1Au sa gadreva na nomuni vale tabu, Jiova ni lewevuqa!
Au sa gadreva dina me'u tiko kina!
2Sa guta vakalevu sara na yaloqu na tiko kina!
Io, na tiko ena lomanibai ni vale tabu i Jiova.
Na noqu bula taucoko sa sere voli ga ena reki
vua na Kalou bula.
3O ira sara mada ga na siparo era cakava e dua na nodra sova,
Ka dui tu na nodra vale na kakabace;
Era sa maroroya na luvedra volekata na nomuni cabocabonisoro,
I Jiova ni lewevuqa, na noqu Tui ka noqu Kalou.
4Sa kalougata o ira era tiko ena nomuni vale tabu,
Era sa dau laga sere tikoga ena vakacaucautaki kemuni.
5Sa kalougata o ira o ni sa vu ni nodra kaukauwa,
O ira era sa gadreva me ra lako ki na ulunivanua o Saioni.
6Ia ni ra lakova na buca mamaca o Baka,
Sa mani yaco kina me vanua e levu kina na mataniwai,
Ka sa vakatawana na veimataniwai na uca taumada.
7Sa toso cake ga na nodra kaukauwa ni ra lako voli,
Ka ra na raica na Kalou ni veikalou mai Saioni.
8Ni rogoca na noqu masu, i Jiova ni lewevuqa;
Ni vakarorogo mada na Kalou i Jekope!
9Kemuni na Kalou, ni vakalougatataka na neimami tui,
Na tui o ni a digitaka!
10Sa vinaka cake na noda tiko siga dua ena nomuni Valenisoro
Mai na noda tiko siga dua na udolu ena duatani tale na vanua.
E vinaka cake me'u tiko ena matamata ni vale ni Kalou
Mai na tiko ena nodra vale na tamata ca.
11Sa dau taqomaki keda ko Jiova na Tui dokai,
Ka sa vakalougatataki keda ena vinaka kei na lagilagi.
Sa sega ni bureitaka e dua na ka,
Vei ira era sa cakava na ka e dodonu.
12I Jiova ni lewevuqa,
Sa kalougata ga na tamata era sa vakararavi vei kemuni.
Who We AreWhat We EelieveWhat We Do
2025 by iamachristian.org,Inc All rights reserved.
