JOPE 33 - Ai Vola Tabu Ena Vakavakadewa Vou（FNV）

1Ia oqo, Jope, mo vakarogoca vakavinaka sara na ka kece au na tukuna.

2Au sa na tukuna yani na ka sara ga ka tiko ena noqu vakasama.

3Na noqu vosa taucoko sara ga e dina,

Ka dina sara talega na ka au kainaka tiko.

4E a buli au na yalo ni Kalou ka solia vei au na bula.

5Mo sauma mai na noqu vosa,

Kevaka o rawata.

Vakarautaka na nomu i le.

6O iko vata kei au, Jope,

E daru tautauvata sara ga ena mata ni Kalou,

E daru a buli ruarua ga mai na qele.

7Sa sega kina na nomu ulubale mo rerevaki au kina;

Ka'u na sega ni vakamalumalumutaki iko.

8Oqo na veika au a rogoca ni o kainaka:

9Au sega ni cala. E sega ni dua na ka au a cakava e cala.

Au dodonu tu, ka'u galala mai na i valavala ca.

10Na Kalou ga e kila na i ulubale ni nona mokuti au

Ka cakava vei au na i vakarau ni veimecaki.

11 Jope 13.27 E vesuka na yavaqu o koya ena sinucodo;

Ka vakaraica vakavinaka na noqu veitosoyaki kecega.

12Ia me'u tukuna sara vei iko, Jope,

Ni o iko o cala.

E uasivi cake na Kalou mai na tamata kecega.

13A cava na vu ni nomu beitaka na Kalou

Ni sega ni dau sauma mai na nona vakatukutuku yani

Vua e dua na tamata?

14E dina ga ni vuqa tu na sala ni nona dau vosa na Kalou,

Ia e sega ga ni dua e dau vakarorogo ki na ka e kainaka.

15 Jope 4.13 E dau vosa mai na Kalou ena tadra kei na raivotu

Ka dau basika mai ni ra sa moce tu na tamata ena bogi.

16Na cakacaka ga ni Kalou era vakarorogo rawa kina na tamata

Ki na ka e tukuna,

Ka ra sa rerevaka na nona veivakaroti.

17Sa vosa na Kalou me ra muduka kina na tamata

Na nodra vakayacora tiko na i valavala ca

Ka me muduka talega na nodra dokadokai ira cake tiko.

18Ena sega sara ni vakalaiva na Kalou me ra vakarusai;

Ka viribaiti ira mai na veimate.

19E vakadodonutaka e dua na tamata na Kalou

Ena nona vakatauva vua na mate

Ka vakamosia kecega na yagona.

20Sa qai yali na nona garova na kakana na tamata tauvi mate,

Ia na kakana vinaka duadua sara mada ga e rairai vakasisila vua.

21Sa qai lila sobu mai na yagona

Ka sa rawa mo raica kecega na nona sui;

22sa vakarau lako tiko na tamata oqo

Ki na nodra vuravura na mate.

23De dua ena qai mai vukei koya e dua na agilosi

E dua vei ira na udolu vakaudolu na agilosi ni Kalou,

Era dau mai vakadreta vei ira na tamata na nodra i tavi.

24Ena nona loloma, sa qai kaya na agilosi,

Sereki koya! Me kakua ni lako sobu o koya

Ki na nodra vuravura na mate.

Oqo na i sau me sereki kina o koya.

25Ena rairai bulabula tale o koya

Ka kaukauwa vinaka na yagona.

26Ni masu, ena qai sauma mai na Kalou;

Ena qai masuta na Kalou ena yalo mamarau;

Ka na qai vakadodonutaka tale na Kalou na veika

Me daumaka kina o koya.

27Ena qai tukuna o koya ena matanalevu,

Au sai valavala ca.

Au a sega ni bau caka dodonu,

Ia sa vakavotaka tikoga na Kalou na noqu bula.

28Sa tarova o koya

Na noqu lako ki na nodra vuravura na mate,

Ka'u sa bula tikoga ena gauna oqo.

29Na veika kece oqo e dau cakava tu ga na Kalou ena veigauna;

30sa taqomaka o koya na bula ni dua na tamata,

Ka solia vua na bula mamarau.

31Ia oqo, Jope, mo vakarorogo mada ki na ka au tukuna tiko;

Mo vagagalu tiko mada ga ka laivi au me'u vosa.

32Kevaka e dua na ka o via tukuna,

Ia mo tukuna sara mai oqo me'u rogoca;

Ena ka ni marau me'u vakadinadina ni o dodonu tiko.

33Kevaka e sega, ia mo vagagalu mada ka vakarorogo vei au,

Me'u na vakavulica vei iko na ka mo cakava mo na qai vuku rawa kina.