SAME 103 - Ai Vola Tabu Ena Vakavakadewa Vou（FNV）

Na Loloma ni KalouA nei Tevita

1Mo vakacaucautaki Jiova, na yaloqu,

Io, na ka kecega ena noqu bula taucoko,

Mo vakacaucautaka na yacana tabu.

2Mo vakacaucautaki Jiova, na yaloqu,

Ka kakua ni guilecava ni sa yalovinaka o koya.

3Sa bokoca o koya na noqu i valavala ca kece sara,

Ka vakabulai au mai na kequ mate kecega;

4Sa vakabulai au o koya mai na i bulubulu,

Ka vakalougatataki au ena nona loloma tudei

kei na yaloveivosoti.

5Sa vakasinaiti na noqu bula ena veika vinaka,

Ka'u sa cauravou tikoga kina ka kaukauwa me vaka na ikeli.

6Sa totaki ira era vakacacani Jiova,

Ka solia vei ira na nodra dodonu.

7Sa tukuna na nona i naki vei Mosese o koya,

Ka laiva vei ira na Isireli me ra raica na nona cakacaka veivakurabuitaki.

8Sa yalododonu ka dau lomasoli ko Jiova,

Sa berabera ni cudru ka sa sinai ena loloma tudei.

9Sa sega ni dau ia tikoga na veivunauci o koya,

Ena sega ni cudru tikoga ka sega ni mudu.

10Sa sega ni vakatauca vei keda na i totogi e veirauti kei na noda i valavala ca,

Ka sega tale ni cudruvi keda me vaka na noda ca.

11Me vaka na cecere ni lomalagi mai vuravura,

Sa levu vakakina na loloma tudei ni Kalou

vei ira era sa rerevaki koya.

12Me vaka na yawa ni tokalau mai na ra ni vanua,

Sa yawa vakakina na vanua e biuta laivi kina na Turaga

na noda i valavala ca mai vei keda yadua.

13Me vaka na nona yalovinaka e dua na tama ni gone vei ira na luvena,

Sa yalovinaka vakakina ko Jiova vei ira era sa rerevaki koya.

14Sa kila na Turaga na keda i bulibuli

Ka sa kila tu ni da sa kuvu ni soso.

15Ia na tamata sa vaka ga na co na nona bula,

Sa tubu ka se me vaka e dua na senikau ni veikau.

16Ia ni sa liwava na cagi, sa cagina tani yani

Ka sa na sega sara ni kune tale.

17Ia, na loloma tudei ga i Jiova vei ira era sa rerevaki koya

sa ia tikoga ka sega ni mudu,

Ka sa na vakataudeitaki na nona yalovinaka vei ira

me yacova na veitabatamata kecega,

18Io, ki vei ira ga sa dinata na nona veiyalayalati,

Ka ra sa muria ena yalodina na nona i vakaro.

19Sa vakatikori ko Jiova ena nona i tikotiko vakatui mai lomalagi;

Ka sa liutaka na veika kecega na nona matanitu.

20Ni vakacaucautaki Jiova, oi kemuni na agilosi kaukauwa ka qaqa,

Oi kemuni o ni sa muria na nona i vakaro,

Ka rogoca na nona vosa.

21Ni vakacaucautaki Jiova, na kaukauwa kecega mai lomalagi,

Oi kemuni na tamata o ni cakava na ka kecega e vinakata o koya!

22Ni vakacaucautaki Jiova, na ka kecega e bulia o koya

Ena veivanua kecega e lewa!

Mo vakacaucautaki Jiova, na yaloqu.