JOSUA 15 - Ai Vola Tabu Ena Vakavakadewa Vou（FNV）

Vanua e Nodra na Mataqali Juta

1Sa vakaoqo na vanua ka votai me nodra na veivuvale ena mataqali i Juta. Na i yalayala ni nodra vanua ena ceva, sa tekivu sara mai na vanua ka yawa duadua ki na ceva ni vanua lala o Sini.

2A sa vakatekivu na kena i yalayala oqo ena ceva, mai na ceva ni Waitui Mate,

3ka qai gole vaka ki na ceva me tekivu mai na i curucuru o Akirapimi ka lako yani ki Sini. Sa cici sobu ena ceva kei Katesi Banea, me siviti Asironi, cabe ki Ata, ka gole vaka ki Karika,

4Sa lako yani ki Esimoni, ka muria na uciwai ena i yalayala kei Ijipita ki na Wasa Meditereni. O ya na i yalayala kei Juta ki na ceva.

5Ia na kena i yalayala ki na tokalau na Waitui Mate, me yaco sara ki na vanua e rau sota kina kei na gusu ni wai na Joritani.

A tekivu e kea na kena i yalayala mai na vualiku,

6ka tete yani vaka ki Peci Okila, ka cici vaka ki na vualiku ni tokaitua era sarava sobu tu na Buca o Joritani.

7Sa qai cabe na i yalayala mai na Buca i Akori ka lako cake ki Tepiri, ka gole vaka ki Kilikali ena vualiku, na koro ka qarava na i curucuru o Atumimi ena ceva ni qakilo. Sa vakamuria cake me yaco sara ki na mata ni wai mai Enisemesi ka basika ki Enirokeli,

8ka cabeta cake na buca i Peniinomi ena ceva ni baba ka toka kina o Jerusalemi, na nodra koro na Jepusaiti. Mai kea a gole cake na i yalayala ki na dela ni ulunivanua ka toka ena ra ni Buca o Inomi ena ucu ni Buca o Refaimi ka gole ki na vualiku.

9Sa qai gole vakadodonu mai na dela ni ulunivanua ki na veivurevure ni wai i Nefitoa, ka lako yani ki na veikoro volekata na ulunivanua o Efironi. Mai kea a gole na i yalayala vaka ki Beala se o Kiriaci Jiarimi,

10ka wavoki yani vaka ki na ra kei Beala ka gole yani ki na vanua veidelana o Sia, ka muria na vualiku ni yasa ni ulunivanua o Jiarimi se, o Kisaloni, ka gole sobu ki Pecisemesi ka takoso yani ki Timina.

11Mai kea sa gole yani na i yalayala ki na ulunivanua ena vualiku kei Ekironi, gole vaka ki Sikironi, sivita na ulunivanua o Beala, gole yani ki Japinieli ka yaco sara na i yalayala ki wasawasa.

12Na kena i yalayala ena ra na baravi ni Wasa Meditereni. Sai koya oqori na i yalayala ni vanua ka kovuta na nodra i votavota na lewe ni veivuvale ni mataqali i Juta.

Tawana na Nona Vanua o Kelevi(Dvei 1.11-15)

13Me vaka ni sa vakarota vua ko Jiova, a solia o Josua e dua na qele mai na nodra i votavota na Juta me nei Kelevi na luve i Jifune tagane. A sa soli vua o Epironi na koro i Aripa na tama i Anaki.