1Ia o Kora na luve i Isari, mai na kawa i Livai na luve i Koaca, sa saqata na veiliutaki nei Mosese. E ratou a tomani Kora na lewe tolu mai na mataqali Rupeni: o rau o Tecani kei Epairami na luve i Iliavi, kei Oni na luve i Peleci.Juta 11
2E ratou sa tucake vata ena mata i Mosese kei ira na i liuliu digitaki ka rogo mai vei ira na Isireli ka 250 taucoko na kedra i wiliwili.
3Era sa soqoni vata me beitaki rau o Mosese kei Eroni, ka ra kaya vei rau, “Drau sa rui viavialevu! Era sa savasava o ira yadua sara na lewenivanua taucoko, ka sa tiko kei ira ko Jiova. A cava na vuna o drau sa rui vakalevulevui kemudrau cake kina vei ira na lewenivanua i Jiova?”
4Ia ni sa rogoca o Mosese, sa cuva vakatoboicu;
5a sa kaya vei Kora kei ira kecega na nona i tokani, “Ni mataka, ena vakatakila vei keda ko Jiova se o cei e nona, se o cei sa savasava, ka na toroi koya voleka yani vua; ia o koya sa digitaka o koya ena toroi koya voleka vua.
6Mo ni vakayacora na ka oqo; Ni taura eso na bilo ni buka, o Kora kei kemuni kecega na nona i lawalawa;
7ka biuta kina na bukawaqa ni mataka, ka vakama kina na ka boi vinaka ena mata i Jiova: ia na tamata ga sa digitaka ko Jiova, sai koya ga sa savasava. O ni sa rui viavialevu oi kemuni na luve i Livai!”
8A sa kaya tale vei Kora o Mosese, “Ni rogoca mada oqo na luve i Livai:
9sa ka lailai beka vei kemuni ni sa tawasei kemuni o koya na Kalou ni Isireli mai vei ira na lewenivanua e Isireli me kauti kemuni voleka vua, mo ni cakacaka ena Vale i Jiova, ka me tu e matadra na lewenivanua ka qaravi ira;
10ka sa kauti iko voleka vua vata kei ira kecega na wekamu na luve i Livai? Ia, oqo o sa vinakata talega na i tutu vakabete?
11Ena gauna dou sa kudruvaki Eroni kina, mo dou kila ni sai Jiova o ni sa kudruvaka ka saqata voli vata kei ira kecega na nomu i lawalawa.”
12Sa qai talatala o Mosese me kacivi mai o Tecani kei Epairami, o rau na luve i Iliavi; ka rau sa kaya mai, “Keirau na sega ni lako cake yani.
13E se takiveiyaga beka na nomu kauti keimami tani mai na vanua sautu o Ijipita ka me keimami mai mate kina ena vanua lala oqo? O vinakata talega mo mai liutaki keimami, mo neimami turaga?
14Sa sega dina ga ni o kauti keimami ki na vanua sa dave kina na wai ni sucu kei na oni me neimami, ia oqo o sa qai via lawakitaki keimami. Keirau na sega ni lako yani.”
15A sa cudru vakalevu o Mosese, ka kaya vei Jiova, “Mo ni kakua ni vakadonuya na nodra i madrali. Au na sega mada ni kovea e dua na asa mai vei ira, ka sega talega ni vakacacana e dua vei ira.”
16A sa kaya tale vei Kora o Mosese, “Ni mataka mo ni mai tiko ena mata i Jiova, o Eroni, o iko kei ira kece na nomu i lawalawa;
17ia mo ni kauta mai na nomuni dui miqa ni buka, biuta kina na ka boi vinaka ka dui cabora ena mata i Jiova e 250 na miqa ka vaka talega kina o kemudrau kei Eroni.”
18Era sa taura na tamata yadua na nona miqa ni buka ka biuta kina na bukawaqa, ka vakama kina na ka boi vinaka, ka tucake vata kei rau o Mosese, kei Eroni mai na katuba ni Vale ni Veitavaki.
19Sa qai vakasoqoni ira vata na lewenivanua taucoko o Kora ki na katuba ni Vale ni Veitavaki, me veileti kei rau. A sa rairai mai na serau i Jiova vei ira na lewenivanua taucoko.
20A sa kaya ko Jiova vei rau o Mosese kei Eroni,
21“Drau tucake vakatikitiki tani mai na lewenivanua oqo, me'u vakarusai ira ena gauna sara ga oqo.”
22E rau sa cuva vakatoboicu, ka kaya, “Kemuni na Kalou, na Kalou ni yalo ni tamata kecega: O ni sa cudruvi ira li na lewenivanua taucoko ni sai valavala ca e duabulu wale ga na tamata?”
23A sa kaya vei Mosese ko Jiova,
24“Mo vosa vei ira na lewenivanua ka kaya, Ni lako tani sara mai na veiyasa ni vale i Kora, i Tecani, kei Epairami.”
25Sa qai cavutu o Mosese ka lako vei Tecani kei Epairami; ka ra muri koya o ira na qase ni Isireli.
26Sa qai kaya vei ira na lewenivanua, “Ni lako tani, au sa masuti kemuni, mai na nodra veivalelaca na tamata ca oqo, ka kakua ni tara e dua na nodra i yaya, de o ni vakarusai kina ena vuku ni nodra i valavala ca.”
27Era sa lako tani kina mai na veiyasa ni vale i Kora,
Tecani kei Epairami; sa qai curu mai o Tecani kei Epairami; ka mai tu ena katuba ni nodrau valelaca, vata kei na watidrau kei na luvedrau.
28A sa kaya o Mosese, “Ena ka oqo, o ni na kila kina ni sa talai au ko Jiova, me'u cakava na veika oqo, ka sega ni noqu lewa ga vakataki au me'u cakava kina.
29Kevaka eratou mate o iratou oqo ena vuku ni nodratou sa qase ka sega ena cudru i Jiova, ia sa sega ni talai au mai ko Jiova.
30Ia kevaka sa cakava e dua na ka vou ko Jiova, ka sa tadola na vanua ka tilomi iratou vata kei na veika kece eratou taukena; ka ra sa buluti bulabula sobu yani ki Etesi, o ni na qai kila kina ni sa vakacudrui Jiova na tamata oqo.”
31Ia ni sa vosataka oti o Mosese na vosa kecega oqo, sa qai kavida rua na vanua era tu kina;
32ka dalaga na gusuna na vanua, ka tilomi ira kina kei na nodra veivale, kei na tamata kecega sa tiko kei Kora kei na nodra i yaya kecega.
33Ia o ira kei na ka kecega era taukena, sa lutu bulabula sobu yani ki Etesi, ka sa tasogo tale na vanua; ka ra sa yali vakadua sara mai na nodra i tikotiko na lewenivanua.
34Ia era sa dro o ira na Isireli ena vuku ni nodra tagi na vakarusai, ni ra sa kaya, “De tilomi keda talega na vanua.”
35A sa lako mai vei Jiova na bukawaqa, ka kani ira era lewe 250 na tamata era sa cabora tiko na ka boi vinaka.
Na i Yaya ni Vakamakama Cabocabonisoro36Sa kaya vei Mosese ko Jiova,
37“Mo vosa vei Iliesa na luve i Eroni na bete, me ra la'ki kauta mai na bilo kecega ni ka boi vinaka mai na vanua sa kama kina, ka talaraka mai kea na bukawaqa ka kaburaka yani vakatikitiki.
38Ni sa ka tabu na miqa ni ka boi vinaka ka nodra na tamata oqo, ia era sai valavala ca ga o ira ka vakayalia kina na nodra bula. Me qai tukilaki me raraba na miqa me i botani ni ubi ni cabocabonisoro, ka ni ra sa vakacabora na bilo kece oqo ena mata i Jiova; o koya era sa tabu kina. A sai vakananumi tiko vei ira na Isireli.”
39A sa kauta o Iliesa na bete na veimiqa parasa ni ka boi vinaka ka ra vakacabora o ira sa kama; ka ra tukilaka me i botani ni ubi ni cabocabonisoro,
40me i vakananumi tiko vei ira na Isireli me kakua sara ni dua sa sega ni bete se sega talega ni kawa i Eroni, me toro voleka mai me cabora na ka boi vinaka ena mata i Jiova, de na qai vakataki Kora kei na nona i lawalawa me vaka sa vosa oti kina ko Jiova vei Iliesa mai na gusu i Mosese.
41Ia ena mataka ka tarava, era sa kudruvaki rau o Mosese kei Eroni na lewenivanua taucoko e Isireli, ka ra kaya, “Drau sa vakamatei ira na tamata i Jiova.”
42Ia ni sa soqoni vata tu na lewenivanua me ra vorati rau o Mosese kei Eroni, era sa qai rai yani vaka ki na Vale ni Veitavaki; ka raica sa ubia tu na o, ka sa rairai mai na i serau i Jiova.
43E rau sa qai lako mai ki na mata ni Vale ni Veitavaki o Mosese kei Eroni.
44A sa kaya vei Mosese ko Jiova,
45“Mo drau lako tani vakatikitiki mai vei ira na lewenivanua oqo, me'u vakarusai ira ena gauna sara ga oqo.” E rau sa qai cuva vakatoboicu.
46Sa kaya vei Eroni o Mosese, “Mo taura na nomu miqa ni buka, ka biuta kina na bukawaqa mai na i cabocabonisoro, ka vakama kina na ka boi vinaka, ka tubera vakusakusa yani vei ira na lewenivanua, ka sorovaki ira; ka ni sa lako yani na cudru mai vei Jiova, ka tekivu na mate levu.”
47Sa qai kauta o Eroni me vaka ka kaya o Mosese, ka raica, sa vakatekivu tiko na mate levu vei ira na tamata; sa vakama o koya na ka boi vinaka, ka sorovaki ira na tamata.
48A sa tu o Eroni ena kedra maliwa na mate kei na bula; ka sa mudu na mate levu.
49Ia o ira ka ciba ena mate levu, era sa lewe 14,700, ka sega ni wili kina o ira na mate ena vuku i Kora.
50Sa qai lesu vei Mosese o Eroni ki na katuba ni Vale ni Veitavaki, ni sa oti na mate levu.
Who We AreWhat We EelieveWhat We Do
2025 by iamachristian.org,Inc All rights reserved.
