2 VEIGAUNA 29 - Ai Vola Tabu Ena Vakavakadewa Vou（FNV）

O Esekaia na Tui Juta(2Tui 18.13)

1A sa yabaki 25 o Esekaia ena gauna e buli kina me tui, ka veiliutaki vakatui voli e Jerusalemi ena loma ni 29 na yabaki. Na yaca i tinana o Apaijia, na luve i Sakaraia.

2A valavala dodonu o koya ena mata i Jiova me vaka na ka kecega ka a cakava o Tevita na nona i tubutubu.

Na Vakasavasavataki ni Vale ni Kalou

3A dolava o koya na katuba ni vale i Jiova, ena i matai ni vula ni matai ni yabaki ni nona veiliutaki, ka ni a vakavinakataka o koya na katuba o ya.

4A kauti ira mai na bete kei na Livai o koya, ka vakasoqoni ira vata ena rara donuya na yasana ki na tokalau,

5ka kaya vei ira, “Ni rogoci au mai oi kemuni na Livai! Ni vakasavasavataki kemuni edaidai, ka vakasavasavataka talega na vale i Jiova, na nodra Kalou na nomuni qase, ka kauta tani na dukadukali mai na tikina tabu.

6Ni ra a caka cala na noda qase, ka cakava na veika ca ena mata i Jiova na noda Kalou; era a biuti koya, ka vagolea tani na matadra ka vakanadakuya na i tikotiko i Jiova.

7Era a sogota na katuba ni varada, era a bokoca na cina, ka ra sega ni vakama na ka boi vinaka se vakacabora na i soro kama ena tikina tabu vua na Kalou ni Isireli.

8Ena vuku ni ka oqo, a yaco kina vei ira na Juta kei Jerusalemi na cudru i Jiova, ka soli ira o koya me ra vakararawataki, me ra vakidacalataki, ka me ra vosa beci, me vaka o ni a raica.

9Ia oqo, era a bale mate na noda qase ena i seleiwau, ka ra a vakabobulataki tiko na luveda tagane, kei na luveda yalewa, kei na watida, ena vuku ni ka oqo.

10Ia oqo, sa tiko e lomaqu me caka e dua na veiyalayalati kei Jiova na Kalou ni Isireli me vagolei tani kina mai vei keda na nona cudru waqawaqa.

11Oi kemuni na luvequ, mo ni kakua sara ni vakawelewele, ni sa digitaki kemuni ko Jiova mo ni tu e matana, mo ni qaravi koya, ka mo ni nona i talatala ka vakama vua na ka boi vinaka.”

12Era a qai tucake na Livai, o Meaci na luve i Amasai, o Joeli na luve i Asaraia, mai vei ira na luvedra tagane na Koaca; o Kisi na luve i Apiti, o Asaraia na luve i Jialelieli, mai vei ira na luvedra tagane na Kerisoni, o Joa na luve i Sima, o Iteni na luve i Joa,

13kei ira na luve i Ilisavani, o Simiri, kei Jeueli; o ira na luve i Esava, o Sakaraia, kei Matanaia;

14kei ira na luve i Imani, o Jeueli, o Semeai kei ira na luve i Jitucuni, o Semaia, kei Usieli.

15Ni ra sa vakasoqoni ira vata mai na wekadra o ira na Livai oqo ka vakasavasavataki ira, era sa qai curu yani ki loma ni Valenisoro me vaka na i vakaro ni tui, ka qarava na kena vakasavasavataki me vaka na vosa i Jiova.

16Era sa curu na bete ki na Valenisoro me ra vakasavasavataka, ka ra kauta tani mai ki tuba na ka kecega sa dukadukali era kunea e loma. Era sa qai kauta sara yani na Livai ki na taudaku ni koro ena Buca o Kitironi.

17A tekivu na cakacaka ni veivakasavasavataki ena i matai ni siga ni matai ni vula, ka yaco ena i kawalu ni siga ki na varada i Jiova. A sa siga walu tale na nodra vakasavasavataka na vale i Jiova ka ra tinia na nodra cakacaka ena kena i katini kaono ni siga ena i matai ni vula.

Vakacabori Tale na Vale ni Kalou

18Era a qai lako na Livai vei Esekaia na tui ka kaya, “Keimami sa vakasavasavataka taucoko na vale i Jiova, na i cabocabonisoro kama, na kena i yaya kecega, na teveli ni madrai sa dau raici kei na kena i yaya kecega.

19A i yaya kece talega a biuta o Easi na tui ena nona caka cala ena gauna sa tui tiko kina, keimami a vakarautaka, vakasavasavataka; ka raica, ni ra sa tu ena mata ni cabocabo ni soro i Jiova.”

20Ena mataka ni siga ka tarava, a sa vakasoqoni ira vata na vakailesilesi ni koro o Esekaia na tui ka cabe cake ki na Valenisoro.

21Era a kauta mai e vitu na bulumakau tagane, vitu na sipi tagane, vitu na luve ni sipi, kei na vitu na me tagane me i soro ni valavala ca ni matanitu ena vuku ni Valenisoro, ena vukudra talega na Juta. A vakaroti ira na bete na luve i Eroni, me ra vakacabora ena i cabocabonisoro i Jiova.

22Era a vakamatea na bulumakau, ka ra taura na dra na bete ka kureitaka ki na i cabocabonisoro; era a vakamatea talega na sipi tagane, ka ra kureitaka na kena dra ena i cabocabonisoro; era a vakamatea talega na luve ni sipi, ka ra kureitaka na kena dra ena i cabocabonisoro.

23Ia era a kauta mai na me tagane e matadra na tui, kei ira na i soqosoqo, me i soro ni valavala ca, era a tabaka ena ligadra,

24ka ra a vakamatea na bete ka ra cabora ena i soro ni valavala ca na kedra dra ena i cabocabonisoro, me sorovaki kina o ira kecega na Isireli. A vakarota o koya na tui me caka na i soro kama, kei na i soro ni valavala ca ena vukudra kecega na Isireli.

25A vakatikori ira na Livai ena vale i Jiova ka me ra qiria na sibali, na api, na lira, me vaka na nodratou i vakaro o Tevita, o Kata na nona daurairai na tui, kei Necani na parofita; ni a tau mai gusudra na parofita na lewa i Jiova.

26Era a tucake na Livai, ka ra taura tu na i vakatagi domo vinaka i Tevita, ka ra taura na davui na bete.

27A vakarota o Esekaia me ra vakacabora na i soro kama ena dela ni cabocabonisoro, a tekivu vata talega kei na seresere vei Jiova, ka lako vata tiko kei na uvu davui kei na i vakatagi domo vinaka i Tevita na tui Isireli.

28Era a lotu kece na lewe ni vavakoso, laga sere na lewe ni sere, vakatagi na daunivakatagi, ka vakuri kece tiko na ka oqo me yacova ni vakacabori oti na i soro kama.

29Ia ni ra vakacaboisoro oti, era a cuva sobu ka lotu, na tui kei ira kece era a tiko kaya.

30A vakaroti ira na Livai o Esekaia kei ira na nona turaga, me ra seretaka na vakavinavinaka vei Jiova ena vosa ka a vakavulica o Tevita, kei Esava na daurairai. Era a seretaka na vakavinavinaka ena marau, ka vakacuva na uludra ka lotu.

31A qai vosa o Esekaia, ka kaya, O ni sa vakatabui kemuni oqo vei Jiova, ni toro voleka mai, ka kauta mai eso na i soro, kei na i madrali ni vakavinavinaka ki na vale i Jiova. Era a qai kauta mai na i soro na i soqosoqo, kei na i madrali ni vakavinavinaka; ka ra a kauta mai na i soro kama o ira era sa vinakata.

32Ia na i wiliwili ni soro kama ka ra kauta mai na i soqosoqo, a vitusagavulu na bulumakau tagane, dua na drau na sipi tagane, e rua na drau na luve ni sipi; na i soro kama kecega oqo a vakacabori vei Jiova.

33Ia na veika a vakatabui, a ono na drau na bulumakau, kei na tolu na drau na sipi.

34Ia era a rui lewe lailai na bete ka ra sega ni drudruga rawa na i soro kama kecega, ia me yacova ni ra a vakasavasavataki eso tale na bete, era a vukei ira kina na bete na wekadra na Livai ena dodonu ni lomadra me ra vakasavasavataki.

35Me kena i kuri na levu ni soro kama, a tiko talega na kedra uro na i soro ni veivinakati, kei na i madrali gunuvi me lako vata kei na i soro kama yadua. A vakadodonutaki kina vakaoqo na cakacaka ni vale i Jiova.

36A reki o Esekaia kei ira kece na tamata, ena vuku ni ka a cakava oqo na Kalou; ni a caka vakasauri na ka oqo.