1Kemuni Jiova, ni saqati ira era saqati au,
Ka valuti ira era valuti au.
2Ni taura na nomuni sasabai kei na nomuni yaragi
Ka lako mai mo ni vukei au.
3Ni laveta cake na nomuni moto kei na nomuni matau ni vala
vei ira era vakasavi au.
Ni tukuna vei au ni o ni sa noqu i vakabula!
4Me ra vakadrukai ka vakamaduataki
O ira era tovolea me ra vakamatei au.
Me ra vakalesui tale ka vakaveilecayakitaki
O ira era bukia na kequ vere!
5Me ra vaka na qani sila sa cagina ena cagi
Ni sa vakasavi ira na agilosi.
6Me buto ka dravidravia na nodra gaunisala
Ena gauna sa mokuti ira kina na agilosi i Jiova.
7Era sa cakava na kequ dai ka sega ni dua na vuna vinaka,
Ka kelia e dua na qara me'u sikalutu kina.
8Ia ena vesuki ira na veivakarusai ni bera ni ra kila,
Era na coko ga ena nodra dai
Ka sikalutu ena qara era kelia.
9Ia au na qai reki ena vuku i Jiova;
Au na marau baleta ni sa vakabulai au.
10Au na kaya vei Jiova ena yaloqu taucoko,
“Sa sega tale ni dua me vakataki kemuni!
O ni sa taqomaki koya sa malumalumu mai vua sa kaukauwa,
Io na dravudravua kei na luveniyali mai vua sa vakacacani koya!”
11Era sa vakadinadina na tamata ca ena ka au beitaki kina,
Ka beitaki au ena veika ca au sa sega ni bau kila.
12Era sa cakava na ka ca vei au me i sau ni vinaka,
Ka'u sa kidroa vakalevu kina.
13Ia, ena gauna era tauvi mate kina,
Au sa vakaisulu ena i sulu ni vakaloloku
Ka'u mai sega yani ni kana
Au sa vakacuva ulu ga ni'u sa masu,
14Me vaka au masu vua e dua na noqu i tokani se taciqu.
Au cuva ka lako voli ena vakaloloku
Me vaka e dua sa vakalolokutaka na tinana.
15Ena gauna au leqa kina, era sa marau kecega
Ka ra wavokiti au me ra vakalialiai au:
Era sa buturaki au na vulagi
Ka mokulaki au tikoga.
16Era sa vakavuna me'u sota kei na ka rarawa,
Ka ra qai vakalialiai au ka wanonovi au ena yalo ca.
17A cava na kena dede, oi kemuni i Jiova,
mo ni vakararai walega mai kina?
Ni vakabulai au mada mai na nodra veivakacacani;
Ni taqomaka na noqu bula mai vei ira na laione oqo.
18Ia, au na vakavinavinaka vei kemuni
ena kedra maliwa na lewenivanua,
Ka vakacaucautaki kemuni ena matadra kecega.
19 Same 69.4; Joni 15.25 Ni kakua ni laivi ira na noqu meca,
O ira na tamata lasulasu oqori
me ra rekitaka na noqu malumalumu.
Ni kakua ni laivi ira sa cati au ka sega na vuna
Me ra dredre ena marau baleta na noqu rarawa.
20Era sa sega ni bau vosa vakavinaka,
Ia, era sa dau bulia ga na veimataqali lasu kecega
me baleti ira na tamata era sa gadreva na tiko vinaka.
21Era sa beitaki au, ka ra kailavaka;
“Sa i koya! Keimami sa raica na ka o a cakava!”
22Oi kemuni Jiova, o ni sa raica tu na ka oqo,
O koya oqo, noqu Turaga, mo ni kakua kina ni galu;
Mo ni kakua sara ni tiko vakayawa!
23Mo ni yavala mai, na Turaga, ka taqomaki au;
Ni tucake, na noqu Kalou, ka totaki au.
24O ni sa yalododonu ga i Jiova, na noqu Kalou,
Ni vakaraitaka ni sa sega na noqu cala,
Ni kakua ni laivi ira na noqu meca me ra marau ena vukuqu.
25Ni kakua ni laivi ira me ra kaya e lomadra,
“Sa i koya sara ga o ya na ka keimami vinakata!”
Ni kakua ni laivi ira me ra kaya, “Keimami sa vakadrukai koya”
26O ira kecega sa marautaka na noqu sotava na ka rarawa
Me ra vakadrukai sara ka veilecayaki.
Me ra qai sinai ena madua kei na rogo ca
O ira kecega era sa vakacerecerei ira cake vei au.
27O ira kecega sa vinakata me'u sereki
Me ra kaila ena marau ka kaya tikoga,
“Sa cecere ga ko Jiova!,
Ni sa dau taleitaka na nodra rawa-ka na nona tamata.”
28Io au na qai tukuna tikoga na nomuni yalododonu,
Ka vakacaucautaki kemuni ena veisiga taucoko.
Who We AreWhat We EelieveWhat We Do
2025 by iamachristian.org,Inc All rights reserved.
