ISIKELI 29 - Ai Vola Tabu Ena Vakavakadewa Vou（FNV）

Na Parofisai me Baleti Ijipita

1Ena i katini karua ni siga ni katini ni vula, ni katini ni yabaki, sa yaco tale mai vei au na vosa i Jiova, ka vaka:Aisea 19.1-25; Jere 46.2-26

2Luve ni tamata, mo vaqara na matamu vei tui Ijipita, na tui Ijipita, ka parofisaitaka na ca ena yaco vei koya, kei na ka ena yacovi Ijipita talega; mo vosa ka kaya,

3Sa kaya vakaoqo na Kalou ko Jiova: ‘Raica, au sa saqati iko vakaukauwa, o iko na tui Ijipita, na korokotaile levu ka koto e loma ni nona uciwai ka sa kaya, ‘Au sa taukena na wai na Naile; Ni ka'u a bulia ga,’

4Au na vakacobara na noqu i qaso ki na galegalemu, ka vakalaivi ira na ika e nomu uciwai me ra kabita matua na yagomu, ka'u na qai vueti iko mai na loma ni nomu veiuciwai kei ira kece na ika era sa kabita tu na yagomu.

5Au na biuti iko tani ki na vanua lala, o iko kei na ika ni nomu uciwai. O na qai tutu mamaca ki dela ni vanua; ka sega tale ni kumuni vata me bulu. Ka'u na soli kemuni me kedra kakana na manumanu ni vanua kei ira na manumanu vuka e macawa.

6Era na kila na kai Ijipita kecega ni sai au ko Jiova. Ni ra sai titoko gasau ki na mataqali i Isireli;Aisea 36.6

7ni ra sa tauri iko ena ligamu, o sa na qai ramusu, ka mavoa sara kina na tabadra kece; ni ra sa ravi vei iko, o sa ramusu, ka kurea kecega na tolodra;

8o koya oqo, sa kaya kina na Kalou ko Jiova: Raica, au na kauta mai vei iko na i seleiwau, ka muduka tani na tamata kei na manumanu;

9ka sa na lala me tawa yaga na vanua o Ijipita. Era na kila ni sai au ko Jiova.

Ni o a kaya, ‘Au sa taukena na Naile, ni'u a cakava oi au.’

10O koya oqo, raica ka'u na veimecaki kina kei iko, kei ira na nomu uciwai, ka'u na cakava na vanua o Ijipita me vanua lala sara ka i benubenu, me vakatekivu mai Mikitoli ka yala ki Saini ka kauta yani ki na i yalayala ki Eciopea.

11Ena sega tale ni butuka e dua na yava ni tamata se manumanu. Ena sega na ka e bula kina me yabaki vasagavulu.

12Au na vakavuna me vanua lala o Ijipita e vuravura. Ena vakaleqai ka lala tu na veikoro lelevu e Ijipita me vasagavulu na yabaki, ka ca vakalevu sara mai na veikoro tale eso. Era na tamata vakasevi na lewena ka ra veiseyaki e veivanua.

13Ia sa kaya vakaoqo na Kalou ko Jiova: Ni sa cava e vasagavulu na yabaki, ka'u na qai vakasoqoni ira vata tale na kai Ijipita mai vei ira na lewe ni vanua era dui vakasavi kina;

14Ia ka'u na vakasuka tale na veika vinaka kei na nodra i yau o ira na kai Ijipita, ka kauti ira lesu mai ki na vanua o Pacirosi, na vanua era a sucu kina. Mai kea, era na yaco me ra matanitu malumalumu,

15io era na matanitu malumalumu duadua vei ira kecega, ka na sega tale ni vakalevulevui koya e deladra na veimatanitu; ni'u na vakalailaitaki ira sara me ra kakua ni la'ki lewai ira tale na veimatanitu.

16Ia ena sega tale na vanua era na vakararavi kina na mataqali i Isireli, me ra vakananuma tale kina na nodra caka cala ni ra golevi ira yani me kere veivuke. Ia era na qai kila ni sai au na Kalou ko Jiova.

Ena Vakamalumalumutaki Ijipita o Tui Nepukanesa

17Ena i matai ni siga ni matai ni vula ni karuasagavulu kavitu ni yabaki, sa qai yaco vei au na vosa i Jiova ka vaka:

18Luve ni tamata, sa lavaka o Nepukanesa na tui Papiloni vei ira na nona i valu e dua na cakacaka levu me ra valuti Taia kina; me tasi kece na uludra ka me luvawale kece na tabadra; ia e a sega sara na ka e rawata mai o Taia, se na nona mataivalu me sauma kina na cakacaka levu a caka kina.

19O koya oqo, sa kaya kina vakaoqo na Kalou ko Jiova: Raica, au na solia vei Nepukanesa na tui Papiloni na vanua o Ijipita; ka me tokitaka na kena i yau, ka na butakoca, ka kovea; ka sa na kena i sau na nona mataivalu.

20Au sa solia vua na vanua o Ijipita me i sau ni cakacaka sa cakava o koya, ni sa cakacaka o koya ena vukuqu, sa kaya na Kalou ko Jiova.

21“Ena siga o ya, ka'u na cakava me tubu na i leu ni mataqali i Isireli, ia ka'u na dolava na gusumu mo vosa vei ira. Era na kila ni sai au ko Jiova.”