MARIKA 16 - Ai Vola Tabu Ena Vakavakadewa Vou（FNV）

Na Tucake Tale i Jisu mai na Mate(Maciu 28.1-8; Luke 24.1-12; Joni 20.1-10)

1Ena yakavi ni siga ka dua, ni sa oti na Siga ni Vakacecegu, e ratou sa qai voli waiwai vakaisaluwaki o Meri na yalewa ni Makitala, kei Meri na tina i Jemesa, kei Salome, me ratou la'ki lumuta kina na yago i Jisu.

2Ia ena mataka lailai ena siga ka tarava, ni se qai cabe na siga, e ratou sa lako sara ki na i bulubulu.

3E ratou a veikayaka vakai iratou se o cei mada ena vaqiqica tani na vatu mai na gusu ni bulubulu.

4Ia ni ratou qai rai yani, ki na i bulubulu e ratou sa raica sara ni sa qiqi tani tu na vatu. (Ia sa bau vatu levu dina sara ga na vatu o ya.)

5Ni ratou sa curu yani ki na i bulubulu, e ratou sa raica sara e dua na cauravou ni dabe toka e yasa i matau, ka vakaisulu balavu vulavula; ka ratou sa kidroa vakalevu sara.

6A qai kaya o koya vei iratou, “Dou kakua ni rere; o dou sa mai vakasaqarai Jisu li na kai Nasareci, o koya ka a lauvako ena kauveilatai? Sa sega eke o koya; sa tucake tale; dou mai raica na vanua ka a vakotori kina!

7Ia dou lako ka tukuna vei iratou na nona tisaipeli, kei Pita talega, ni sa liu o koya ki Kalili; dou na raici koya e kea, me vaka ga e sa tukuna tu vei kemudou.”Maciu 26.32; Mari 14.28

8E ratou sa qai curu ki tuba ka dro tani mai na i bulubulu ka ratou sa taqaya ka sautaninini. E ratou a sega ni kaya e dua na ka vua e dua na tamata ena levu ni nodratou rere.

Sa Rairai ko Jisu vei Meri na Yalewa ni Makitala(Maciu 28.9-10; Joni 20.11-18)

9Ni sa tucake tale mai na mate ko Jisu ena mataka caca ni matai ni siga ni macawa, a sa rairai taumada vei Meri na yalewa ni Makitala, o koya ka a vakasava tani mai vua ko Jisu e vitu na tevoro.

10Sa qai lako yani o Meri ka tukuna vei ira na i tokani i Jisu era a tagi ka vakaloloku tiko.

11Ni ra sa rogoca vua ni sa bula tale ko Jisu ka ni a sa rairai oti ki vua, era sa qai sega ni vakadinati koya.

Sa Rairai ko Jisu vei Rau e Lewe Rua na Tisaipeli(Luke 24.13-35)

12Ia ni sa oti o ya, sa qai rairai tale ko Jisu vei rau e lewe rua vei ira na nona i tokani ena nodrau i lakolako ki loma ni vanua, ka sa dua tani tale kina na kena i rairai.

13E rau sa qai lesu tale ka la'ki tukuna vei ira na kena vo; ia era a sega ga ni vakabauti rau.

Sa Rairai ko Jisu vei Iratou na Lewe Tinikadua(Maciu 28.16-20; Luke 24.36-49; Joni 20.19-23; Caka 1.6-8)

14E muri, sa qai rairai vei iratou na lewe tinikadua ni ratou kana tiko; ka qai vosataki iratou ena nodratou tawa vakabauta kei na kaukauwa ni lomadratou, ni ratou a sega ni vakabauti ira ka sa raici koya oti ni sa tucake tale.

15Sa qai kaya vei iratou, “Dou lako ki vuravura taucoko ka vunautaka na i Tukutuku Vinaka kivei ira na tamata kecega.Caka 1.8

16O koya e vakabauta ka papitaisotaki ena vakabulai; ia o koya e sega ni vakabauta, ena vakarusai.

17O ira na vakabauta, era na cakava na veicakacaka mana oqo; era na vakasava tani na tevoro ena yacaqu; era na tukuna na veivosa eso era a sega ni kila e liu;

18ia kevaka era taura na gata bati gaga, se gunuva e dua na wai gaga ka rawa kina na mate, ena sega ni vakacacani ira; era na tarai ira talega na tauvimate ka vakabulai ira.”

Sa Kau Cake ki Lomalagi ko Jisu(Luke 24.50-53; Caka 1.9-11)

19Ia ni sa vosa oti vei iratou, na Turaga ko Jisu, sa qai kau cake ki lomalagi, ka la'ki tiko sobu ena liga i matau ni Kalou.Caka 1.9-11

20E ratou sa qai lako na tisaipeli ka vunau ena veivanua kecega, ka sa cakacaka vata tiko kei iratou na Turaga, ka vakadeitaka na nodratou vosa ena veicakacaka mana e vuqa.