1A sa yabaki walu o Josaia ena gauna a buli kina me tui Juta, ka sa veiliutaki mai Jerusalemi me 31 na yabaki. Na tinana o Jetita, na luve i Ataia mai na koro o Posikaci.
8A sa kaya o Ilikaia na bete levu vei Safani na vunivola, Au sa kunea na i vola ni vunau ena vale i Jiova. A solia na i vola vei Safani o Ilikaia, a wilika o koya.
9A sa lako vua na tui o Safani na vunivola, ka kaya vua, “Era sa kauta na nomuni dauveiqaravi na i lavo sa tiko ena Valenisoro ka ra sa solia sara vei ira sa liutaka tiko na cakacaka ni kena vakavinakataki tale na Vale i Jiova.”
10A sa tukuna vua na tui o Safani na vunivola, “Sa solia vei au e dua na i vola o Ilikaia na bete.” A sa qai wilika o Safani vua na tui.
11Ia ni rogoca na tui na vosa ni vola ni vunau, a sa dresulaka na nona i sulu, ni sa cokai na yalona.
12A sa qai vakaroti Ilikaia na bete na tui, kei Eaikami na luve i Safani, kei Akipori na luve i Mikaia, kei Safani na vunivola, vata kei Asaia, e dua na tamata ka dau qarava na tui, ka kaya,
13“Dou lako ka tarogi Jiova ena vukuqu, kei na vukudra na tamata, kei na vukudra kece talega na Juta me baleta na vosa ni vola ni vunau sa qai kune oqo. Sa cudruvi keda ko Jiova baleta ni ra sa sega ni vakarorogo ki na vosa ni vola oqo o ira na noda qase.”
14A ratou sa qai lako o Ilikaia na bete, o Eaikimi, o Akipori, o Safani, kei Asaia vei Ulita na parofita yalewa ka vakaitikotiko ena tikina vou e Jerusalemi. (Na wati Ulita o Salumi, na luve i Tikiva ka makubui Ariasi, o koya sa dau maroroya na i sulu ni vale ni Kalou.) E ratou a vakamacalataka vua na ka sa yaco,
15ka sa tukuna vei iratou o Ulita na parofita me ratou lesu vua na tui ka solia vua
16na i tukutuku oqo mai vei Jiova: “Au sa na vakarau totogitaki Jerusalemi kei ira na kena lewenivanua, me vaka sa volai ena vola sa wilika oti o tui Juta.
17Era sa biuti au ka vakacaboisoro ki na kalou tani eso, ka ra sa vakacudrui au ena cakacaka kecega ni ligadra. Sa waqa kina na noqu cudru taucoko ki na vanua oqo, ka na sega ni bokoci rawa.
18Ia mo dou kaya vakaoqo vei tui Juta, o koya ka a talai kemudou mai me tarogi Jiova, Sa kaya vakaoqo ko Jiova na nodra Kalou na Isireli: O a vakarorogo ki na veika sa volai ena i vola,
19ka veivutuni na lomamu, ka vakamalumalumutaki iko ena mata i Jiova, ka dresulaka na nomu i sulu, ka tagi ni o sa rogoca na noqu vosa ni'u na cudruvi Jerusalemi kei ira na tamata era tiko kina. Io au na vakavuna me rairai ca ka vakadomobula na vanua o ya, ka me dua na vanua sa rukaki mai vei ira na tamata. Ia au sa rogoca na nomu masu,
20kei na totogi me na tau vei Jerusalemi ena sega ni yacovi iko me yacova na nomu mate. Au na laivi iko mo mate ena vakacegu.”
E ratou a qai la'ki tukutuku lesu tale ki vua na tui.
Who We AreWhat We EelieveWhat We Do
2025 by iamachristian.org,Inc All rights reserved.
