1Mo mata cake, i Jerusalemi, ka cila vaka na siga;
Sa serauni iko na lagilagi i Jiova!
2Na veimatanitu tale eso ena tabonaki ena butobuto;
Na ramase ni nona i serau ena tiko vata kei iko.
3Na veimatanitu era na vakayarayarataki mai ki na nomu rarama,
Kei ira na tui ki na kida ni nomu siga vou.
4Rai wavoki mada ka raica na ka sa yaco:
Era sa soqoni vata na luvemu
Me ra lesu mai vei iko.
Era na lako mai na luvemu tagane
Mai na vanua yawa
Ka ra na colati na luvemu goneyalewa
Me vakataki ira na gone.
5O na raica na ka oqo ka vakasinaiti ena marau,
O na kaikaila ena marau.
Na i yau ni veimatanitu ena kau mai vei iko
Kei na i yau mai na wasawasa.
6Ena levu sara na kameli era na lako mai vei iko mai Mitiani kei Ifa.
Era na lako mai o ira mai Sipa,
Ka ra na kauta mai na koula
Kei na ferekiniseni;
Era na mai tukuna na tamata na i tukutuku vinaka
Ni ka e sa cakava na Kalou.
7Era na kau mai vei iko na sipi kece ni Kitari kei Nepeioci me i soro kama
Ka ra mai cabo ena i cabocabonisoro
Me yalovinaka kina ko Jiova.
8Na cava sa lako mai oqo me vaka na o,
Se na qele ni ruve ni ra lesu ki na nodra i tikotiko?
9Sa i ira oqori na waqa era lako mai na veivanua yawa,
Era kauti ira mai na tamata ni Kalou ki na nodra vanua.
Era sa kauta vata mai kei ira na siliva kei na koula
Me vakarokorokotaki kina na yaca i Jiova
Na Kalou Yalosavasava ni Isireli,
O koya sa cakava me ra dokai ira
Na nona tamata na veimatanitu kece.
10A sa kaya ko Jiova ki Jerusalemi,
“Era na tara na kemu bai na kai veimatanitu tani
Ka ra na qaravi iko ena noqu vinaka kei na noqu loloma.
11 Vtaki 21.25,26 Ena dola tu ga na nomu matamata ena siga kei na bogi,
Me ra kauta mai kina vei iko na tui ni veimatanitu na nodra i yau.
12Ia na matanitu ena sega ni qaravi iko
Ena vakarusai vakadua sara.
13Na i yau kei Lepanoni ena kau mai vei iko.
Na damanu, na paini kei na dilo
Me mai vakarairaivinakataki kina na noqu vale tabu,
Me lagilagi kina na i tutu ni yavaqu.
14 Vtaki 3.9 Era na lako mai na luvedra era vakasaurarataki iko,
Ka ra mai cuva sobu me ra vakarokoroko
Kei ira kece era beci iko era sa na qaravi iko.
Era na vakatokai iko me yacamu ‘Na koro ni Turaga’
O ‘Saioni na koro ni Kalou Yalosavasava ni Isireli.’
15O na sega tale ni cati se biu wale tu,
Me dua na koro sa vakalalai ka lala tu.
Au na cakava tale me koro levu ka rairai vinaka
Ka mo vanua ni marau ka sega ni mudu.
16Era na qaravi iko na veimatanitu kei na tui e vuqa
Me vaka e dua na tina sa qarava na luvena.
O na qai kila ni sai au ko Jiova
O koya a vakabulai iko.
Ni sai koya na nodra Kalou Kaukauwa na Isireli
O koya sa sereki iko.
17Au na kauta mai vei iko na koula me i sosomi ni parasa
Na siliva mei sosomi ni kaukamea
Kei na parasa me i sosomi ni kau.
Era sa na sega tale ni qai vakasaurarataki iko na nomuni i liuliu.
Au na cakava me ra liutaki iko
Ena dodonu kei na sautu.
18Ena sega tale ni rogoci vakadua
Na i rogorogo ni tovo kaukauwa
Ka na sega tale ni vakarusai na nomu vanua.
Au na viribaiti iko ka taqomaki iko me vaka e dua na bai,
O na qai vakacaucautaki au ni'u sa vakabulai iko.
19 Vtaki 21.23; 22.5 Na matanisiga ena sega tale ni qai nomu rarama ena siga
Se na vula me nomu rarama ena bogi;
Oi au, ko Jiova, ka'u na nomu rarama tawamudu;
Ena vakararamataki iko na i serau ni noqu i ukuuku.
20Sa na oti na nomu gauna ni rarawa
Ka'u sa na nomu rarama tawa mudu oi au ko Jiova.
Au na dede cake mai na matanisiga kei na vula.
21O ira kece na luvemu era na cakava na ka dodonu
Ka taukena na vanua ka tawa mudu.
Au a tei ira, ka buli ira,
Me'u vakaraitaka na noqu cecere vei ira kece.
22Na nomu vuvale lailai ka yalo malua duadua sara mada ga
Ena yaco me levu me vaka e dua na matanitu qaqa.
Au na cakava me yaco mai vakatotolo na ka oqo
Ni sa yaco na kena gauna dodonu.
Oi au ko Jiova.
Who We AreWhat We EelieveWhat We Do
2025 by iamachristian.org,Inc All rights reserved.
