'u na seretaka vakadomoilevu na nomuni loloma tudei
ena kida ni dua na mataka vou.
Ni o ni sa dau noqu i drodro,
ka i vakavakaruru ena gauna ni noqu leqa.
17Au na vakacaucautaki kemuni sa dau taqomaki au;
Ni sai kemuni ga, na Kalou, na noqu i drodro,
Io, na Kalou sa dau vakatakila vei au na nona loloma tudei.
Who We AreWhat We EelieveWhat We Do
2025 by iamachristian.org,Inc All rights reserved.
