1Ni lako mai na veimatanitu kece ka mai rogoca.
Ni toro mai na veimatatamata mo ni mai vakarorogo.
Me ra lako mai na tamata yadua e vuravura taucoko me ra mai rogoca.
2Sa cudruva ko Jiova na veimatanitu kecega,
Kei na dui nodra mataivalu kece sara.
Sa tukuna ni ra sa na rusa,
Ka sa soli ira yani me ra vakamatei.
3Na yagodra ena sega ni bulu,
Ia ena tu ga me boi ca ka vuca e kea;
Ka sa na drodro yani mai na veiulunivanua na nodra dra.
4 Maciu 24.29; Mari 13.25; Luke 21.26; Vtaki 6.13,14 Ena vurumemea na matanisiga, na vula, kei na kalokalo,
Ka na vivigi na lomalagi me vaka na i vola vivigi;
Era na qeqera na veikalokalo me vaka na drau ni kau
Era lutu mai na dua na vunivaini se vunilolo
5 Aisea 63.1-6; Jere 49.7-22; Isi 25.12-14; 35.1-15; Emo 1.11,12; Ope 1-14; Mala 1.2-5 Sa vakarautaka na Turaga na nona i seleiwau mai lomalagi.
Ia oqo sa na mokuti Itomi,
O ira na tamata sa lewa me ra rusa.
6Ena ubia na nona i seleiwau na nodra dra kei na uro,
Me vaka na dra kei na uro ni sipi kei na me e vakacabori,
Sa na vakacabora e dua na i soro ko Jiova mai Pasara,
Ena cakava na ka oqo
Me dua na moku levu mai na vanua o Itomi.
7Era na bale na bulumakau kila
Kei na bulumakau tagane gone,
Sa na damudamu na vuravura ena dra
Ka ubia na nodra uro.
8Sa i koya oqo na siga
Ena sereki Saioni kina ko Jiova,
Ka sauma lesu na veika ca
Vei ira na nona meca.
9Ena vuki na veiuciwai kei Itomi
Me kuluta loaloa dregadregata,
Ka vuki na qele me sulifure dau kama.
Ena kama vaka na kuluta na vuravura taucoko.
10 Vtaki 14.11; 19.3 Ena kama ena siga kei na bogi,
Ka na kubou tu ka tawa mudu.
Ena lala tu na vanua ena veitabagauna,
Ka na sega sara ni dua e bau lako kosova tale.
11Era na qai taukena na lulu kei na reveni.
Ena qai vukica tale ko Jiova me vanua mate,
Me vaka ni a sa bera ni buli na vuravura.
12Ena sega tale na tui me na lewa na matanitu o ya,
Ka ra na yali yani o ira na kena veituraga.
13Era na tubu na soni kei na wa-vakavotona
Ena veivalenitui kece kei na veikoro vakabai,
Ka ra na tawana na jekeli kei na lulu.
14Era na dauveilakoyaki kina na manumanu kila,
Ka ra veikacivi vakai ira na me-tevoro.
Ena tiko talega kina na yalewa-tevoro o Lilica,
Me kunea e dua na vanua me vakacegu kina.
15Era na tara na nodra sova e kea na lulu,
ka ra vakayaloka kina;
Era na dirika na nodra yaloka
ka susugi ira cake kina na luvedra.
Era na lako talega yani kina na manulevu,
Ka ra na dui lako vata yani kei na kedra i sa.
16Dikeva mada ka wilika na i vola i Jiova
me baleta na veika bula.
Ena sega ni dua vei ira na manumanu oqo ena yali;
ka na sega ni dua ena sega na kena i sa.
Sa vakarota ko Jiova me vakakina,
ni sai koya talega ena kauti ira vata mai.
17Ko Jiova ga ena wasea vei ira na vanua,
ka na solia vei ira yadua na nodra i votavota.
Era na tawana tiko ena veitabagauna,
ka na nodra tiko ka tawa mudu.
Who We AreWhat We EelieveWhat We Do
2025 by iamachristian.org,Inc All rights reserved.
