1Ni oti e dua na gauna, a valuti ira na kai Filisitia na tui o Tevita ka vakamalumalumutaki ira, ka muduka na nodra veiliutaki ena vanua o ya.
2A sa vakamalumalumutaki ira talega na kai Moapi. A sa vakarota me ra davo sobu ki na qele o ira sa tauri vakavesu ka vakamatea e lewe rua mai na veiyatolu na tamata era sa vesuki tu. Era a qali kina vei Tevita na kai Moapi me ra nona tamata ka ra soli i vakacavacava vua.
3A vakamalumalumutaki Etateseri na luve i Riopi na tui Sopa o Tevita, ka lako yani o koya me taura tale na nona lewa mai na uciwai na Uferetisi.
4A taura mai vua o Tevita e 1,700 na lewe ni mataivalu vodo ose kei na 20,000 na lewe ni mataivalu ni vanua. A sa maroroya eso na ose me veirauti kei na dua na drau na qiqi ni valu, ka vakacacani ira na vo ni qiqi.
5Ena gauna era a lako kina na kai Siria mai Tamasiko me ra mai vukei Etateseri na tui Sopa, a qai vakamatea o Tevita e lewe 22,000 na tamata vei ira na kai Siria.
6A qai vakatikora na veimataivalu ni tawa vanua o Tevita e Arami mai Tamasiko; era a qali vei Tevita na kai Siria ka ra dau soli i vakacavacava vua. A solia vei Tevita ko Jiova na qaqa kei na lagilagi ena vanua kecega sa lakova.
7A taura o Tevita na i sasabai koula ka nodra na kai Etateseri ka kauta ki Jerusalemi.
8A taura talega o Tevita na tui e levu na parasa mai Peta kei Perocae, oi rau na koro mai Etateseri.
9Ni rogoca o Tou na tui Emaci ni a vakamalumalumutaka na mataivalu taucoko nei Etateseri o Tevita,
10a qai talai Jorami na luvena tagane vei Tevita na tui, me kidavaki koya ka vosa vakacaucautaki koya ena nona qaqa vei Etateseri ena i valu; ka ni rau a dau veivaluvaluti vakawasoma e liu kei Etateseri o koya. E a kauta tiko o Jorami na veiyaya siliva kei na koula, kei na veiyaya parasa.
11Oqori talega a vakacabora na tui o Tevita vei Jiova, ka vakakina na siliva kei na koula a rawata o koya mai na veimatanitu kece a vakamalumalumutaka;
12mai Itomi kei Moapi, na luve i Amoni, na kai Filisitia, na Amalekaiti, kei na i tokinivalu mai vua na luve i Riopi na tui Sopa o Etateseri.
13A rogo levu na yaca i Tevita ena nona lesu mai ni vakamatei ira oti e lewe 18,000 na kai Itomi ena Buca ni Masima.Ulutaga ni Same 60
14A lesia o Tevita na mataivalu ni tawa vanua ena veivanua e Itomi, ka ra qali na kai Itomi me ra nona tamata. A solia vei Tevita ko Jiova na lagilagi kei na qaqa ena veivanua kecega a lako kina.
15A nodra tui e Isireli taucoko o Tevita, ka vakataulewa dodonu ka savasava vei ira kecega na nona tamata.
16A liutaka na nona mataivalu taucoko o Joape na luve i Seruwaia, ka vunivola levu ni matanitu o Josefati na luve i Eilute;
17e rau kena bete o Setoki na luve i Eitupi kei Eimeleki na luve i Epaiaca; ka vunivola o Siraia.
18A veiliutaki vei ira na Kireci kei na Pileci o Penaia na luve i Jioiata, ka ra sa bete na luve i Tevita.
Who We AreWhat We EelieveWhat We Do
2025 by iamachristian.org,Inc All rights reserved.
