1Sa yaco tale vei au na vosa i Jiova, ka vaka:
2A cava li na kena i balebale na nomu mai cavuta tale tiko na vosa vakaibalebale oqo me baleta na vanua o Isireli?
‘O ira na qase sa kania na qerepi wiwi,
Ia, sa wiwi ga kina na batidra na luvedra.’
3A kaya ko Jiova, “Me vaka na dina ni noqu bula, me kakua ni taurivaki tale na vosa vakaibalebale oqo e Isireli.
4Raica, era sa noqu na yalo bula kecega; na yalo i tamana, ka vakakina na yalo i luvena, sa noqu; ia na yalo ga sai valavala ca ena mate.
5“Kevaka sa yalododonu e dua na tamata, ka cakava na ka sa dodonu ka vinaka
6ka sega ni la'ki kana ena veiulunivanua, se tacake ki na nodra matakau na mataqali i Isireli, se veibutakoci vata kaya na watina na kai nona, se mocera e dua na yalewa sa tauva na kena mate vakamarama,
7ka sega ni vakasaurarataka e dua, ka vakauta tale na kena i vakadinadina vua a kerea e dua na ka me i vakadei, ka sega ni butako, soli kakana vua sa viakana, ka vakaisulutaki koya ena i sulu e dua sa luvawale,
8ka sega ni soli i lavo me dinautaki ka vakatubu i lavo se taura na tubu e sivia, ka sa tarova na ligana mai na caka cala, ka sa lewa vakadodonu, vei ira na tamata,
9sa muria na noqu vunau, ka sa vakabauta na noqu lewa ni sa yalododonu: e sa na bula vakaidina o koya, sa kaya na Kalou ko Jiova.
10“Kevaka ena sucu na luvena tagane ka daubutako, ka dau vakadave dra,
11ka sega ni cakava e dua vei ira na veicakacaka oqo, ia ka sa na kana ena veiulunivanua, ka butakoca na watina na kai nona,
12ka vakasaurarataka na dravudravua kei na luveniyali, ka na butako; ka sega ni vakasuka na i vakadei ni yalayala, tacake na matana ki na veimatakau, cakava na ka vakasisila, ka solia na dinau ka vakatubu vakailavo,
13se tubu levu sivia; ena bula li o koya? Ena sega ni bula. Sa cakava o koya na veika vakasisila kecega oqo; ena baleti koya ga na nona mate.
14“Ia kevaka sa sucu e dua na luvena tagane, ka sa raica kecega na i valavala ca sa cakava o tamana, ka sa vakasamataka ka sega ni vakamurimuri tamana ena nona i valavala ca,
15ka sa sega ni kana ena veiulunivanua, se tacake na matana ki na veimatakau ni mataqali i Isireli, se butakoca na watina na kai nona,
16se sega ni vakacacana e dua, se vakasuka tale na i vakadinadina ni vakadei, se sega ni butako, ia ka solia ga na kakana vua sa viakana, ka vakaisulutaki koya sa luvawale,
17ka tarova na ligana mai na caka cala ka sega ni taura na tubu vakailavo, se tubu sivia; ka sa vakayacora na noqu lewa, ka sa muria na noqu vunau; ena sega ni mate o koya oqo ena vuku ni caka cala i tamana; sa na bula vakaidina.
18Ia na tamana, ena vuku ni nona dauveivakasaurarataki, butakoca na i yau i tacina, ka cakava na veika tawa dodonu vei ira na kai nona, raica, ena mate vakaidina o koya ena vuku ni nona caka cala.
19“Ia o ni qai kaya, ‘A cava li me la'ki sega kina ni nona na kena ca na luvena ena vuku ni cala i tamana?’ Kevaka sa cakava na luvena na ka dodonu ka vinaka, ka qarauna ka vakabauta kecega na noqu vunau, ka cakava: ena bula vakaidina o koya.
20Na yalo sai valavala ca ena mate ga. Ena sega ni cudruvi na gone ena vuku ni cala i tamana; na tamana talega ena sega ni cudruvi ena vuku ni caka cala i na luvena. A nona caka dodonu na nona yalododonu ena tu ga vua, kei na nona cala na tamata ca ena tu ga vua.
21“Ia kevaka ena saumaki mai na tamata ca mai na i valavala ca kecega sa kitaka, ka vakabauta kecega na noqu vunau, ka cakava na ka sa dodonu ka vinaka, ena bula vakaidina o koya, ena sega ni mate.
22Na nona talaidredre kecega ena sega ni nanumi mai me baleti koya; ena bula ga o koya ena vuku ni nona i valavala dodonu.
23Au bau marautaka li na nona sa mate e dua na tamata ca?” sa kaya ko Jiova. E vinaka cake vei au me saumaki mai o koya mai na nona sala ca ka me bula.
24“Ia ni sa gole tani na tamata yalododonu, mai na nona caka dodonu, ka kitaka na ka ca me vaka na i valavala vakasisila kecega sa cakava na tamata ca, ena bula li o koya? A nona i valavala dodonu kece sa cakava oti, ena sega ni nanumi tale: na talaidredre a talaidredre kina, kei na nona i valavala ca sai valavala ca kina, ena mate ga kina o koya.
25“Ia, o ni kaya, ‘Sa sega ni dodonu na lewa i Jiova.’ Ni rogoca mada, oi kemuni na mataqali i Isireli: Sa sega li ni dodonu na noqu lewa?
26Ni sa vuki na tamata yalododonu mai na nona caka dodonu, ka sa la'ki cakava na ka ca, ena mate ena vuku ni ka ca sa cakava.
27Ia ni sa saumaki mai na tamata ca mai na nona ca a kitaka, ka cakava na ka dodonu, ena vakabulai o koya.
28Ni sa vakasamataka, ka saumaki mai na nona i valavala ca kecega, ena bula vakaidina o koya; ena sega ni mate.
29Ia oqo o ni qai kaya tikoga na mataqali i Isireli, ‘Sa sega ni dodonu na lewa i Jiova.’ Oi kemuni na mataqali i Isireli, E sega beka li ni tawa dodonu na nomuni lewa?
30“O koya oqo ka'u sa vakataulewa yadudua kina vei kemuni na mataqali i Isireli, me vaka na nomuni i valavala yadudua, sa kaya na Kalou ko Jiova. Ni veivutuni ka saumaki mada mai na nomuni i valavala ca kecega, de o ni na qai rusa ena vuku ni nomuni cala.
31Biuta laivi sara na nomu i valavala ca kecega o ni a cala kina vei au, ka vakavouia na lomamuni kei na yalomuni! A cava li o ni via mate kina, oi kemuni na mataqali i Isireli?
32Ni'u sa sega ni taleitaka se marautaka na nona mate e dua na tamata, sa kaya na Kalou ko Jiova. “O koya oqo, mo ni saumaki mada mai, mo ni bula kina.”
Who We AreWhat We EelieveWhat We Do
2025 by iamachristian.org,Inc All rights reserved.
