1Me lamata cake na Kalou
ka vakavuna me ra talabusese na nona meca.
Me ra dro tani e matana o ira sa cati koya.
2Me vaka na kubou sa biliga tani na cagi,
Sa biligi ira tani vakakina o koya;
Me vaka na waicala ni kadrala ena mata ni bukawaqa,
Era sa rusa vakakina na tamata ca ena mata ni Kalou.
3Ia, era sa marau ga na yalododonu
Ka vakavinavinaka ena mata ni Kalou;
Io, sa malaude na yalodra ena reki.
4Dou sere vua na Kalou, dou seretaka na yacana;
Dou caramaka na sala i koya sa vodoka na veio.
Na yacana ko Jiova, ka mo dou reki e matana!
5Na Kalou, o koya ka sa tiko ena nona vale tabu,
Sa tamadra na luveniyali ka taqomaki ira na yada.
6Sa solia vua sa galili na vanua me vakaitikotiko kina,
Ka liutaki ira sa vesuki ki na bula sereki kei na marau;
Ia era sa tiko ga ena vanua dravuisiga na tamata be.
7Kemuni na Kalou,
Ena nomuni kauti ira yani na nomuni tamata,
Ena nomuni lako kosova na vanua lala,
8 Lako 19.18 A sa yavavala o vuravura, ka vakatauca o lomalagi na uca,
Ena mata ni Kalou, na Kalou ni Saineai,
Ena mata ni Kalou, na Kalou ni Isireli.
9O ni sa vakavuna me tau vakalevu na uca
Ka vakabulabulataka tale na nomuni qele sa matemate tu.
10Era sa la'ki vakaitikotiko mai kea na nomuni tamata;
Ka o ni sa veivakarautaki ga na Kalou
Ena nomuni vinaka ki vei ira na dravudravua.
11Sa solia na i vakaro na Turaga,
Ka ra lewe vuqa sara era sa kauta yani na kena i tukutuku.
12“O ira na tui kei na nodra mataivalu sa dro vakusakusa yani,”
Ka sa veivotayaki na i tokinivalu e loma ni nodra i tikotiko.
13Kevaka dou sa moce koto ena maliwa ni buka e tautuba,
Na noqu ruve sa ukutaki na tabana ruarua ena siliva,
Ka sa tatalivaliva na vutina ena koula dina.
14Ni sa vakavuna o Koya sa Kaukauwa
na nodra veiseyaki na tui ni veivanua,
Oqo sa vaka na wai cevata vulavula e Ului Salimoni,
15Sa ulunivanua cecere o Basani,
A ulunivanua sa levu na kena ucuna momoto!
16Oi kemuni sa veiulunivanua sukusukura,
A cava li o ni rai vakatani mai kina
Ki na ulunivanua sa digitaka na Kalou me tiko kina
Me dautiko kina ko Jiova ka sega ni mudu?
17Sa lako mai Saineai na Turaga ki na vanua tabu
Ena nona qiqi ni valu kaukauwa e udolu vakaudolu.
18A sa lako cake o koya ki na vanua cecere,
Ka kauti ira yani e lewe vuqa na bobula ena nona qiqi;
Sa taura na i solisoli mai vei ira na tamata.
Ena tiko e kea na Kalou ko Jiova.
19Me vakacaucautaki na Turaga,
O koya sa colata na nodra i colacola ena veisiga;
Sa i koya na Kalou sa vakabulai keda.
20Na noda Kalou e Kalou dauveivakabulai;
Sa i Jiova, na noda Turaga,
Sa sereki keda mai na mate.
21Na Kalou ena vorolaka na uludra na kena meca;
O ira era vakayacora tikoga na nodra i tovo ca.
22A sa kaya ko Jiova,
“Au na kauti ira lesu tale mai na kemuni meca mai Pasani.
Au na vakalesui ira mai na loma ni wasawasa,
23Me sisili kina na yavamuni ena nodra dra,
Ka ra dramica na nomuni koli na kedra i votavota.”
24Na nomuni tayabe ni qaqa, na Kalou,
Era sa sarava na tamata kecega,
Io, na nomuni i lakolako na Kalou, na noqu tui,
ki na nomuni i tikotiko tabu.
25Era duri tu mai liu na matasere,
Ka duri e dakudra na daunivakatagi,
Era sa qai toka maliwai ira na goneyalewa dauqiri tibereli.
26“Me vakacaucautaki na Kalou ena nodra soqo vata mai na nona tamata;
Mo ni vakacaucautaka na Kalou, oi kemuni kece na kawa i Jekope!”
27A sa liu mai o Penijamini, na yavusa lailai taudua,
Sa qai tarava mai o ira na i liuliu e Juta kei ira na nodra i lawalawa,
Ka ra sa tarava sara na i liuliu ni yavusa o Sevuloni kei Navitalai.
28Ni vakaraitaka mada na nomuni kaukauwa na Kalou,
Na kaukauwa o ni dauvakayagataka ena vuku i keimami.
29Mai na nomuni Valenisoro mai Jerusalemi,
Na vanua era dau kau ka ni loloma yani kina na tui.
30Vunauci Ijipita mada, na manumanu kila ni veigasau o ya;
Ni vunauci ira mada na veimatanitu,
na qele ni bulumakau o ya kei ira na dui luvedra
Me yacova ni ra sa cuva sobu kece ka cabora vei kemuni na siliva.
Ni vakasavi ira tani ga na tamata era dau vinakata na i valu!
31Era na lako mai na mata mai Ijipita;
Era na laveta cake na ligadra na kai Eciopea
ena nodra masu vua na Kalou.
32Ni sere vua na Kalou na veimatanitu e vuravura,
Mo sere ena vakacaucautaka na Turaga.
33Vei koya sa vodo ena maliwa lala;
Na maliwa lala makawa.
Ni rogoci koya sa kaila ena domo levu.
34Ni kacivaka na kaukauwa ni Kalou;
Sa tu ena dela i Isireli na nona i ukuuku,
Kei na ligana qaqa ena maliwa lala.
35Sa dua na ka talei ni sa tiko na Kalou ena nona vale tabu,
Na nodra Kalou na Isireli!
Sa dau solia o koya na qaqa kei na kaukauwa vei ira na nona tamata.
Ni vakacaucautaka na Kalou.
Who We AreWhat We EelieveWhat We Do
2025 by iamachristian.org,Inc All rights reserved.
