1Era sa lewe 70 na kawa i Eapi na tui era vakaitikotiko mai Samaria. A sa vola e dua na i vola o Jeu ka vakau na i lavelave ni vola vei ira na turaga ni veikoro lelevu, vei ira na qase, kei ira na dauniveisusu vei ira na kawa i Eapi. Sa vakaoqo na lewe ni vola,
2“O ni sa lesi mo ni dau qaravi ira na kawa vakatui ka sa tu kina vei kemuni na qiqinivalu, kei na ose, kei na i yaragi, kei na veikoro vakabai. Ia oqo, ena gauna ga o ni ciqoma kina na i vola oqo,
3mo ni digitaka sara e dua na kawa vakatui sa donu vei kemuni me buli me tui, ka mo ni vala ena vukuna.”
4Era sa rere vakalevu sara kina na qase era veiliutaki voli e Samaria, ka ra kaya, “Ena rawa vakacava me da vorati Jeu, ni rau sa sega ni vorati koya rawa mada ga o tui Jorami kei tui Esaia?”
5Ena ka oqo, sa qai vakauta kina e dua na i tukutuku na i vakalesilesi liu ni valenitui, kei koya na i vakalesilesi liu ni koro, kei ira na qase vata kei ira na dauveisusu, me vakaoqo: “Keimami sa okati me nomuni tamata, ka sa tu vakarau me keimami cakava na veika kecega o ni vinakata. Ia keimami na sega ni bulia e dua me tui; mo ni vakayacora ga na ka sa dodonu vei kemuni.”
6A qai vola tale o Jeu vei ira na i karua ni vola, ka kaya, “Kevaka o ni sa totaki au ka vakarau tu mo ni vakarorogo ki na noqu vosa, mo ni qai kauta mai vei au ki Jesireli na uludra kece na kawa i Eapi na tui ena gauna vata vakaoqo ni mataka.”
O ira kece na lewe 70 na kawa i tui Eapi era sa qaravi mai vei ira na qase e Samaria, ka ra susugi ira cake mai.
7Ni sa ciqomi na i vola, era a qai vakamatei ira kece na lewe 70 na kawa i Eapi o ira na qase ni Samaria, era sa biuta na uludra ena basikete eso, ka vakauta ki Jesireli vei Jeu.
8Ni sa yaco yani vei Jeu na i tukutuku ni kena sa kau yani na uludra na kawa i Eapi, a sa vakarota o koya me ra tuvana cake me rua na i binibini ena matamata ni koro levu me biu tu e kea me yacova na mataka tarava.
9Ena mataka lailai, a sa lako yani o Jeu ki na matamata ni koro ka kaya vei ira na tamata era tu e kea, “Sai au na tamata ka bukiveretaka na tui o Jorami ka'u a vakamatei koya; ka sega ni dua vei kemuni me dua kina na nona cala. Ia o cei sa vakamatei ira kece oqo?
10Oqo sa vakadinadinataki kina ni veivosa kece i Jiova sa cavuti me baleti ira na kawa i Eapi sa yaco vakaidina. Sa vakayacora ko Jiova na nona vosa ni yalayala mai na gusu i Ilaijia na nona tamata.”
11A sa qai vakamatei ira kecega na vo ni vuvale nei Eapi mai Jesireli o Jeu, kei ira kece na nona i vakalesilesi, o ira na nona i tokani voleka, kei ira na nona bete; a sa sega ni vo e dua.Vakamatei o Ira na Weka i Esaia na Tui
12A sa biuti Jesireli o Jeu me lako ki Samaria. Ena nona lako voli, ni yaco yani ki na vanua sa vakatokai na “Nodra Vanua ni Keba na i Vakatawa ni Sipi,”
13a sa sotava e kea eso na weka i Esaia na tui Juta, ka sa tarogi ira, “O cei o kemudou?”
Era a sauma ka kaya, “O keitou na weka i Esaia. Keitou sa lako tiko i Jesireli me la'ki sikova na luvedra na ranadi o Jesipeli kei na vuvale vakatui.”
14A sa vakaroti ira na nona tamata o Jeu, ka kaya, “Dou vesuki ira bula!” Era a vesuki ira, ka la'ki vakamatei ira ena yasa ni dua na qara e kea. Era sa lewe 42 taucoko na tamata, ka sega ni vakabulai e dua vei ira.
Vakamatei o Ira na Vo ni Vuvale i Eapi15A sa lako tani mai kea o Jeu ka a mani qai sotavi koya o Jionatapi na luve i Rekapi. A sa kidavaki koya o Jeu, ka kaya vua, “Sa dodonu li vei au na yalomu, me vaka sa dodonu vei iko na yaloqu, se sega?”
A sa kaya o Jionatapi, “Sa vakakina.”
Sa qai kaya vua o Jeu, “Mo dodoka cake mai kina na ligamu.” A rau sa lululu, ka sa qai vukei koya cake o Jeu me vodo ena qiqi vakaturaga,
16ka sa kaya, “Me daru lako vata mada, mo raica na noqu gumatua ena totaki Jiova.” A rau sa vodo vata sara yani ki Samaria.
17Ni rau yaco ki Samaria, a sa vakamatei ira kecega na vo ni mataqali i Eapi o Jeu me yacova ni sa vaqeyavutaki ira kece sara, me vaka na vosa i Jiova ka a cavuti vei Ilaijia.
18A vakasoqoni ira vata na tamata kece o Jeu, ka kaya vei ira, Sa qaravi Peali vakalailai o Eapi; ia ena qaravi koya vakalevu o Jeu.
19Ia oqo, dou kacivi ira mai vei au na parofita kece i Peali kei ira kece na tamata sa qaravi koya, kei ira kece na nona bete. Me kakua sara ni yali e dua, ni'u sa na vakacabora e dua na i soro levu vei Peali; ia o koya e sega ni tiko kina ena vakamatei.” (Sa cakava vakailawaki ga na ka oqo o Jeu, ni sa vinakata o koya me vakawabokotaki ira na dauqaravi Peali.)
20A sa vakarota o Jeu, “Dou kacivaka mada e dua na soqoni tabu ena vuku i Peali!” Era a mani kacivaka vakakina.
21A talatala o Jeu ki Isireli taucoko. Era a lako mai o ira kecega era qaravi Peali, ka sega ni dua na tamata me sega ni lako kina. Era a curuma na burekalou i Peali, ka sa sinai mai na dua na muana ki na dua tale.
22Sa qai vakarota na bete ka daulewa na vale ni sulu o Jeu me kauta mai na i sulu ni sokalou me rauti ira kecega sa qaravi Peali.
23Ni oti o ya, a sa curu ki na burekalou i Peali o Jeu kei Jionatapi na luve i Rekapi ka tukuna vei ira na qaravi Peali, “Mo ni vakararai de ra tiko maliwai kemuni eso era qaravi Jiova, baleta ni dodonu me ra tiko duadua ga eke o ira era qaravi Peali.”
24Era a qai curu me ra vakacabora na i madrali kei na i sorokama.
Ia oqo, a lesia o Jeu me ra tiko e tautuba era lewe walusagavulu na tamata, ka kaya, “Mo ni vakamatei ira kece na tamata oqo. Ke sa dro bula e dua na tamata ka'u sa kauta mai ki ligamuni, ena mate o koya ka laivi koya me dro, me kena i sau na tamata o ya.”
25Ia ni ra vakacabora oti na i soro kama, a kaya o Jeu vei ira na i vakatawa kei na turaganivalu, “Ni curu yani ki na burekalou ka mokuti ira; ka kakua ni laiva e dua na tamata me dro.” Era a vakamatei ira ena i seleiwau; era a biuti ira ki tuba o ira na i vakatawa kei na turaganivalu, ka qai lako yani ki na rumu e loma ni burekalou i Peali.
26Era a kauta mai ki tautuba na veimatakau ni nona burekalou.
27Era a basuraka na matakau i Peali, ka vakarusa na nona burekalou, ka vukica na valenisoro i Peali me vale ni benu me yacova na siga oqo.
28Sai koya oqo na sala sa vakawabokotaka kina o Jeu na sokalou vei Peali e Isireli.
29Ia, sa sega ga ni gole tani o Jeu mai na i valavala ca i Jeropoama na tui, o koya ka a liutaki ira na Isireli me ra cuva vua na bulumakau koula ka vakaturi mai Peceli kei Tani.1Tui 12.28-30
30A sa vosa vei Jeu ko Jiova, ka kaya, “O sa caka vinaka ena nomu vakayacora na ka e dodonu e mataqu kei na nomu cakava ki na mataqali i Eapi na veika kece au vinakata mo cakava. Au sa yalataka kina vei iko ni ra na taura na i tutu vakatui e Isireli o ira na nomu kawa me yacova na i kava ni tabatamata.”
31Ia o Jeu sa sega ni muria na i vunau i Jiova na Kalou ni Isireli ena yalona taucoko; ia, sa muria ga na i valavala ca i Jeropoama ena nona liutaki ira na Isireli me ra caka ca.
Na Mate nei Jeu32Ena gauna o ya, a tekivu kina me vakalailaitaki ira na Isireli ko Jiova. O Eseeli na tui Siria sa valuta ka vakamalumalumutaki ira na vanua kece vaka-Isireli:
33mai na Joritani ka vaka ki na tokalau, na vanua taucoko o Kiliati, o ira na Kata kei ira na Rupeni, o ira na Manasa mai Aroeri, ka koto volekata na buca o Erinoni, o ya o Kiliati kei Pasani.
34Ia na vo ni cakacaka kecega sa cakava o Jeu, ka okati kina na veika sa rawata, era sa volai ena Kedra i Vola i Tukutuku na Tui kei Isireli.
35A sa mate o Jeu ka bulu mai Samaria. A sa sosomitaki koya na luvena o Jioaasi na tui.
36E a tui Isireli ka veiliutaki mai Samaria o Jeu me 28 na yabaki.
Who We AreWhat We EelieveWhat We Do
2025 by iamachristian.org,Inc All rights reserved.
