SAME 71 - Ai Vola Tabu Ena Vakavakadewa Vou（FNV）

A Masu ni Tamata sa Qase Cake Sara

1Kemuni i Jiova, au sa lako mai vei kemuni me'u taqomaki;

Ni kakua ni laivi au me'u vakamadualaki!

2Ni vukei au ka vakabulai au ena vuku ni nomuni yalododonu.

Ni rogoci au ka vakabulai au!

3Mo ni noqu i vakavakaruru tudei,

Ka noqu bainivalu kaukauwa me taqomaki au.

Sa i kemuni na noqu i drodro ka dau taqomaki au.

4Kemuni na noqu Kalou,

Ni vakabulai au mada mai vei ira na tamata ca,

Mai na ligana na tamata i tovo ca ka i vakarau kaukauwa.

5Oi kemuni Jiova na Turaga, sai kemuni ga na noqu i nuinui,

Ka'u sa vakadinati kemuni mai na gauna au se gone kina.

6Au sa vakararavi ga vei kemuni ena noqu bula taucoko;

Sa i kemuni talega ka sa maroroi au mai na kete i tinaqu.

Au na dau vakacaucautaki kemuni tikoga.

7Na noqu bula sa yaco me i vola dusidusi vei ira na lewe vuqa,

E baleta ga ni o ni sa noqu dauniveitaqomaki qaqa.

8Au na vakacaucautaki kemuni ena veisiga kecega,

Ka tusanaka voli ga na nomuni lagilagi.

9Ni kakua ni cati au ni'u sa qase mai oqo;

Ni kakua ni biuti au ni'u sa malumalumu sobu oqo.

10Era sa gadreva na kequ meca me ra vakamatei au;

Era sa veivosaki ka bukiveretaki au.

11Era sa kaya, “Sa biuti koya na Kalou,

Me da muri koya ka vesuka,

Baleta ni sa sega ni dua me vakabulai koya.”

12Ni kakua ni yawa mai vei au, na Kalou;

Na noqu Kalou, ni mai vukei au vakatotolo mada!

13Me ra vakadrukai ka vakarusai o ira era ravuti au!

Me ra vakamaduataki ka vakasewasewani o ira

Era saga me ra vakamavoataki au.

14Au na dauvakanuinui tikoga vei kemuni,

Au na vakavinavinaka vakalevu cake tikoga vei kemuni.

15Au na tukuna tikoga na nomuni yalododonu,

Au na tusanaka tikoga ena veisiga kecega

na nomuni veivakabulai,

E dina ga ni sa levu cake mai na ka au rawa ni kila.

16Au na vakacaucautaka na nomuni kaukauwa i Jiova na Kalou;

Ka'u na tusanaka na nomuni yalododonu sa nomuni taudua ga.

17O ni sa vakavulici au me tekivu sara mai na gauna au se gone kina,

Ka'u na dau tukuna tikoga na nomuni cakacaka veivakurabuitaki.

18Ia oqo au sa qase mai ka sa vulavula mai na uluqu,

Ni kakua sara ni biuti au, na Kalou!

Ni tiko ga kei au ni'u kacivaka na nomuni kaukauwa kei na qaqa

Vei ira na veitabatamata kecega.

19Na nomuni yalododonu na Kalou sa yaco ki na maliwa lala.

O ni sa cakava na veika lelevu;

Sa sega tale ni dua me vakataki kemuni.

20O ni sa vakavuna na noqu leqa kei na noqu rarawa,

Ia, o ni na qai vakalesuya tale mai na noqu kaukauwa;

Ka tarovi au mai na lako yani ki na i bulubulu.

21O ni na qai vakalevutaka tale na noqu dokai,

Ka na ia talega na veivakacegui.

22Au na vakacaucautaki kemuni vakaidina ena api,

Au na vakacaucautaka na nomuni yalodina, na noqu Kalou.

Au na vakatagitaka na sere ena noqu api vei kemuni,

Oi kemuni na Yalosavasava ni Isireli.

23Au na kaila ena marau ni vakatagi tiko vei kemuni;

Ka'u na sere voli ena yaloqu taucoko,

Baleta ni o ni sa vakabulai au.

24Au na tukuna voli na nomuni yalododonu ena veisiga yadua,

Ni ra sa vakadrukai ka vakamaduataki ga

O ira era saga me ra vakacacani au.