1 SAMUELA 16 - Ai Vola Tabu Ena Vakavakadewa Vou（FNV）

Sa Lumuti o Tevita me Tui

1A sa vosa vei Samuela ko Jiova ka kaya, “A cava na dede ni nomu tagicaki Saula tiko, ni'u sa biuti koya me kakua ni nodra tui na Isireli? Mo vakasinaita mada na nomu tavaya ena waiwai olive, ka lako ki Peceliema vua e dua na tamata, na yacana o Jese, ni'u sa digitaka e dua vei iratou na luvena me na tui.”

2A sa taroga o Samuela, “Ena rawa vakacava me'u kitaka oqori? Ni kevaka sa na rogoca o Saula na ka oqo, ena vakamatei au o koya!

A sa kaya ko Jiova, “Mo kauta tiko e dua na luve ni bulumakau yalewa, ka la'ki tukuna ni o sa lako yani ki kea mo ia na vakacaboisoro vei Jiova.

3Mo sureti Jese ki na vakacaboisoro, ka'u na qai vakatakila vei iko na ka mo cakava; ia mo lumuti koya ka'u sa na cavuta vei iko na yacana.”

4A sa kitaka vakakina o Samuela na ka sa kaya vua ko Jiova ka lako yani ki Peceliema. Era a yacoyaco yani na qase ni koro me ra tavaki koya, ka ra sa rere, ka taroga, “Oqo beka e dua na veisiko vinaka, se segai?”

5A sa kaya vei ira, “Io, au sa lako mai ena yalo vakacegu me'u mai vakacaboisoro vei Jiova. Mo ni vakasavasavataki kemuni, ka gole mai vata kei au ki na vakacaboisoro.” E a tukuna talega vei Jese kei iratou na luvena me ratou vakasavasavataki iratou, ka sureti iratou yani ki na vakacaboisoro.

6Ia ni ratou yaco yani, a sa raici Iliavi na luvei Jese o Samuela ka kaya sara ki lomana, “Sa tu vakaidina e mata i Jiova oqo o koya ka sa digitaka ko Jiova.”

7Ia sa kaya vei Samuela ko Jiova, “Mo kakua ni digitaka na i tuvaki ni kena i rairai se na kena balavu. Au sa sega ni digitaki koya baleta ni'u sa sega ni vakatulewa ena lewa vakatamata. Era sa raica ga na tamata na i rairai e taudaku, ia au sa dikeva na yalona.”

8A kacivi Apinatapi o Jese, me lako mai vei Samuela. Ia sa kaya o Samuela, “E sega, sa sega talega ni digitaki koya ko Jiova.”

9Sa qai kauti Sama mai o Jese. A sa kaya o Samuela, “O koya talega oqo sa sega ni digitaki koya ko Jiova.”

10A sa kauta mai o Jese e lewe vitu na luvena tagane me ratou rairai ena mata i Samuela, ka sa kaya o Samuela vei Jese, “Sa sega ni digitaka e dua vei iratou oqo ko Jiova.”

11A sa qai tarogi Jese o Samuela, “Sa o iratou kece li oqo na luvemu tagane?”

A sauma o Jese ka kaya, “E sa vo tikoga o koya ka gone duadua sara, ia e vakatawa sipi tiko o koya.”

A sa kaya vua o Samuela, “Mo tala mada e dua me la'ki kauti koya mai. E datou na sega ni vakacabora na i soro me yacova ni sa yaco mai o koya.”

12A talatala o Jese, ka mani lako mai o Tevita. Oqo e dua na cauravou lailai musudonu, ka bulabula, ka serau vinaka na yaloka ni matana. Sa qai kaya ko Jiova vei Samuela, “Sai koya oqo. Mo tu cake ka lumuti koya!”

13A taura na tavaya waiwai o Samuela, ka lumuti Tevita e matadratou na tuakana. Ena gauna vata ga o ya, sa curumi koya kina na yalo i Jiova, ka sa tiko vata kei koya me vakatekivu mai na siga o ya ka lako yani. A sa qai lesu tale i Rama o Samuela.

Sa Dauqiri Api o Tevita vei Saula

14Ia oqo, a takali tani mai vei Saula na Yalo i Jiova, ka solia vua ko Jiova e dua na yalo ca me dau vakarerei koya.

15Era a qai kaya vei Saula o ira na nona tamata, “Raica, sa dau vakarerei kemuni e dua na yalo ca sa tala mai na Kalou.

16Ni tukuna saka mai na i vakaro me keimami vakasaqara e dua na tamata dauqiri api. Ena gauna e basika tale mai kina na yalo ca vei kemuni, na dauqiriqiri oqo me qai qiria na nona api, ka o ni na qai kune vakacegu tale kina.”

17A qai kaya o Saula vei ira na nona tamata, “Ni kauta mai vei au e dua na tamata dauqiriqiri vinaka.

18A qai vosa e dua vei ira na cauravou, ka kaya, “Raica, au kila tiko e dua na luve i Jese na kai Peceliema, ka dauniqiriqiri, e tamata kaukauwa ka qaqa o koya ka tamata talega ni valu, e vuku ena vosa, ka tamata musudonu, ka sa kaya ko Jiova.

19A qai tala eso na tamata vei Jese o Saula, ka kaya, “Mo talai Tevita mai vei au, na luvemu ka vakatawa sipi tiko”.

20A kauta o Jese e dua na asa ka usa madrai, kei na dua na bola waini sinai, dua na luve ni me, ka talai Tevita na luvena me kauta cake vei Saula.

21A lako mai vei Saula o Tevita me qaravi koya. A lomani koya vakalevu o Saula ka lesi koya me dau colata na nona i yaragi.

22A qai talatala vei Jese o Saula, ka kaya, “Mo vakadonuya me qaravi au tiko mada o Tevita; ni sa donu e mataqu o koya”.

23Ia ni dau curumi Saula na yalo ca a dau taura sara na api o Tevita, ka qiria e ligana: a sa dau la'ki vakacegu kina o Saula, ka kauta tani mai vua na yalo ca.