SAME 36 - Ai Vola Tabu Ena Vakavakadewa Vou（FNV）

Na i Tovo Ca ni TamataVua na i liuliu ni sere. A nei Tevita na tamata i Jiova.

1 Roma 3.18 Sa vosa na i valavala ca ki na vu ni yalona na tamata ca,

Sa vakanadakuya kina na Kalou ka sega ni rokova.

2Sa dau dokai koya ga vakaikoya ena nona vakasama,

Ka nanuma ni na sega ni kunea na nona i valavala ca na Kalou,

ka vakarusa.

3Sa ca na nona vosa ka sa sinai ga ena lasu;

Sa sega ni vuku rawa me cakava na ka vinaka.

4Sa dau nakita na veika ca ena nona i davodavo;

Sa sega ni vinaka na nona i tovo,

Ka sa sega ni cata na ka ca.

Na Vinaka ni Kalou

5Kemuni Jiova, sa yaco sara ki lomalagi na nomuni loloma tudei,

Ka sa tete yani ki na maliwa lala na nomuni yalodina.

6Sa cecere na nomuni yalododonu me vaka na veiulunivanua;

Na nomuni lewa sa vaka na wasa titobu.

O ni sa maroroya talega na bula ni tamata kei na manumanu.

7Sa ka talei dina na nomuni loloma tudei.

Na tamata kecega era sa kunea na nodra taqomaki

ena yaloyalo ni tabamuni.

8Era sa vakamamautaki ena levu ni ka sa tu ena nomuni vale;

Ka o ni sa solia me ra gunu mai na uciwai ni nomuni vinaka.

9Sa i kemuni sa vakavuna na bula kecega,

Ka keimami sa raica rawa na rarama mai na nomuni rarama.

10Ni lomani ira tikoga era sa kilai kemuni,

Ka cakava na ka vinaka vei ira sa yalododonu.

11Ni kakua ni laivi ira na tamata viavialevu me ravuti au,

Se o ira na tamata ca me ra vakasavi au tani.

12Ni raica mada na vanua era sa bale kina na tamata ca.

Era na bale e kea ka sega ni tucake rawa tale.