JOPE 31 - Ai Vola Tabu Ena Vakavakadewa Vou（FNV）

1Au a sa cakava oti na noqu vosa ni yalayala

Ni'u na sega ni garova e dua na goneyalewa ni'u raica.

2A cava beka e dau cakava na Kalou Kaukauwa vei keda na tamata?

E dau sauma beka vakacava o koya na cakacaka ni tamata?

3Sa dau vakauta mai o koya na rusa kei na veivakacacani

Vei ira era caka ca.

4Sa kila na Kalou na veika kecega au cakava;

Na i cavucavu yadua ni yavaqu sa raica vinaka o koya.

5Au bubuluitaka ni'u sa sega mada ni bau cakava e dua na ka ca,

Ka'u sega mada ni sa bau tovolea me'u vakacalai ira na tani.

6Me qai vakarautaki au mada na Kalou

Ena dua na i vakarau bibi e dodonu vinaka tu,

Me qai raica rawa kina ni sega sara ga na noqu cala.

7Kevaka au sa gole tani mai na sala dodonu,

Se vakalaivi au me'u malele yani ki na ca,

Se kevaka sa mani vakadukadukalitaka na ligaqu na i valavala ca,

8Ia me qai kena i sau me vakalaivi na vua ni noqu i teitei me vakarusai,

Se me ra vakalaivi ga na tani me ra kania na kakana au tea.

9Kevaka au sa maleleta na wati na wekaqu,

Ka'u sa la'ki wawa vuni voleka koto e mata ni katuba ni nona vale,

10Ia me qai vakalaivi sara na watiqu

Me la'ki vakasaqa kena kakana e dua na tagane tani

Ka mani moce sara ena i mocemoce ni tagane tani.

11Sa ka vakasisila dina sara na i valavala ca vakaoqo

Ka kena i totogi ga na mate.

12Na mate oqo e vaka sara ga na veivakarusai ni bukawaqa mai eli,

Ka me qai rusa kece sara kina na noqu i yau.

13Ni vosa vakatukutukutaki au e dua na noqu tamata dauveiqaravi,

Au na vakarogoca mada na nona vakatukutuku

Ka'u na cakava vakadodonu sara na kena i wali.

14Ke'u sega ni cakava na ka oqo,

Au na qai douvaka rawa vakacava

Me'u veiqaravi kei na Kalou?

A cava tale me'u na qai kaya rawa

Ni sa mai vakatau lewa vei au o koya?

15Na Kalou vata ga ka buli au,

Sa bulia talega na noqu tamata dauveiqaravi.

16E sega vakadua ni'u sa bau besetaka

Na vukei ira na dravudravua,

Ka sega vakadua talega ni'u sa bau vakalaivi ira na yada

Me ra tu ga ena dela ni nuiqawaqawa,

17Se me'u sa bau kana mada

Ka laivi ira na luveniyali me ra viakana tu ga.

18Ena noqu bula taucoko,

Au dau maroroi ira vakavinaka sara ga na vaka tu oqo.

19Ni'u raica e dua ni vakaloloma tu, ni rui dravudravua

Ka sega ni rawa ni volia na nona i sulu,

20Au na solia sara ga vua na i sulu sipi

Ka tali mai na vutidra na noqu qele ni sipi.

Ena qai vakacaucautaki au o koya

Mai na lomana taucoko sara ga.

21Kevaka au vakaisina e dua na luveniyali

Baleta ni'u kila ni na sega ni kilai,

22Ia me qai ramusu ruarua sara mada ga na ligaqu;

Me rau basuraki tani sara ga mai na vatuvatu ni tabaqu.

23Sa sega sara ni'u veivakaisini vakaoqo

Baleta ni'u rerevaka na i totogi ni Kalou.

24Au sega ni vakararavi ki na i yau,

25Se me'u sakitaka na noqu vutuniyau.

26Au sega vakadua ni sa bau masuta na matanisiga ni serau vinaka tu,

Se na vula ni vakaciriloloma tu mai na kena i rairai.

27E sega vakadua ni'u sa bau temaki me'u cakava na ka oqo.

28Na i valavala ca vakaoqo sa cakitaki kina na Kalou Kaukauwa.

29Au sega ni marautaka me ra vakararawataki na noqu meca,

Se me'u vakavinavinaka ni ra sota kei na rusa,

30Ka sega talega ni sa bau masulaka me ra mate

Ka ni'u sai valavala ca kina.

31Era kila kecega na noqu tamata cakacaka

Ni'u dau kidavaki ira na vulagi ena noqu vale.

32Au kidavaki ira na dauveilakoyaki me ra curu mai ki na noqu vale,

Ka'u sega vakadua ni vakalaiva me ra moce tu ga e gaunisala.

33Eso na tamata era dau tovolea me ra vunia na nodra i valavala ca,

Ia oi au, au sega sara ga ni bau vunia na noqu.

34Au sega sara ni bau rerevaka na ka era tukuna na tamata;

Au sega vakadua ni bau tiko lo se me'u sa tiko vakadua ga e loma ni vale

Ni'u rerevaka na nodra kakase ni veivakacacani.

35Sa sega beka ni dua ena bau vakarorogo ki na ka au tukuna tiko?

Au sa bubuluitaka ni vosa yadua oqo e dina sara ga.

Laiva vua na Kalou Kaukauwa me sauma mai na noqu vosa.

Ke volai mada ga na ka sa beitaki au kina na tamata keirau veisaqasaqa tiko,

Me rawa kina ni matata tu vakaivola vei au,

36Au na dokadokai au sara ga

Ka'u na mai vakarubeca voli ga e domoqu na i vola,

Ka'u na dau dulaka cake vei ira na tamata kecega me ra raica.

37Au na tusanaka vua na Kalou na veika kece sara au a sa vakayacora oti,

Ka'u na sega ni lolou se madua ni'u sa tu e matana.

38Kevaka au a butakoca na vanua au teitei tiko kina

Ka kovea mai vei ira na kena i taukei dina —

39Kevaka au kania na ka e tei ena qele oqori ka'u sega ni sauma,

Ka biuti ira na dauteitei era a tea me ra viakana tu ga,

40Ia, me qai kakua sara mada ni bula na witi kei na barile ena vanua oqori

Ka me qai bula ga kina na co kei na kau vakavotona me kena i sosomi.

Sa yala eke na vosa i Jope.