SAME 34 - Ai Vola Tabu Ena Vakavakadewa Vou（FNV）

Vakacaucautaka na Vinaka ni Kalou A Same i Tevita, ni sa via vaka na tamata lialia ena mata i Apimeleki, o koya ka sa vakatalai koya tani, ka sa qai lako yani.

1Au na dau vakavinavinakataki Jiova ena gauna kecega,

Ena sega ni mudu na noqu vakamolimoli vua.

2Au na vakacaucautaki koya ena vuku ni ka sa cakava,

Me ra reki ka marau kina o ira kece era vakararawataki ka sa rogoca.

3Ni mai duavata kei au ena vakacaucautaki Jiova,

Me da vakacaucautaka vata kece na yacana!

4Au a masu vei Jiova, ka sa rogoci au o koya;

A sa sereki au mai na noqu rere kecega.

5Era sa tacake vua o ira era vakararawataki ka ra sa marau;

Ka ra na sega ni vakamaduataki.

6Sa kaci yani vua na tamata dravudravua oqo,

ka sa rogoci koya ko Jiova;

A sa vakabulai koya mai na nona leqa kecega.

7Na nona agilosi sa taqomaki ira era sa rerevaki koya,

Ka vakabulai ira mai na leqa.

8 1Pita 2.3 Tovolea mada ka raica na vinaka i Jiova!

Ni sa kalougata na tamata sa vakarurugi mai vua.

9Ni rerevaki Jiova,

oi kemuni kece na nona tamata yalosavasava,

Ni o ira kece sa rerevaki Jiova

ena sega ni dua na ka me yali vei ira.

10Era na malumalumu mai ka viakana na laione,

Ia, o ira sa vakasaqarai Jiova, era na kunea ga na vinaka.

11Ni lako mai, ragone, ka vakarorogo vei au

Ka'u na vakavulici kemuni mo ni rerevaki Jiova.

12 1Pita 3.10-12 O vinakata li mo marautaka na bula?

O vinakata li na bula balavu kei na bula mamarau?

13Ia mo qai tarova kina na yamemu mai na veika ca

Ka muduka na vosa lasu.

14Mo gole tani mai na ca ka cakava na ka vinaka;

Mo vakasaqara ga na bula vakacegu kei na sautu.

15Sa dau wanonovi ira na yalododonu ko Jiova,

Ka rogoca na nodra masu;

16Ia, sa saqati ira ga era sa dau caka ca,

Me ra kakua ni nanumi tale e vuravura.

17Era sa tagi vei Jiova na yalododonu, ka sa rogoci ira ko Jiova;

Ka sa vakabulai ira mai na nodra leqa kecega.

18Sa dau tu voleka ko Jiova vei ira sa mavoa na yalodra

Ka sa vakabulai ira sa oti vakadua na nodra i nuinui.

19Sa sotava e vuqa na leqa na tamata yalododonu,

Ia sa vakabulai koya ko Jiova mai na leqa kece oqori;

20 Joni 19.36 Sa maroroi koya vinaka sara na Turaga

Ka sa sega ni ramusu e dua na nona sui.

21Na ca ena vakamatei ira na i valavala ca;

O ira sa cata na cakacaka dodonu era na totogitaki.

22Sa voli ira vakadua na nona tamata ko Jiova;

Era na vakabulai o ira kecega sa gadreva na nona veitaqomaki.